“Peroveta Herevadia” Harorolaia
1 Ita noho negana ai, Apokalupo ena peroveta herevadia idia guguru noho. Taunimanima momo idia ura idia vara noho gari havaraia gaudia edia anina idia lalo-pararalaia. Apokalupo ena peroveta “hereva idia kamonai henia” amo, namo idia davaria diba. (Apok. 1:3) March lalonai, ita durudia diba Apokalupo Hagugurua Negana bukana ita hariharilaia neganai. Ita hariharilaia neganai namona be inai ita laloa: Apokalupo bukana lalonai taunimanima ese hari idia davaria hekwakwanaidia ia perovetalaia vadaeni. Vadaeni dahaka do ita gwau?
2 Reana inai bamona hereva do ia namo:
◼ “Iseda nega lalonai, tuari, doe, bona gorere ese taunimanima idia hahisidia bada. Dahaka dainai taunimanima edia diba be ia bada to unai gaudia idia vara noho? [Haere naria.] Baibel ese unai hekwakwanai ia perovetalaia idia dibaia neganai, momo idia hoa. Reana inai hereva, Apokalupo ena ‘hosi guia taudia hani,’ oi diba vadaeni. Baibel ese unai hosi guia taudia ia herevalaia; ia be hari tanobada lalonai idia vara gaudia amo ia guguru noho peroveta herevana. [Apokalupo Hagugurua Negana bukana, karoa 16, rau 91-7 edia laulau oi hahedinaraia.] Ena be unai peroveta hereva ese nega dikana ia perovetalaia, to helaro ia henia danu. [Paragraf 3 ai, Apokalupo 6:2 oi duahia.] Hosi kurokurona ia Guia Tauna be Iesu Keriso. Ita ia hadibaia ita gurigurilaia Basileiana amo, Iesu ese kara dika do ia hadarerea bona moale bona maino tanobadana do ia havaraia.” Buka hariharilaia toho, bona davana gwauraia.
3 Reana inai henanadai ese kiki namona do ia hamatamaia:
◼ “Dahaka oi laloa ese tanobada ena kara dika ia kokia diba? [Haere naria.] Taunimanima momo idia gwau namona be gau momo idia haidaua, tanobada ia dika lasi totona. Baibel ese ia hahedinaraia Dirava be iseda hekwakwanai hanamodia dalana ia diba bona ita do ia durua ia gwauhamatalaia vadaeni.” Apokalupo Hagugurua Negana bukana oi kehoa, rau 171 dekenai, bona paragraf 1 lalonai Apokalupo 11:15 oi duahia. Rau 302 bona 308 edia laulau amo, Keriso ena Basileia lohia siahuna amo hahenamo momo do idia vara oi hahedinaraia. Bena ruma tauna be edena bamona namo ia davaria diba oi herevalaia.
4 Reana do oi ura inai bamona hereva oi henia:
◼ “Baibel dekenai, Apokalupo bukana idia duahia taudia momo ese idia lalo-pararalaia lasi. Idia vara gau badadia idauidau ia herevalaia. Inai buka, Apokalupo—Ena Hagugurua Negana Ia Kahirakahira!, ese Apokalupo bukana ibounai, siri ta amo siri ta, ena anina ia herevalaia, bona ena peroveta herevadia idia guguru ena anina ita ta ta dekenai ia hahedinaraia.” Buka oi kehoa rau 15, paragraf 2, dekenai bona Apokalupo 1:1 oi hahedinaraia. Apokalupo ena siri ta ta ibounai ia herevalaia dalana be unai bamona dainai, unai heduru amo iena peroveta herevadia do ia lalo-pararalaia diba, oi gwauraia hedinarai. Buka oi hariharilaia toho.
5 Apokalupo ena sivarai be mai anina bada taunimanima ibounai dekenai. Ita ibounai ese ena peroveta herevadia ita kamonaia be gau badana. Inai mai anina bada sivaraina harorolaia totona do ita goada karaia.