Sivarai Namona Ita Harorolaia mai Eda Lalo-Haraga Ida
1 Keristani haroro gaukarana mai eda lalona ibounai ida ita karaia neganai, ita hahedinaraia Dirava ena Basileia gwauhamatadia ita laloa bada. Namona be unai gaukara do ita karaia mai eda lalo-haraga ida. Badina be dahaka? Badina be gaukara taudia be momo lasi, bona inai nega dikana ena dokona be kahirakahira, bona iseda teritori taudia edia mauri be reana do idia haboioa. (Esek. 3:19; Mat. 9:37, 38) Unai maduna metauna dainai, namona be haroro gaukarana do ita karaia mai eda goada ibounai ida. Edena bamona ita hahedinaraia diba iseda haroro gaukarana ita karaia mai eda lalo-haraga ida? Dalana be inai: Haroro hereva namodia ita hegaegaelaia guna, gabu idauidau iboudiai dekenai taunimanima ita tahua namonamo, kamonai taudia iboudiai edia sivarai ita torea maoro, ita lou henia haraga, edia kamonai karana habadaia totona, bona iseda haroro gaukarana ita laloa namonamo, badina be ita laloatao ia be hahemauri gaukarana. Sivarai namona February lalonai do ita harorolaia mai eda lalo-haraga idia totona ita hegaegae neganai, reana murina herevadia amo heduru do ita abia. Taunimanima dekenai do ita henia toho bukana be Apokalupo—Ena Hagugurua Negana Ia Kahirakahira!
2 Hereva hamatamaia totona, emu gabu dekenai idia noho taudia idia davaria hekwakwanai haida oi herevalaia be namo, bena oi gwau:
◼ “Taunimanima momo idia abia dae Dirava ia noho, to idia henanadai, idia gwau: ‘Ia ura nega vairai dahaka do ita davaria?’ Edena bamona do oi haerelaia? [Haere naria.] Dirava ena ura taunimanima dekenai bona hagugurua totona ia karaia noho karadia be Baibel ese ia gwauraia hedinarai goevagoeva—unai oi diba, a?” Apokalupo Hagugurua bukana kehoa rau 301 ai. Apokalupo 21:1 paragraf 1 lalonai duahia, bena ena anina herevadia paragraf 2 ena kahana gabena lalonai duahia. Bena rau 302 kehoa, bona unai ena anina iseda nega vaira lalonai be laulau amo hahedinaraia. Apokalupo 21:4 paragraf 6 lalonai duahia. Buka henia toho, hamaoroa ena davana be K4.00. Do oi lou henia bona unai do umui herevalaia lou negana namona be ia ida do umui gwauraia hidi.
3 Lou henia neganai, guna Apokalupo 21:1, 4 oi herevalaia herevadia dekenai inai hereva kwadogina oi atoa kau diba:
◼ “Guna oi lau vadivadi henia neganai, Dirava ena gwauhamata ita herevalaia; ia gwau taunimanima edia tanobada besena matamatana do ia hegaegaelaia. [Apokalupo Hagugurua bukana ena rau 302 ai ia noho laulauna do oi hahedinaraia lou.] Oi ura emu famili ese unai noho namona do idia moalelaia, a? [Haere naria.] Henanadai ta be, Dirava ena gwauhamata be momokani eiava? Ia sibona ena hereva be mani oi kamonaia.” Bena rau 303 ai, Apokalupo 21:5, 6a paragraf 8 lalonai duahia. Bena paragraf 9 ena henanadai rau 304 ai henia bena ena haere bona paragraf ena laini ginigabena danu duahia. Baibel stadi, davana lasi gauna, herevalaia, bona karaia dalana hahedinaraia negana gwauraia hidi.
