Gima Kohorona Bona Noga!—Hereva Momokani Idia Gwauraia Magasin
1 January 1, 1994, ena Gima Kohorona, rau 22 dekenai, ita idia hadibaia iseda magasin amo idia halasia ‘sisiba herevadia namodia be taunimanima idia durudia momokani.’ Ita diba unai magasin be mai anina bada bona ita ura taunimanima momo idia abidia. April bona May edia hua lalodiai, unai magasin rua bona buklet (Sikuli buklet lasi) do ita hariharilaidia.
2 Ruma-ta-ruma-ta gaukara dekenai be nega namo hereana unai magasin ita hariharilaidia totona. Taunimanima be nega bona gabu idaudia dekenai ita davaria bona lou-henia ita karaia neganai magasin ita hariharilaidia diba danu. Dala dekenai ita gini bona bisinesi gabudia dekenai ita lao danu be dala namodia magasin ita hariharilaidia totona.
3 Ita Kikilaia Diba Herevadia: April 1 Gima Kohorona magasin lalonai, ia kikilaia herevadia be “Tanobada Namona—Do Ia Vara Diba, A?” bona “Tanobada Namona—Ia Kahirakahira!” Unai be magasin idia karaia ena badina hegeregerena, Dirava ena Basileia ia harorolaia unai. Sivarai iharuana ena hereva ginigabedia lalonai, Keriso Iesu ese ena lohia siahuna henunai noho hanaihanai paradaiso gabuna do ia vara dalana ia hahedinaraia.—Luka 23:43.
4 April 15 Gima Kohorona magasin lalonai ia kikilaia herevana be “Hahekau Namona be Edeseniai Oi Davaria Diba?” May 1 bona May 15 magasin be unai hereva do idia habadaia, edia ladana be “Tomadiho ese Oi Ia Durua A?” bona “Dahaka Dainai Baibel Duahia?” Bema taunimanima idia laloa edia mauri be anina lasi reana idia dekenai kiki herevana ita hamatamaia haraga diba.
5 Ita Henia Magasin Ena Namba Habadaia Dalana: January 1, 1994, Gima Kohorona, rau 24-5 dekenai, ita henia magasin ena namba habadaia totona, heduru hereva hani idia gwauraia. Ita idia hagoadaia (1) magasin ita lalodia bada totona. Ita duahidia neganai, namona be iseda teritori dekenai idia noho taudia ita lalodia, ita gwau, ‘Inai hereva be daika ese do ia ura henia?’ Danu, bema hanaihanai ita dekenai magasin idia noho, ita hariharilaidia diba ita ida idia gaukara taudia dekenai, iseda dekena taudia dekenai, tisa dekenai, sikuli turadia dekenai, eiava sitoa dekenai idia lao taudia dekenai.
6 Ita idia hagoadaia (2) auka lasi dalana amo kiki herevana ita henia. Hereva namona ta ita abia hidi, bona hereva haida sibona amo ita gwauraia hedinarai. Bema ruma tauna ese magasin ia abia, unai magasin be unai tau eiava iena ruma bese taudia haida do ia “hereva” henia diba.
7 Heduru gauna namba (3) be hereva idauidau ita gwauraia diba. Namona be magasin edia hereva idauidau ita laloa hegaegae do ita kikilaidia diba totona, hegeregere, hereva ta be memero kekeni totona, ma ta be tatau totona, bona ma ta be hahine totona.
8 Ginigabena be, (4) namona be ita laloa guna magasin hida do ita hariharilaidia toho diba. Ena be kongregesen ese hida do ita hariharilaidia do ia gwauraia lasi, to ita ta ta ibounai be hida ita ura hariharilaia ita gwauraia diba. Reana unai ese ita ia hagoadaia magasin ita hariharilaia goadagoada totona. Bema magasin oda ita karaia, reana unai ese ita ia hagoadaia iseda magasin gaukara do ita habadaia totona.
9 Ita ura ma haida be Dirava ena Basileia do idia diba. Namona be magasin ita gaukaralaidia badina edia heduru be bada Basileia ena sivarai ita harorolaia totona.—Mat. 10:7.
[Questions]
1. Dahaka dainai ita gwau iseda magasin be mai anina bada?
2. Edena dala idauidau amo unai magasin ita hariharilaidia diba?
3. April 1 Gima Kohorona magasin lalonai, dahaka hereva namodia idia noho iseda haroro gaukara dekenai ita gaukaralaidia diba totona?
4. April 15, May 1, bona May 15 Gima Kohorona lalodiai, dahaka hereva namodia do idia noho iseda haroro gaukara dekenai ita gaukaralaidia diba totona?
5. Dahaka ese ia hahedinaraia magasin ita lalodia bada bona unai amo ita henia magasin ena namba ita habadaia?
6. Edena bamona iseda kiki herevana be auka lasi dalana amo ita herevalaia diba?
7. Magasin ita hariharilaidia neganai, dahaka dainai hereva idauidau ita gwauraia diba be gau badana?
8. Dahaka dainai ia namo bema ita ta ta ibounai ita laloa guna magasin hida do ita ura harharilaidia toho?