Heduru Painia Taudia 300 Ai Tahua
Heduru Painia Gaukarana be March o April o May Lalonai Do Oi Karaia Diba, A?
1 “Haroro Taudia 1,000 Ai Tahua”—April 1881 ena Watch Tower lalonai idia torea hereva kwarana ta be unai. Unai magasin lalonai idia gwauhamata tatau bona hahine iboudiai, “Lohiabada ese Iena hereva momokani be idia dekenai ia hadibaia vadaeni taudia,” idia noia, edia diba hegeregerena edia nega do idia gaukaralaia, Baibel ena hereva momokani harorolaia gaukarana lalonai. Edia nega ena kahana rua rua amo kahana ta be Lohiabada ena gaukara lalonai do idia haorea diba taudia be idia hagoadaia, colporteur haroro taudia ai do idia lao—hari inai nega ena painia taudia idia gunalaia taudia unai.
2 Ena be inai nega be unai nega amo ia idau, to gau ta ia idau lasi—Dirava ena hesiai taudia, ia idia gwauhamata henia taudia, idia ura hora momo be sivarai namona harorolaia gaukarana lalonai do idia haorea. Bema kongregesen pablisa taudia be heduru painia taudia ai idia lao, unai ese idia ia durua, ma hora haida be Basileia gaukarana lalonai do idia haorea neganai, edia gaukara ena anina do idia habadaia totona.—Kol. 4:17; 2 Tim. 4:5.
3 Iseda orea ese heduru painia gaukarana dalana ia kehoa negana amo, tadikaka bona taihu tausen momo ese unai gaukara idia karaia mai edia moale ida. PNG brens ena teritori lalonai unai painia gaukarana goadalaia karana ia bada ia lao dainai, lagani 1984 ema bona hari, lagani hani lalonai April huadia lalonai pablisa taudia 200 o ma haida danu be heduru painia taudia ai idia lao—lagani 1984, 1989, 1991, bona 1993 lalonai. Lagani 1993 lalonai edia momo be 286, lagani gunadia ibounai idia hereaia unai! Momokani, ita be mai eda dala, heduru painia taudia edia namba badana matamatana, 300, be March, April bona May 1997 lalonai do ita abia.
4 Umui ai hagoadaia inai, March, April, bona May huadia toiosi amo ta o rua o toi do umui abia hidi, unai nega lalonai heduru painia gaukara do umui karaia. Dahaka dainai March danu ai gwauraia? Badina be inai lagani lalonai Keriso ena mase laloa dinana be Sunday, March 23 ai. Unai Memorial dinana idia gunalaia puradia do ita haorea dalana namo hereana be inai: Iseda Lohiabada bona Hahemauri Tauna, Iesu Keriso ese ia hamatamaia gaukarana, Basileia harorolaia gaukarana, do ita karaia mai eda goada ida. March lalonai haroro gaukarana badana do ita karaia lalonai, kamonai taudia momo do ita boiria diba, ita ida Keriso ena mase do idia laloa lou totona. March do ia idau badina ma ta be, buka matamatana ladana The Secret of Family Happiness do ita hariharilaia negana ginigunana be unai. [ITAIA: Do oi gwau unai buka be English gado gaudia sibona do ita hariharilaia.] Inai danu, March huana lalonai be Saturday ima bona Sunday ima, unai dainai unai dina ai ita ese haroro gaukarana do ita karaia badabada diba. Momokani, April bona May lalonai haroro gaukarana be ma do ita goadalaia noho neganai, kamonai taudia do ita lou henia diba bona Baibel stadi matamatadia do ita hamatamaia diba; unai stadi lalodiai buklet matamatana ladana Dirava Ia Ura Dahaka Ita Karaia? do ita gaukaralaia. Iseda teritori dekenai idia noho taudia iboudiai ita hereva henidia; idia dekenai Gima Kohorona bona Awake! magasin, hari inai negai mai anina bada gaudia, do ita hariharilaia badabada, bona Saturday bona Sunday ai unai gaukara do ita habadaia momokani.
5 Daidia Idia Hegeregere Heduru Painia Gaukarana Do Idia Karaia?: Hesiai Gaukara Karaia Totona Ita Hegaegae bukana ena rau 114, ia gwau: “Herevana edena bamona oi noho, to bema oi bapatiso vadaeni, kara mirodia oi karaia lasi, oi be mai emu dala hua tamona lalonai hora 60 haroro gaukara oi karaia, bema oi laloa heduru painia gaukara hua tamona eiava hua haida lalodiai oi karaia diba, vadaeni kongregesen ena elda taudia ese oiemu aplikesen pepana, unai hesiai gaukara namona karaia totona, do idia laloa namonamo mai edia moale danu.” Vadaeni, heduru painia gaukarana karaia dalana be March o April o May lalonai do oi davaria diba, eiava?