4 Taunimanima edia hekwakwanai be idia momo idia lao dainai, momo be unai idia laloa momo; unai dainai ta be nega ginigunana ai oi vadivadi henia neganai, reana inai bamona oi hereva be namo:
◼ “Lau hedavari henia taudia kahirakahira iboudiai be iseda hanua lalonai ita davaria hekwakwanai idia laloa momo. Lagani momo lalonai politik taudia idia gwauhamata unai hekwakwanai do idia haoredia vaitani, bona idia haida be unai bamona idia karaia toho. Oi laloa iseda noho ia dika ia lao noho ena badina be dahaka? [Haere naria.] Unai ena badina, taunimanima momo ese nega ta idia laloa lasi gauna, be Baibel ese ia gwauraia. Apokalupo bukana ese tuari ta, guba lalonai ia vara gauna, ia gwauraia. Unai tuari dainai ia vara gauna be mani oi laloa; Apokalupo 12:9 ese inai bamona ia gwauraia.” Siri duahia, bena Apokalupo Hagugurua bukana ena rau 182 kehoa. Laulau gaukaralaia, Satani ese tanobada ai ia havaraia gaudia gwauraia totona. Buka henia toho, hamaoroa ena davana be K4.00. Lou henia bona Dirava ese taunimanima edia hekwakwanai do ia haoredia dalana do umui herevalaia dalana lailaia.
5 Bema oi gwauhamata do oi lou henia, Dirava ese hari inai nega ena hekwakwanai do ia haoredia dalana oi gwauraia totona, reana inai bamona oi hereva henia be namo:
◼ “Dala lau tahua goadagoada, inai bamona do lau lou mai, taunimanima edia hekwakwanai haoredia dalana korikorina ita herevalaia totona. Guna lau vadivadi neganai, ita itaia Baibel ese ia hahedinaraia Satani Diabolo ese tanobada taudia iboudiai ia koia noho. Ia be lauma ta bona ena siahu ese taunimanima edia ia hereaia; vadaeni oi laloa iena siahu kokia dalana ta ia noho, a? [Haere naria.] Baibel ena hereva be mani oi laloa.” Apokalupo 20:1-3 duahia bona ena anina gwauraia. Diba bukana ena rau 4-5 ai ia noho laulauna amo oi hahedinaraia Satani ena siahu do ia ore murinai nega namona do ia vara. Baibel stadi hamaorolaia, bona maoromaoro hamatamaia toho.
6 Taunimanima momo ese tanobada naria karana idia laloa momo dainai, reana herevahereva dalana be inai bamona oi hamatamaia:
◼ “Ai davaria vadaeni kahirakahira taunimanima iboudiai ese iseda hodahoda, ranu, bona aniani hadikaia karadia idia laloa momo. Tano haida dekenai unai gau idia hadikaia momokani dainai unai amo taunimanima edia mauri danu idia hadikaia. Dirava ese tanobada ia karaia, vadaeni oi laloa unai dika dainai edena bamona do ia kara? [Haere naria.] Baibel ia gwau Dirava ese ita do ia hahemaoro henia, tanobada ita gaukaralaia dalana dainai. [Apokalupo 11:18b duahia.] Tanobada hamiroa bona hadikaia karadia do idia ore murinai do ita noho dalana be mani oi laloa!” Hahedinaraia Dirava ese paradaiso ta ia gwauhamatalaia, Apokalupo 21:3, 4 ena hereva hegeregerena. Apokalupo Hagugurua bukana ena rau 302 ai ia noho laulauna hahedinaraia. Buka henia toho, hamaoroa davana be K4.00, bona lou henia dalana lailaia.
7 Paradaiso tanobadana herevana ia ura henia tauna lou henia neganai, reana inai bamona oi hereva:
◼ “Guna lau vadivadi neganai ia dekenai ita lalo-tamona gauna be inai: Tanobada hamiroa bona hadikaia karadia hadokoa totona, Dirava ese taunimanima edia kara haida do ia koua be namo. To henanadai ta be inai: Do ita roho mauri bena Dirava ese do ia karaia tanobada matamatana, kara maoromaoro sibona do ia noho gabuna, lalonai do ita vareai totona, edena bamona do ita kara be namo?” Ioane 17:3 duahia. Bena ruma tauna oi hamaoroa, bema ia ura neganai iseda Baibel stadi kosina, davana lasi gauna, ia abia be namo, inai diba hereana do ia abia totona.
8 Hari inai negai Keriso ese ita ia gaukaralaia, uma ena anina gogoa taudia bamona do ita gaukara bona haroro gaukarana, hahemauri gaukarana unai, do ita karaia. Unai be hahenamo badana ita dekenai! Namona be ita ibounai ese sivarai namona harorolaia gaukarana do ita goadalaia noho mai eda lalo-haraga ida, ‘badina be ita diba Lohiabada ena gaukara lalonai, iseda hekwarahi be hekwarahi kava lasi.’—1 Kor. 15:58.