Ita Abia Vadaeni Gaudia Laloa Bada
1 “To Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” (Roma 5:8) Iehova Dirava bona ena Natuna ese ita totona idia henia boubou hereadaena ita laloa bada be maoro! Keriso ena rara amo mauri hanaihanai, taunimanima ta ese ia henia diba lasi gauna, ita abia diba.
2 Edena bamona ita hahedinaraia diba unai ita laloa bada? Diba korikorina, Dirava ena Hereva Helagana sibona lalonai idia davaria diba gauna, be taunimanima momo ese idia ura henia dikadika. Dirava ena ura be hereva momokanina idia dibaia. (1 Tim. 2:4) ‘Dirava ena Basileia ena sivarai namona ita harorolaia’ karana amo, ita hahedinaraia hereva momokanina ita laloa bada. (Luka 4:43) Mai eda ura bada ida unai gaukara ita karaia ese ia hahedinaraia, Iesu be ita dainai ia mase ita laloa bada. Danu, ena hahegani herevana, taunimanima be hahediba taudia ai do ita halaodia, ita badinaia dainai ita hahedinaraia ita ura Keriso ita tohotohoa. —Mat. 28:19, 20.
3 Ita karaia diba haroro daladia haida be dahaka? Nega haida, heduru painia gaukara ita karaia diba, a? Idia laloa namonamo murinai, reana haida be regula painia gaukara idia matamaia diba. Unai dala namodia ita abia hidi amo iseda nega Basileia ena sivarai namona halasia dekenai ita habadaia. Guna, reana oi ura karaia, to koua gaudia haida idia noho. Reana hari emu noho ia idau. Bema oibe, regula painia gaukara eiava nega ta ta ai heduru painia gaukara karaia be oi lalohadailaia namonamo vadaeni, a?
4 Idia vara gaudia ita itaia neganai iseda tanikiu hemamina ia bada herea. Tanobada hegegemadai ai dagedage, badu, bona hepapahuahu idia bada noho. Paulo ese ia hahedinaraia goevagoeva, iseda nega be “metau dikadia do idia vara” negana. (2 Tim. 3:1) Inai hisihisi havaraia gaudia huanai, ita dekenai be sivarai namona ia noho taunimanima ida ita kikilaia totona. Ita be mai eda magasin namo hereadia rua, Gima Kohorona bona Noga! Inai hua lalonai idia ta ta ita hariharilaia diba eiava sabskripsen do ita henia. Ita be mai eda buklet momo danu, hereva badadia idauidau idia herevalaia. Unai buka idauidau ese duahia taudia edia hemami ia hanamoa diba. Ita abia gaudia dainai, eda tanikiu hemamina ese iseda lalona do ia hamarerea bena mai eda ura bona hebogahisi ida haida dekenai do ita kikilaidia be namo.—Heb. 13:16.
5 Reana oi noho gabuna ai, taunimanima be lauma gaudia idia laloa momo lasi. To teritori haida idia idau, huahua namodia idia havaraia. Inai tano ena gabu ta dekenai bema heduru idia ura, unuseniai hesiai gaukara oi karaia diba bona oi heduru diba, a? Unai kahana dekenai emui sekit naria tauna ese heduru herevadia ia gwauraia diba.
6 Gau namodia momo herea dainai ita tanikiu. Iseda tanikiu Iehova dekenai ita hahedinaraia dalana namo hereana be iena ladana bona iena ura ma haida dekenai ita gwauraia hedinarai.—Isa. 12:4, 5.