6 Bema elda orea edia lalona idia goada bona bema pablisa oredia ese idia durudia mai edia lalona ibounai ida, inai boiboi, heduru painia taudia 300 boiboilaia boiboina, ese kwalimu momokani do ia havaraia. (Heb. 13:7) Namona be ruma bese kwaradia ibounai do idia laloa namonamo, vaira huadia ta o haida lalodiai edia ruma taudia hida be heduru painia taudia ai do idia lao diba.—Sal. 148:12, 13; Kara 21:8, 9 itaia.
7 Namona be emu lalona do oi hadaia haraga lasi, emu moni gaukarana o emu sikuli gaukarana o emu famili edia maduna o emu maduna ma haida, Baibel ese ia gwauraia gaudia, dainai heduru painia gaukarana do oi karaia diba lasi. Haida ese do idia karaia be auka reana; to, bema karaia dalana idia lailaia namonamo bona Iehova ese ia hanamodia, do idia kwalimu diba. (Sal. 37:5; Aon. 16:3) Emu ura, painia gaukarana do oi karaia urana, ese emu noho do ia biagua be namo, emu noho ese emu ura, painia gaukara urana unai, do ia biagua be dika. (Aon. 13:19a) Unai hegeregerena, momo ese edia noho daladia, pura ta ta amo idia badinaia daladia, idia haidaua, edia haroro gaukarana be hua ta lalonai do idia habadaia totona, badina be Iehova bona taunimanima idia lalokau henidia dainai. (Luka 10:27, 28) Basileia gaukarana idia goadalaia taudia ese hahenamo momo do idia davaria.—1 Tim. 4:10.
8 Heduru Painia Gaukarana ese Ia Havaraia Anina: Dirava ena hesiai taudia tausen tausen be mai edia lalona ibounai ida heduru painia gaukarana idia karaia dainai, Iehova hanamoa boiboi badana ia vara. Sivarai namona be ma taunimanima haida dekenai harorolaia totona, unai Basileia harorolaia taudia idia gaukara goada lalonai, unai ese ia veridia lao Iehova sibona kahirakahira dekenai, badina be ena lauma bona ena hahenamo abia totona ia dekenai idia tabekau dalana be idia dibaia dainai.
9 Heduru, regula, bona spesel painia taudia be ita bogaraginai idia gaukara neganai, unai ese kongregesen ia hagoadaia. Edia haroro gaukarana lalonai idia vara gaudia idia kikilaia neganai, edia lalo-goada ese ma haida edia lalona ia hagoadaia. Bena idia danu idia laloa namonamo, dahaka do idia tahua guna be namo, bona edia gaukara, haroro gaukarana mai anina bada, do idia habadaia diba eiava. Taihu ta ena mauri laganidia be 70 neganai, bapatiso ia abia bena maoromaoro heduru painia gaukarana ia karaia matamaia, bena hua ta ta iboudiai ia karaia noho. Lagani haida murinai idia nanadaia, dahaka dainai heduru painia gaukarana be hua iboudiai ia karaia goadagoada noho. Ia haere, ia gwau ia laloa ena mauri lagani gunadia 70 ia haorea kava vadaeni bona ia ura lasi ena mauri lagani oredia danu do ia haorea kava!
10 Heduru painia taudia iboudiai ese edia haroro dalana idia hanamoa. Witness tauhau ta ia gwau: ‘Egu mero neganai, egu tamana bona sinana edia haroro gaukarana lalonai lau bamodia. Unai gaukara lau moalelaia bada. To gabeai egu lalona ia parara sikuli dekenai lau be stiuden oredia amo lau idau. Unai neganai hereva momokani idia dekenai do lau herevalaia be lau hemarailaia matamaia. Ruma ta ruma ta ai lau haroro neganai, lau gari, sikuli ai lau diba merona o kekenina ta do lau hedavari henia garina. Lau laloa lau ia hahekwakwanaia gauna be taunimanima gari henidia karana. [Aon. 29:25] Sikuli amo lau doko murinai, egu lalona lau hadaia painia gaukarana be nega sisina do lau karaia. Unai dainai haroro gaukarana lau ura henia bada. Lau moalelaia kava lasi guna lau moalelaia bamona, bona ia be maduna metauna lasi. Egu Baibel stadi taudia be hereva momokani lalonai idia goada idia lao; unai lau itaia neganai egu lalona ia hegeregere momokani, badina be ia hahedinaraia Iehova Dirava ese egu gaukara ia hanamoa noho.’ Unai murinai unai tauhau be regula painia tauna ai ia lao.
