Unai be Guna Ita Kamonai Vadaeni, A?
1 Oibe, ita kamonai vadaeni! Ena taunimanima edia namo totona Iehova ese gau momo ena Hereva dekenai ia gwauraia loulou. Nega momo Iesu ese Basileia ena kahana idauidau ia hadibaia loulou danu. Ena aposetolo taudia ese hereva momokani dekenai idia gini goada taudia dekenai lauma gaudia be hanaihanai idia gwauraia loulou.—Roma 15:15; 2 Pet. 1:12, 13; 3:1, 2.
2 Hari iseda nega lalonai, Iehova ena orea ese mai anina bada herevadia idia hegaegaelaia kongregesen hebou dekenai ita gwauraia loulou totona. Buka bona buklet haida be ita stadilaia loulou vadaeni. Oibe, guna ita kamonai vadaeni gaudia ita kamonai lou be gau badana!
3 Gwauraia Lou Karana be Gau Badana: Iehova ena hadibaia herevadia ese iseda lalo-parara idia habadaia, iseda lalohadai idia hanamoa, bona idia hagoadaia, lauma dalanai ita raka goada noho totona. (Sal. 119:129) Dirava ena taravatu bona ena hakaua herevadia stadilaia lou karana be hegeregere hevarivari ita itaia bamona. Ita ia durua sibona eda kara ita tahua namonamo bona “kamonai kava” karana ia koua totona.—Iam. 1:22-25.
4 Bema hereva momokani ita stadilaia loulou lasi, gau ma haida ese iseda kudouna do idia veria. Dirava ena hadibaia herevadia ese ita idia hagoadaia Satani ena tanobada ena lalohadai dikadia ita dadaraia totona. (Sal. 119:2, 3, 99, 133; Fil. 3:1) Ita abia hanaihanai hadibaia herevadia Dirava ena palani hagugurua karadia dekenai, ese ita idia doria ‘ita naria namonamo’ totona. (Mar. 13:32-37) Baibel ena hereva momokani kamonai loulou karana ese ita ia durua mauri hanaihanai ena dala dekenai ita raka noho totona.—Sal. 119:144.
5 Ita Sibona ese Namo Ita Davaria Dalana: Ita ese ‘eda kudouna ita hamanadaia, vadaeni do ita ura Dirava ena taravatu do ita kamonai henia.’ (Sal. 119:36) Bema ita diba vadaeni herevana be kongregesen hebou dekenai do ita herevalaia, namona be ita hegaegae, idia torea hanai lasi siridia ita duahia, bona unai hereva ita badinaia diba dalana ita lalohadailaia. Ita laloa ia be anina lasi dainai, Haroro Sikuli ena henanadai ita reaia be namo lasi. (Luka 8:18) Nega momo hebou dekenai ita diba vadaeni hereva momokanidia ita herevalaia loulou dainai, ita hesiku lasi bona ita kamonai namonamo be namo.—Heb. 5:11.
6 Namona be salamo torea tauna ena lalohadai ita abia dae, ia gwau: “Oiemu hadibaia hereva edia dala lau moalelaia bada noho, to kohu bona moni dekenai lau moale bada lasi.” (Sal. 119:14) Oibe, unai dava bada gaudia be guna ita kamonai vadaeni, bona do ita kamonai lou. Dahaka dainai? Badina Iehova ia diba unai hadibaia hereva ita kamonai be namo!