Magasin Hariharilaidia Karana amo Moale Habadaia
1 Iehova ena guba oreana be gaukara bada oreana. Iesu Keriso dekena amo, Iehova ese tanobada dekenai orea ta ia haginia, bona unai orea taudia danu be mai edia ura danu idia gaukara bada. (Sal. 110:3; Mat. 9:37, 38) Bema iseda haroro gaukara ita karaia namonamo bona ita ura habadaia, iseda moale do ia bada ia lao danu. (Luka 10:17) Unai bamona do ia vara momokani bema iseda lalona do ita hadaia Gima Kohorona bona Noga! magasin hariharilaidia gaukarana do ita habadaia neganai.
2 Magasin hariharilaidia gaukarana be Basileia sivaraina harorolaia dalana badana ta. Ena be haroro gaukara ia bada ia lao noho, to gabu haida dekenai ia hedinarai idia hariharilaidia magasin edia namba be ia diho ia lao. Edena bamona magasin hariharilaia gaukarana do ita hanamoa diba? Ita ta ta iboudiai be dahaka do ita laloa noho iseda magasin gaukara do ita habadaia totona?
3 Magasin hariharilaidia edia namba habadaia totona, gau ginigunana be: MAGASIN ITA LALODIA BADA. Bema Gima Kohorona bona Noga! magasin ita duahidia hanaihanai, unai ese ita do ia durua unai magasin ita lalodia bada totona. Magasin lalodiai idia toredia sivaraidia iboudiai ita duahidia dainai, namona be nega ibounai dala ita tahua taunimanima dekenai ita henidia toho totona. Reana ita iboudiai dekenai Saturday iboudiai be nega namona ruma ta ruma ta gaukara, dala ai, bona maketi gabudia ai magasin do ita hariharilaidia totona. Kongregesen momo lalodiai dina ta pura lalonai idia gwauraia magasin gaukara idia karaia totona, badina pablisa taudia haida be dala lasi Saturday dekenai idia karaia. Ma haida idia gwau adorahi 5 okoloko ia lao 6 okoloko adorahi be nega namona ruma ta ruma ta gaukara idia karaia magasin idia hariharilaidia totona. Dala dekenai, sitoa ta sitoa ta dekenai, edeseniai taunimanima ita davaria neganai, bona magasin matamatadia be ura taudia dekenai ita abidia loulou karadia, be dala namodia magasin ita hariharilaidia totona. Ruma ta ruma ta gaukara ita karaia neganai, bema hua ena henia gauna idia ura abia lasi, magasin matamatana ita henidia toho diba. Bema ita gima noho magasin ita hariharilaidia totona, do ita moale bada diba.
4 Heduru hereva iharuana magasin hariharilaidia gaukara habadaia totona be: HEREVA KWADOGINA GWAURAIA. Pablisa haida be idia hereva momo dainai ruma taudia be magasin idia ura lasi abia. Ma pablisa haida ese Kiki Herevana idia gaukaralaia magasin gaukara idia karaia neganai. To unai bamona idia karaia be maoro lasi. Magasin ita hariharilaidia neganai hereva kwadogina ita gwauraia be namo. Ita ura magasin momo do ita hariharilaidia. Unai magasin ese taunimanima do idia ‘hereva henidia’ bamona. Society ia gwau namona be miniti kahana eiava tamona lalonai magasin lalonai ia noho sivarai tamona do ita kikilaia.
[Questions]
1. (a) Dahaka ese iseda moale karana do ia habadaia diba? (b) Luka 10:17 ena hereva hegeregerena, dahaka dainai hahediba taudia 70 idia moale? (c) Hari, dahaka do ita karaia iseda moale habadaia totona?
2. (a) Gabu haida dekenai magasin hariharilaidia ena namba be edena bamona? (b) Inai sivarai ai torea ena badina be dahaka?
3. (a) Dahaka dainai magasin ita lalodia momo? (b) Moale ita abia totona do ita gima noho dahaka ita karaia totona?
4. (a) Dahaka ese ita ia durua magasin momo do ita hariharilaidia totona? (b) Miniti kahana eiava tamona lalonai edena bamona sivarai do ita kikilaia diba?
This article is repeated in km 7/93.