11 Kongregesen lalonai momo be heduru painia gaukarana idia karaia neganai, teritori dekenai idia noho taudia iboudiai idia hereva henidia. Teritori ia haria tauna ese heduru painia taudia ia noidia diba, kongregesen ese ia gaukaralaia momo lasi gabudia dekenai do idia heduru. Bema edia dina tubua aniani idia abia lao bona dina ibounai idia gaukara, teritori ena gabu daudaudia dekenai danu do idia gaukara diba.
12 Elda Taudia ese Do Idia Hegaegaelaia Guna: Pablisa taudia ese pura edia kahana idauidau ai, anina be adorahi ai danu, haroro gaukara idauidau do idia karaia daladia, be elda taudia ese vaira huadia toiosi lalodiai do idia hegaegaelaia guna be namo, momo do idia haroro diba totona. Ruma ta ruma ta ai do idia gaukara negadia sibona lasi, to dala ai bona bisinesi teritori ai do idia gaukara negadia bona guna edia ruma ai idia davaria lasi taudia do idia tahua lou negadia danu, be do idia gwauraia hidi be namo. Elda taudia be unai bamona do idia karaia neganai, unai amo painia taudia do idia durua, idia dekenai ia hegeregere nega namodia ai kongregesen ida do idia gaukara hebou. Namona be idia hegaegaelaia haroro gaukara daladia iboudiai be kongregesen taudia do idia hadibaia namonamo. Haroro totona do idia karaia heboudia do idia karaia namonamo be namo. Inai danu, namona be pablisa taudia do idia henidia teritorina ena bada do ia hegeregere bona magasin momo bona buka bona buklet danu do idia oda haraga.
13 Sibona Emu Gaukara Dalana Do Oi Palania: Tadikaka ta, matamanai heduru painia gaukarana ia garilaia tauna, be ia gwau: “Guna lau laloa do ia auka, to lau davaria ia auka lasi. Sediual namona dainai lau kwalimu.” Inai kahana ena rau ginigabena ai heduru painia gaukarana ena sediual ta, do oi badinaia namonamo diba gauna, be oi itaia, a? Heduru painia taudia edia maduna be inai sibona: Pura ta ta iboudiai hora 15 lalodiai haroro gaukarana do idia karaia.
14 Heduru painia gaukarana karaia totona, ruma hahinedia bona adorahi ela bona hanuaboi momokani idia gaukara taudia momo ese edia haroro gaukarana be daba daba ai idia karaia diba. Sikuli memero kekeni bona hanuaboi momokani ela bona dabarere idia gaukara taudia momo be adorahi ai haroro gaukarana idia karaia diba. Ful-taim moni gaukarana idia karaia taudia haida ese idia davaria, pura ta ta amo dina ta ai edia moni gaukarana amo idia laga-ani diba, eiava Saturday bona Sunday ai hora momo lalodiai idia haroro diba, bona adorahi ai danu. Nega momo Saturday bona Sunday sibona ai idia haroro diba taudia ese hua haida idia gwauraia hidi, badina unai hua lalodiai be Saturday ima bona Sunday ima. Hari Lagani ai March be unai bamona, bona August bona November danu. Palani ta, oi sibona do oi badinaia namonamo diba gauna, be mani do oi palania namonamo mai emu guriguri ida. Do oi palania totona, inai pepa ena rau 6 ai ia noho sediual do oi gaukaralaia be namo.
15 Heduru painia gaukarana ena namo ta be inai: Dala idauidau ai do oi karaia diba. Painia gaukarana do oi karaia huadia do oi gwauraia hidi diba, bona nega momo do oi karaia diba, sibona emu ura hegeregerena. Bema oi ura heduru painia gaukarana do oi karaia hanaihanai to oi hegeregere lasi, lagani ta lalonai hua rua rua amo hua ta ta lalonai karaia dalana be oi laloa vadaeni, a? Gau tamona, haida be nega daudau lalonai heduru painia gaukarana idia karaia hanaihanai diba.
