Hari mai Anina Basileia Sivaraina do Idia Halasia Tanobada Hegegemadai
1 Sunday, April 23 dekenai, taunimanima edia lalona do ia veria pablik tok badana, “Tomadiho Koikoi Ena Dokona ia Kahirakahira” do idia henia. Unai dina ena hebou dokona ai, mai ena rau hani lalona ia veria Basileia Sivaraina pepana do idia halasia. Pura toi April 24 ia lao May 14 lalonai, unai mai anina bada herevana nega korikori ai idia halasia, be tanobada hegegemadai lalonai do idia hariharilaia.
2 Tanobada ena kahana ibounai lalonai, taunimanima idia daradara. Herevana edeseniai idia noho, hekwakwanai idauidau ese idia hahisidia. Dahaka ia vara noho idia laloa namonamo taudia ese Basileia Sivaraina do idia laloa bada, badina Dirava ena Hereva, ia kerere diba lasi hakaua gauna, dekenai do ia hakaudia lao. (Sal. 119:105) Ita ibounai ita ura bada April 23 ai iseda Basileia Sivaraina do idia halasia neganai ta do ita abia. Ela bona unai nega, gau idauidau momo ita hegaegaelaia be namo, unai pura toi gaukarana totona.
3 Iboudiai Hagoadaia Idia Gaukara Goada Totona: Daika be unai gaukara ia karaia diba? Momokani, pablisa ibounai do idia ura dikadika idia karaia! Hanaihanai kongregesen heboudia idia lao henia Baibel stadi taudia do idia karaia diba, a? Haida be nega daudau lalonai ita danu idia hebou bona idia goada idia lao. Bema edia mauri dalana idia haidaua bona hari Baibel ena hakaua herevadia idia badinaia, Basileia harorolaia taudia ai idia lao totona idia hegeregere, a? Baibel stadi ia karaia pablisa tauna be stiuden danu haroro gaukara ia kikilaia murinai bema stiuden ia ura ia karaia, elda rua be ia ida Hesiai Gaukara Karaia Totona Ita Hegaegae bukana, rau 98 bona 99 do idia herevalaia. Namona be kara haraga idia karaia, bena bapatiso lasi pablisa ai idia lao totona idia hegeregere taudia be unai pepa halasia gaukarana idia karaia diba. Bapatiso lasi pablisa ai idia lao totona idia do hegeregere lasi taudia ita hagoadaia edia varavara o idia diba vadaeni taudia dekenai unai Basileia Sivaraina namona idia henia totona.—Gima Kohorona, May 1, 1989, rau 18 paragraf 8, itaia.
4 Inai gaukara be auka lasi; ita ibounai ese ita karaia diba. Ruma bese ena stadi lalonai, reana tama sina be ruma bese taudia ibounai danu Basileia Sivaraina hariharilaia daladia do idia tohoa, bena do idia hegaegae ruma ta ruma ta ai idia hahedinaraia totona. Nega momo, ita hereva daudau lasi be namo. Hamatamaia hereva haida sibona oi henia murinai, Basileia Sivaraina be ruma tauna dekenai oi henia, bona ia oi hagoadaia ia duahia. Ruma taudia idia ura idia kamonai neganai, ena ladana oi torea, bena oi giroa lou diba iena kamonai urana oi habadaia totona. (1 Kor. 3:6, 7) Do oi kwalimu dalana be emu hamatamaia hereva ia auka lasi bona oi hegaegaelaia namonamo.
5 April bona May lalonai, “gaukara do umui karaia goadagoada.” Ma hereva haida do ita abia vaira hua ena Iseda Basileia Gaukara lalonai, kahana ta ladana, “Lohiabada Ena Gaukara do Umui Karaia Goadagoada” dekenai.—1 Kor. 15:58.