Do Ita Karaia Lou, A?—Ai Boiboi Lou Heduru Painia Taudia Totona
1Dahaka gaukara do ita karaia lou? Memorial negana lalonai heduru painia gaukara do ita karaia lou, a? February 1997 ena Iseda Basileia Gaukara lalonai idia udaia pepana ena hereva kwarana be: “Heduru Painia Taudia 300 Ai Tahua.” Ai diba momokani umui ese unai hereva do umui laloa bada. March 1997 ena haroro ripoti ai haboua neganai, ai moale badina ai itaia pablisa taudia ibounai 259 be heduru painia gaukara lalonai idia vareai! Bema unai hua lalonai ripoti idia henia regula painia taudia 182 bona spesel painia taudia 48 bona misinari taudia edia namba ita hakapua unai namba dekenai, ita davaria pablisa taudia ibounai amo 16 pesen be painia gaukara idia karaia. Unai do ita karaia lou inai lagani ena Memorial negana lalonai, a?
2Vanegai lagani ai, emui haroro gaukara umui habadaia totona umui hekwarahi bada taudia ibounai ai hanamoa. Ia hedinarai goevagoeva, umui ibounai be Iehova Dirava bona emui dekena taudia umui lalokau henia dainai unai bamona umui karaia. (Luka 10:27; 2 Pet. 1:5-8) Edia noho maurina be idauidau pablisa taudia ese edia noho dalana idia haidaua heduru painia gaukara idia karaia totona. Kongregesen ta lalonai, pablisa taudia 32 be hua tamona lalonai idia painia hebou, regula bona spesel painia taudia danu. Unai anina be pablisa taudia ibounai amo 38 pesen be painia gaukara idia karaia. Unai hua tamona lalonai kongregesen ma ta ena pablisa taudia 32 pesen idia painia hebou, bona kongregesen ma ta dekenai pablisa taudia amo 26 pesen idia painia! Painia gaukara idia karaia taudia be buruka taudia, elda taudia, hesiai taudia, ruma hahine, bona matamata taudia. Idia momo be guna idia painia lasi. Mai edia lalona ibounai ida unai gaukara idia karaia dainai ma haida idia hagoadaia. Teritori sibona lalonai namo ia havaraia lasi, to kongregesen lalonai unai gaukara karaia urana ia habadaia. Tadikaka idia moale ta ta idia dibaia namonamo dainai bona haroro gaukara lalonai huahua namodia idia itaia dainai idia moale danu.
3Vanegai Memorial negana lalonai matamata taudia be painia gaukara idia karaia danu. Tano ta dekenai, ena mauri lagani be 13 bapatiso lasi pablisa ta ese ranu bapatiso amo Iehova dekenai ena mauri ia gwauhamatalaia ia hahedinaraia diba dinana ia naria. February ai ia bapatiso murinai, ia torea ia ura March lalonai heduru painia gaukara do ia karaia, ia gwau: “Hari, gau ta ese lau ia koua lasi dainai, karaharaga egu aplikeisen lau henia. . . . Ai davaria ekspiriens namodia momo be reana ai davaria lasi, bema umui ese mai lalokau ida painia gaukara totona ai umui boiria lasi.” Ena tahua gauna be do ia karaia lou. Ai diba vanegai lagani ai, pablisa matamata taudia momo edia tahua gauna be heduru painia gaukarana idia karaia, bona idia ura inai lagani lalonai do idia karaia lou.
4Reana oi be vanegai March, April bona May lalonai heduru painia gaukara idia karaia 760 taudia ta. Inai lagani ai do oi karaia lou, a? Umui pablisa memero kekeni be edena bamona? Bema vanegai lagani ai umui painia lasi, inai lagani ai umui karaia diba, a? Bema April bona May hua lalodiai heduru painia taudia 300 ita abia diba unai ese ita ia hagoadaia. Umui tadikaka bona taihu be mai goada ida do umui gaukara neganai, unai tahua gauna ita abia diba.
5April Bona May Lalonai Do Ita Gaukara: Inai lagani ai, Memorial be Saturday, April 11 ai, unai dainai April be hua namona iseda haroro gaukara ita habadaia totona. (2 Kor. 5:14, 15) Unai hua ena dina ginigunadia 11 lalonai, kamonai taudia be Memorial dekenai ita boiridia mai gaukarana do ita karaia. Bema oi ura heduru painia gaukara do oi karaia, mani emu aplikeisen oi henia, oi hamatamaia negana ia do abia lasi neganai.—1 Kor. 14:40.
6May ena hua lalonai Saturday bona Sunday ima idia noho dainai, reana idia sikuli eiava ful-taim moni gaukara idia karaia pablisa taudia do idia davaria unai hua lalonai heduru painia gaukara idia karaia be ia auka lasi. Unai Saturday bona Sunday ta ta ai hora 10 oi abia totona sediual oi karaia, bena hora ma 10 sibona oi atoa hua lalonai hora 60 oi abia totona.