16 Ful-Taim Painia Gaukarana Totona Hegaegae Dalana: Painia gaukarana idia ura henia taudia momo idia ura regula painia gaukarana do idia karaia, to idia daradara, edia nega, edia noho dalana, bona edia goada do idia hegeregere eiava. Momokani, regula painia gaukarana be hari idia karaia noho taudia momo ese heduru painia gaukarana idia karaia guna, unai amo idia hegaegae ful-taim hesiai gaukarana totona. Bema ta ese ena heduru painia gaukarana be dina ta ta iboudiai hora tamona amo ia halataia, eiava pura ta ta iboudiai ma dina tamona ibounai lalonai bema ia gaukara, ia be regula painia gaukarana ena sediual ia karaia guguru diba. Oi be unai bamona do oi karaia diba, a? Unai do oi diba totona, emu heduru painia gaukara ena hua tamona lalonai o ma haida danu ta ta lalodiai hora 90 haroro gaukarana lalonai mani oi haorea toho. Unai nega lalonai haida do oi lou henidia loulou bona Baibel stadi do oi hamatamatadia, unai dainai painia gaukarana ena kahana idauidau do oi karaia guguru diba.
17 Taihu ta ese lagani 6 lalodiai heduru painia gaukarana ia karaia hanaihanai. Unai nega ibounai lalonai iena ura be regula painia gaukarana do ia karaia. Unai dainai ia ese moni gaukaradia idauidau hani ia karaia toho, badina ia laloa reana idia ta amo hora 90 do ia haorea diba dalana do ia davaria, regula painia taudia edia maduna hegeregerena. Hua ta ta ai, ia ese sediual ta o rua ia torea, unai amo do ia diba do ia hegeregere eiava lasi. To ia itaia namonamo negadiai, ia laloa ful-taim haroro gaukarana do ia karaia dalana be lasi. To Iehova ia noia loulou do ia hakaua. Bena dina ta ai, Hesiai Hebou totona ia hegaegae neganai, ia ese Iseda Basileia Gaukara pepana gunana ta ena hereva ta ia duahia; ena hereva be inai: “Do oi hagugurua horadia oi lalo-hekwarahilaia badabada kava lasi, to gogoa gaukarana karaia badabada totona idia kehoa daladia oi laloa bada. (Ioa. 4:35, 36)” Taihu ia gwau: “Unai hereva lau duahia loulou nega 5 o 6, bena lau diba momokani Iehova ena haere be unai. Unai neganai egu lalona lau hadaia regula painia gaukarana do lau karaia matamaia.” Ena be ena pat-taim moni gaukarana ena sediual be namo momokani lasi, to ena aplikeisen pepana, regula painia gaukarana ena, be elda taudia ia henidia. Bena pura ta murinai ena gaukara negadia idia haidaua, bona idia gwauraia horadia be hegeregere momokani ia dekenai. Taihu ia gwau, “Inai be Iehova ena imana amo, ani?,” ma ia gwau: “Bema Iehova oi noia oi do ia hakaua, vadaeni iena hakaua dalana do oi abia neganai, do oi dadaraia lasi—oi abia dae sibona.” Bema oi ura momokani regula painia gaukarana do oi karaia, vadaeni inai March, April, bona May huadia toiosi lalonai heduru painia gaukarana do oi karaia murinai, reana do oi laloa oi danu be ful-taim haroro gaukarana lalonai do oi kwalimu diba.
18 Ai diba momokani Iehova ena orea taudia ese hahemauri sivaraina namona be inai gaukara negana namona lalonai do idia harorolaia neganai, ia ese edia lalo-goada do ia hanamoa bona edia gaukara do ia durua. (Isa. 52:7; Roma 10:15) Aiemai boiboi, heduru painia taudia 300 boiboilaia boiboina, haerelaia totona, unai gaukara be March o April o May lalonai do oi karaia diba, a?
[Box on page 3]
Heduru Painia Gaukarana Kwalimulaia Dalana
■ Emu lalona do ia goada
■ Iehova oi noia emu gaukara do ia hanamoa
■ Pablisa ma ta do oi boiria, oi ida painia gaukarana do umui karaia hebou
■ Emu gaukara dalana namona do oi palania
■ Magasin oi oda, edia momo do ia hegeregere
■ Kongregesen ena gaukara daladia oi durua
■ Nega idaudia ai bona gabu idaudia ai do oi haroro daladia oi tahua