Durudia “Hereva Idia Badinaia” Totona
1 Ta ese Apokalupo bukana ena peroveta herevadia ia “kamonai henia” sibona be hegeregere lasi. Namo bada ia davaria totona ena hereva ia “badinaia” be namo. (Apok. 1:3) Magasin bona buka idia abia be hadibaia taudia ai ita halaodia dalana ia kehoa sibona. Idia ura idia kamonai taudia ita davaria neganai, ita lou henidia haraga ma gau haida ita hadibadia totona. Ita lou henidia neganai dahaka do ita herevalaia?
2 Bema guna hosi guia taudia haniosi oi kikilaia, reana inai bamona do oi hereva:
◼ “Vanegai ita be Apokalupo bukana, bona hari tanobada ibounai ai, ena peroveta herevadia idia guguru dalana ita herevalaia. Apokalupo karoa 6 ese laulau dalana ai hosi guia taudia haniosi amo tanobada ai do ia vara dagedage bona hisihisi ia perovetalaia. Unai idia vara momokani badina iseda matana amo ita itaia. Edena nega ai unai hisihisi do idia ore bena maino tanobadana ai do ita mauri be momo ese idia daradaralaia noho. Oiemu lalohadai be dahaka? [Haere naria.] Iesu ena hahediba taudia be unai henanadai ena haere idia laloa bada.” Mataio 24:3 dekenai henanadai idia henia kahana oi duahia, bena Iesu ena haere Mt 24 siri 34 ai oi duahia. Bema ia kamonai namonamo, nega dokona ena kahana ma haida herevalaia.
3 Bema guna Dirava ena Basileia umui herevalaia, inai henanadai amo do oi hamatamaia lou diba:
◼ “Oi laloa edena bamona gavamani ese taunimanima edia ura ibounai do ia hagugurua diba? [Haere naria. Ieremia 10:23 duahia.] Ia hedinarai, Dirava ia gwau lasi taunimanima be sibona ena dala do ia abia hidi. Dirava ena heduru tahua lasi karana amo iseda hekwakwanai momo idia vara. Iseda ura do ia hagugurua gavamanina tamona be Dirava ena Basileia.” Herevalaia bukana oi kehoa rau 71 dekenai, bena hereva kwarana ginigabena ena siri oi herevalaidia. Dahaka dainai Dirava do ita abidadama henia momokani herevana amo, emu hereva oi habadaia.
4 Baibel umui kikilaia totona reana inai dala amo do oi hamatamaia:
◼ Apokalupo Hagugurua Negana bukana lalonai rau 302 ena laulau hahedinaraia, bena oi gwau: “Dirava ena ura guba ai ia vara hegeregerena be tanobada ai ia vara neganai, taunimanima ese inai bamona mauri do idia moalelaia. To, haida be dika do ia vara lou garina idia gari. Unai do ia vara lasi badina kara dika taudia ibounai be do idia ore.” Salamo 37:10, 11 duahia. Ita henia diba Baibel stadi dalana amo ena diba do ia habadaia oi herevalaia, ia abia dae totona.
5 Bema guna “Mauri mai Mainona Tanobada Matamatana Lalonai” pepapepana oi henia, vairanai ia noho laulau oi hahedinaraia murinai kwara maragi ladana “Mauri, Dirava ena Tanobada Matamatana Ai” henunai paragraf 1 oi duahia. Bena oi gwau:
◼ “Bema ita ura unai bamona tanobadana ai ita noho, mai anina bada gauna ta do ita karaia.” Paragraf dokona oi duahia, bena Apokalupo Hagugurua Negana bukana henia toho.
6 Iseda ura badana be Baibel stadi do ita hamatamaia dainai, lou henia namodia ita karaia be gau badana. Unai totona, nega ita atoa, bona ita hegaegae namonamo. Unai dala amo lalo-namo taudia do ita durudia momokani.—Apok. 22:6, 7