7April bona May lalonai, Gima Kohorona bona Awake! sabskripsen do ita hariharilaia. Unai ese ita momo ia hagoadaia ita painia totona. Badina be dahaka unai bamona ai hereva? Magasin hariharilaia dalana be auka lasi bona haroro gaukara lalonai ita gaukaralaidia be moale gauna. Haroro gaukara daladia idauidau ai ita gaukaralaidia diba—ruma-ta-ruma-ta, bona sitoa-ta-sitoa-ta gaukara ai, bona danu dala ai, motuka idia atoa gabudiai, loaloa uma gabudiai bona dala ma haida dekenai taunimanima ita hereva henidia neganai. Mai anina bada gauna be Gima Kohorona bona Awake! magasin ese Basileia ena hereva momokanidia idia gwauraia. Idia ese Baibel ena peroveta herevadia idia gwauraia, idia hamomokania Dirava ena Basileia be ia lohia noho. Duahia taudia edia lalona idia veria danu, badina idia ese taunimanima durudia momokani gaudia idia herevalaia. Bema unai mai dava bada magasin ese iseda mauri idia hanamoa dalana ita laloa, unai ese ita do ia doria April bona May lalonai haida dekenai unai magasin do ita hariharilaia goadagoada, sabskripsen idia abia totona.
8Emu magasin gaukara oi habadaia totona oi hegaegae neganai, inai hereva oi duahia lou neganai heduru do oi abia: “Gima Kohorona Bona Noga!—Hereva Momokani Idia Gwauraia Gaudia” (January 1, 1994, Gima Kohorona), “Magasin Hariharilaidia Dalana” (April 1996 Iseda Basileia Gaukara), bona “Oiemu Magasin Hariharilaia Herevana Oi Hegaegaelaia” (October 1996 Iseda Basileia Gaukara).
9Elda Taudia ese Idia Gunalaia: Tano ta dekenai, vanegai lagani lalonai idia abia hidi hua lalonai idia painia taudia momo durua totona, kongregesen ta dekenai elda taudia ese unai hua lalonai Saturday ta idia abia hidi kongregesen ibounai idia haroro hebou totona. Palani idia karaia unai dina lalonai nega idauidau ai do idia hebou, unai amo kongregesen taudia ibounai dekenai dala ia kehoa haroro daladia idauidau lalonai idia vareai totona. Unai dala idauidau be, bisinesi gaukara, dala dekenai haroro, ruma ta ruma ta dekenai idia lao, lou henia karaia, revareva torea, bona telefon amo haroro. Momo be unai grup dekenai idia lao, bona unai dina lalonai pablisa taudia 117 be haroro gaukara idia karaia. Haroro gaukara lalonai hora ibounai 521 idia abia bona magasin, buklet bona buka 617 idia hariharilaia! Unai Saturday ai idia davaria moalena be ia lao bona Sunday danu, badina Pablik tok bona Gima Kohorona stadi dekenai momo herea idia lao. Elda taudia e, umui be emui kongregesen totona April bona May lalonai unai bamona haroro gaukara daladia umui hegaegaelaia diba, a?
10April bona May edia Hesiai Hebou ta ta iboudiai, namona be kongregesen do umui hadibaia loulou pura vaira lalonai edena negai bona edeseniai do umui hebou haroro gaukara totona, unai be mai anina bada bema haroro negadia idaudia ma haida umui hegaegaelaia. Regula painia taudia bona pablisa taudia ai hagoadaia, bema idia hegeregere unai haroro grup dekenai do idia lao.
11Haroro naria tauna be teritori ia haria tauna ida do ia hebou bona nega momo idia karaia lasi teritori dekenai haroro totona palani do idia karaia. Namona be guna taunimanima idia noho lasi rumadia ai, dala dekenai, bona sitoa ta sitoa ta dekenai emui haroro dalana umui habadaia. Gabu haida dekenai, adorahi ai umui haroro diba. April bona May lalonai haroro gaukara badana dainai namona be magasin momo do umui oda hegaegae.
12Pablisa Momo Idia Karaia Diba: Heduru painia gaukara ena aplikeisen pepana ena hereva ginigunana be: “Iehova lau lalokau henia bona lau ura taunimanima haida lau hadibaia iena ura namona idia diba totona. Unai dainai hari lau ura heduru painia gaukara be henuai lau torea negana lalonai do lau karaia, lauegu haroro gaukara bona hadibaia gaukara lau habadaia totona.” Iehova ita lalokau henia bona lauma dalanai ita ura ma haida ita durua be iseda gwauhamata ena badina. (1 Tim. 4:8, 10) Ta ese heduru painia gaukara do ia karaia diba totona, namona be ia bapatiso, ia be kara goeva tauna, bona ia hegeregere hua ta lalonai haroro gaukara lalonai hora 60 do ia karaia. Ita ibounai be iseda noho dalana ita laloa namonamo murinai, ita haida, guna ita painia diba lasi taudia, be inai lagani lalonai April bona May ai ita painia diba, a?
