Magasin Hereadaedia Ita Hariharilaidia
1 Gima Kohorona idia karaia ena badina be “gau ibounai ena Atai Lohiana, Iehova Dirava, ena ladana abia isi totona.” Noga! magasin idia karaia ena badina be “ruma bese ibounai ia durudia diba. . . . Inai magasin ese taunimanima ia durudia, do idia diba momokani, gau ibounai ia karaia Diravana ese maino bona noho namo tanobada matamatana do ia karaia.” Unai hereva be magasin amo ai torea hanai. Unai magasin idia duahia taudia milion momo ese unai hereva idia badinaia dainai lalo-maino idia davaria.
2 April bona May edia hua lalodiai unai magasin rua be haroro gaukara dekenai do ita hariharilaidia. Unai gaukara dekenai do ita kwalimu totona, namona be magasin edia hereva do ita diba namonamo guna. Magasin matamata ta ta iboudiai do ita duahidia, bona hariharilaidia totona ita gaukaralaia diba sivarai ta ta ita lalodia. Taunimanima idia lalo-hekwarahilaia gaudia ita laloa. Iseda dekena taudia momo be hanua dekenai, o ruma bese lalonai dahaka hekwakwanai idia davaria, eiava idia ese dahaka kara dainai idia laloa momo? Namona be edia kudouna hamarerea bona edia lalona veria herevana ita hegaegaelaia bena do idia ura diba ma haida do idia abia.
3 April 1 Magasin Ena Hereva Gwauraia Bada: Taunimanima momo idia ura hekwakwanai lasi tanobada namona dekenai idia noho. Hari idia moale lasi badina hekwakwanai momo idia davaria.
Emu ladana oi hadibaia murinai, reana inai bamona oi hereva diba:
◼ “Lau ura hereva namona inai magasin dekena amo oi lau hadibaia, ena ladana be ‘Tanobada Namona—Do Ia Vara Diba, A?’ Ia gwau: ‘Inai tanobada, iseda tanobada, be noho gabu namona lasi. . . . Idia vara noho dika gaudia idauidau be momo.’ Sedira oi laloa dina vaira dekenai namo do ia vara lasi, ani? To, lau ura oi dekenai Salamo 37:11 ena hereva lau duahia, ia ese gabeai negana ia gwauraia.” Unai siri oi duahia murinai, ruma tauna oi nanadaia iena lalohadai unai gwauhamata herevana dekenai ia gwauraia hedinarai totona. Bema ia ura kiki noho, namona be magasin oi kehoa rau 4 dekenai bona sivarai ta ladana “Tanobada Namona—Ia Kahirakahira!” oi hahedinaraia. Oi gwau: “Baibel ena siri momo idia torea hedinarai, hari ita duahia Salamo 37:11 ena siri danu. Lau diba inai magasin ena sivarai oi duahidia neganai do oi moalelaidia bona ia torea siridia be oi sibomu emu Baibel dekenai oi davaridia diba. Lau ura oi abia, ta ena davana be 25 toea.”
4 April 15 Magasin Ena Hereva Gwauraia Bada: Rau 4 dekenai inai henanadai ia gwauraia: “Hahekau Namona be Edeseniai Oi Davaria Diba?”
Emu ladana oi hadibaia murinai, reana inai bamona oi hereva diba:
◼ “Hari inai tanobada lalonai hekwakwanai momo idia vara, hegeregere [hanua taudia idia lalohisihisilaia karana ta eiava niuspepa dekenai idia torea karana ta oi kikilaia]. Taunimanima momo idia laloa tau ta lasi ese hekwakwanai ia kokia diba. To moale gauna be inai, 2 Timoteo 3:16, 17 ese ita ia hadibaia Baibel be ita ia hakaua moale bona noho namona ena mauri ita abia totona.” Unai siri oi duahidia murinai, Gima Kohorona ese ita idia durua dalana bona Baibel be buka namona ita ia hakaua totona oi hahedinaraia.
5 Bema oi ura Noga! magasin oi hariharilaidia, namona be natudia ia kikilaia sivaraidia oi gaukaralaidia. Tama sina momo ese natudia idia dabu sivaraidia idia kamonai neganai edia kudoudia idia marere bona idia ura durudia diba dalana idia kamonai.
6 Iseda magasin be tanobada ena magasin iboudiai idia hereaia, bona iseda magasin bema ita lalodia bada, mai iseda goada danu ita ura taunimanima dekenai ita hariharilaidia, bena idia danu be Basileia ena helaro do idia abia bona guba bona tanobada edia Atai Herea Lohiabadana, Iehova, ena ladana hanamoa gaukarana do idia karaia diba.—Sal. 83:18.
[Questions]
1. Gima Kohorona bona Noga! magasin idia karaia ena badina be dahaka?
2. April bona May edia hua lalodiai magasin be edena bamona do ita hariharilaidia namonamo diba?
3. April 1 Gima Kohorona magasin hariharilaia neganai dahaka sivarai do ita kikilaia diba?
4. April 15 ena Gima Kohorona hariharilaia totona dahaka ita hereva diba?
5. Noga! magasin hariharilaidia neganai, dahaka sivarai ita kikilaia diba?