Oiemu Tanikiu Karana Oi Hahedinaraia
1 Herevana ita be “metau dikadia momo” negana lalonai ita noho, to badina idauidau momo idia noho dainai Iehova ita tanikiu henia. (2 Tim. 3:1) Unai badina ibounai amo, hereadaena be ita totona ena Natuna, dava bada harihari gauna ia henia. (Ioa. 3:16) Danu, ena be tomadiho koikoi taudia idia hitolo noho, to ita be lauma aniani bada herea ita moalelaia noho. (Isa. 65:13) Ita be tanobada ibounai tadikaka oreana lalonai ita noho bona tomadiho momokani habadaia gaukarana namo hereana ita karaia be hahenamo badana. (Isa. 2:3, 4; 60:4-10, 22) Iehova ese hahenamo momo herea ita dekenai ia henia dainai, edena dala ai iseda tanikiu karana ita hahedinaraia diba?—Kol. 3:15, 17.
2 Mai Moale Bona Kudouna Ibounai Hesiai Gaukarana: Paulo ese tauanina gaudia henia karana ia herevalaia neganai, ia gwau: “Mai moale danu ia henia tauna be Dirava ese ia lalokau henia noho.” (2 Kor. 9:7) Dirava ita hesiai henia karana dekenai, unai hakaua herevana be mai anina bada danu. Hereva momokani ita laloa bada, iseda moale Keristani heboudia dekenai, iseda ura bada haroro gaukara dekenai, bona mai moale ida Dirava ena ura ita karaia neganai, iseda tanikiu karana ia hedinarai.—Sal. 107:21, 22; 119:14; 122:1; Roma 12:8, 11.
3 Idaunegai Israela dekenai, boubou karadia haida totona gau hida do idia henia be Taravatu ese ia gwauraia lasi. Dirava idia tomadiho henia taudia ta ta be ia abia “harihari gauna ta Lohiabada dekenai do ia henia,” unai amo iena tanikiu karana ia hahedinaraia diba. (Deu. 16:16, 17) Unai hegeregerena, hari inai negai, tanikiu karana ese ita do ia durua iseda noho dalana hegeregerena haroro bona hahediba taudia halaoa gaukarana ita karaia totona. Haida be gaukara amo idia laga-ani eiava sikuli holide negadia idia gaukaralaia edia haroro gaukara idia habadaia eiava heduru painia idia karaia totona. Emu haroro gaukara be unai bamona oi habadaia diba, a?
4 Tanikiu Karana amo Ita Honu Momokani: Guriguri be dala badana Iehova dekenai iseda tanikiu karana ita hahedinaraia totona. (1 Tes. 5:17, 18) Dirava ena Hereva ese ita ia hagoadaia ‘tanikiu karana lalonai abidadama amo ita honu momokani’ totona. (Kol. 2:7) Ita bisi bada eiava lalohisihisi neganai, namona be iseda dina ta ta guriguridia lalonai tanikiu herevadia danu ita gwauraia. (Fili. 4:6) Oibe, iseda haroro gaukara bona guriguri amo, ‘Dirava hanamoa henia kara ita habadaia noho’ be namo.—2 Kor. 9:12.