13Kongregesen lalonai momo be idia itaia ma haida, edia noho dalana be idia edia bamona, be painia gaukara lalonai idia vareai neganai, idia laloa idia danu idia vareai diba. Sikuli natudia, buruka taudia, ful-taim moni gaukara idia karaia taudia, elda bona hesiai taudia, bona ma haida be mai kwalimu ida heduru painia gaukara idia karaia vadaeni. Tano ta dekenai, ruma ai ia gaukara, ia be mai ena natuna rua, bona ful-taim moni gaukara ia karaia hahinena ta ese hua tamona lalonai heduru painia gaukara ia karaia hora 60 lalonai, magasin 108 ia hariharilaia bona Baibel stadi toi ia hamatamaia. Edena bamona unai ia karaia? Ena dina tubua aniani negana ia gaukaralaia kahirakahira ia noho teritori dekenai ia haroro, revareva amo ia haroro, bona danu motuka atoa gabudia ai bona dala dekenai ia haroro. Danu pura ta ta ai ia gaukara lasi dinana ai kongregesen ena haroro grup ida ia gaukara. Ena be guna ia laloa heduru painia gaukara be ia karaia diba lasi gauna ta, to haida ese idia hagoadaia bona ia badinaia diba sediual ia karaia dainai, iena dala idia koua gaudia ia hanaia.
14Iesu ese iena hahediba taudia ia hamaoroa: “Lauegu huaia auna be ia metau lasi, bona huaia neganai danu hekwarahi lasi.” (Mat. 11:30) Unai be August 15, 1995 Gima Kohorona ena hagoadaia herevana ena ladana. Unai hereva ese ful-taim moni gaukara aukana ia karaia taihu ta ena sivarai ia gwauraia. Ia laloa ia be heduru painia gaukara ia karaia diba lasi, a? Lasi, ia be hua ibounai heduru painia gaukara ia karaia. Dahaka dainai? Badina ia mamia painia gaukara ese ia durua ia laloa maoromaoro totona. Taunimanima ia durudia Baibel ena hereva momokani idia dibaia bona edia mauri idia haidaua Dirava ena lalo-namo idia abia totona ia itaia neganai, moale bada ia abia ena be ia bisi bada.—Aon. 10:22.
15Ta ese painia gaukara ia karaia totona ia dadaraia eiava ia haidaua gaudia be ia moalelaia hahenamodia ese idia hanaia. Taihu ta ese iena lalohadai heduru painia gaukara dekenai ia torea, ia gwau: “Lau ia durua lau sibona lau laloa bada lasi totona bona ma haida durua gaukarana lau laloa bada. . . . Idia karaia diba taudia lau hagoadaia idia karaia totona.”
16Sediual Namona Do Umui Karaia: Inai pepa ena rau ginigabena dekenai, ai ese February 1997 ena Iseda Basileia Gaukara pepana lalonai ai torea haheitalai sediual ai torea lou. Reana idia ta be ia hegeregere oi totona. Oi lalodia lou neganai, hua ta ta lalonai oi karaia gaudia oi laloa. Emu ruma dekenai idia noho gaukara oi karaia diba oi do painia lasi neganai, eiava oi rakatania diba ela bona painia gaukara murinai, a? Moale karadia bona laga-ani karadia ai oi atoa nega haida oi kokia diba, a? Namona be oi ese hora 60 ibounai oi laloa lasi, to emu sediual oi palanilaia dina ta ta eiava pura ta ta totona. Heduru painia gaukara oi karaia totona, dina ta lalonai hora rua eiava pura ta lalonai hora 15 sibona ai oi gaukara be hegeregere. Ai torea haheitalai sediual oi itaia, bona emu pensolo ida, oi bona emu ruma bese ese ia badinaia diba sediual oi hegaegaelaia.
17Vanegai lagani ena memorial negana lalonai kongregesen taudia edia kara namo bona edia heduru bada karana haroro gaukara lalonai ese regula painia taihu ta ena lalona ia hagoadaia, bona ia gwau: “Heduru painia gaukara durua totona mai emui lalokau ida ai umui hagoadaia dainai umui lau tanikiu henia bada. . . . Umui gwauraia sediual ese guna idia painia lasi taudia momo ia durua bona idia lalo-parara idia karaia diba. . . . Lau moale bada badina lau be Iehova ena orea hahinena ta bona hesiai tauna mai ena kamonai bona mai ena kara maoromaoro ena hakaua dalana mai lalokauna lau badinaia.”
18Aonega Herevadia 21:5 ese ita ia hagoadaia, ia gwau: “Mai haheauka danu ia gaukara noho tauna ena laloa, ese anina ia havaraia bada noho.” Aonega Herevadia 16:3 ese ita ia hagoadaia, ia gwau: “Oi ura karaia gaudia ibounai totona, Lohiabada do oi noia, ia ese do ia hanamoa gwauraia, unai neganai oiemu palani ibounai edia anina do idia vara momokani.” Oibe, abia hidi ita karaia gwauraia neganai, guriguri amo Iehova ita noia bona ita kwalimu totona ia dekenai ita tabekau, ita diba momokani iseda palani heduru painia gaukara ita karaia totona do idia guguru. Reana ita itaia hua tamona eiava rua lalonai heduru painia gaukara ita karaia namonamo murinai, ita ese heduru painia gaukara ena aplikeisen pepana dekenai inai hereva ia gwauraia mauana ita makaia diba: “Bema oi ura heduru painia gaukara oi karaia noho ela bona ai oi hamaoroa lou, maua dekenai maka oi atoa.” Herevana dahaka ia vara, August lalonai heduru painia gaukara ita karaia lou diba, badina ia be mai ena Saturday bona Sunday ima. August ai, iseda haroro laganina ita hadokoa neganai, do ita gaukara goada ibounai be haroro gaukara idia karaia badabada totona.
19Iesu ia peroveta ia gwau: “Lau dekenai ia abidadama henia tauna ese lau karaia karadia ibounai be do ia karaia, bona inai kara do idia hereaia karadia danu do ia karaia.” (Ioa. 14:12) Unai peroveta herevana badana be hari inai negai ia guguru noho lalonai, Dirava ida ita gaukara hebou be iseda moalelaia bada hahenamona ta. Hari inai nega be nega namona sivarai namona harorolaia badabada totona, nega do ita atoa unai gaukara karaia totona. (1 Kor. 3:9; Kol. 4:5) Nega momo heduru painia gaukara ita karaia be dala hereadaena Basileia harorolaia gaukarana lalonai iseda maduna ita huaia totona. Ita ura do ita itaia inai Memorial negana lalonai heduru painia taudia hida ese hanamoa anena do idia abia. (Sal. 27:6) Vanegai lagani ena namba dainai, ai laloa, ‘Do ita karaia lou diba, a?’ Ai diba momokani do ita karaia!
[Box on page 3]
Heduru Painia Gaukara Oi Karaia Diba, A?
“Herevana edena bamona oi noho, to bema oi bapatiso vadaeni, kara mirodia oi karaia lasi, oi be mai emu dala hua tamona lalonai hora 60 haroro gaukara oi karaia, bema oi laloa heduru pioneer gaukara hua tamona eiava hua haida lalodiai oi karaia diba, vadaeni kongregesen ena elda taudia ese oiemu aplikesen pepana, unai hesiai gaukara namona karaia totona, do idia laloa namonamo mai edia moale danu.”—Hesiai Gaukara Karaia Totona Ita Hegaegae, rau 113.
[Box on page 6]
Heduru Painia Sediual
Pura Ta Ta ai Haroro Hora 15 Abia Dalana Edia Haheitalai
Dabai—Monday Ia Lao Saturday
Sunday be dina ta ida oi haidaua diba
Dina Nega Hora
Monday Dabai 2 1⁄2
Tuesday Dabai 2 1⁄2
Wednesday Dabai 2 1⁄2
Thursday Dabai 2 1⁄2
Friday Dabai 2 1⁄2
Saturday Dabai 2 1⁄2
Hora Iboudiai: 15
Dina Rua Ibounai
Pura ena dina rua oi abia hidi diba
Dina Nega Hora
Wednesday Dina Ibounai 7 1⁄2
Saturday Dina Ibounai 7 1⁄2
Hora Iboudiai: 15
Hanuaboi Rua Bona Saturday Bona Sunday
Hanuaboi rua oi abia hidi diba
Dina Nega Hora
Monday Hanuaboi 1 1⁄2
Wednesday Hanuaboi 1 1⁄2
Saturday Dina Ibounai 8
Sunday Dina Kahana Ta 4
Hora Iboudiai: 15
Adorahi Ima Bona Saturday
Sunday be dina ta ida oi haidaua diba
Dina Nega Hora
Monday Adorahi 2
Tuesday Adorahi 2
Wednesday Adorahi 2
Thursday Adorahi 2
Friday Adorahi 2
Saturday Dina Ibounai 5
Hora Iboudiai: 15
Sibona Egu Haroro Sediual
Nega iboudiai edia hora oi abia hidi
Dina Nega Hora
Monday
Tuesday
Wednesday
Thursday
Friday
Saturday
Sunday
Hora Iboudiai: 15