Sibona Ita Henia mai Eda Ura Ida
1 Iehova ena taunimanima be sibodia idia henia “mai edia ura” ida; ena anina be karaharaga idia volantia. (Sal. 110:3) Unai peroveta herevana be hari ia guguru iseda tanobada hegegemadai tadikaka oreana lalonai. Haroro gaukara bona hahediba taudia halaoa gaukara sibona lasi, to dala momo idia noho, sibona ita henia diba mai eda ura ida ma haida durua totona.
2 Iseda Ura Ita Hahedinaraia Daladia: Reana haida kongregesen lalonai be heduru idia tahua hebou dekenai idia lao totona. Mai emu ura ida oi boiridia diba oi danu idia lao totona, a? Ma haida be reana idia gorere, idia buruka, eiava gorere badana dainai hospital dekenai idia noho. Idia do oi vadivadi henia diba eiava ma dala haida amo idia do oi durua diba, a? Reana hahegoada ia abia be namo tauna ta eiava ruma besena ta ia noho. Unai bamona taudia oi laloa bona nega haida emu ruma bese stadi dekenai oi boiridia, a? Painia ta eiava pablisa ta be reana haroro gaukara totona hebamo tauna ta ia tahua. Idia oi bamoa diba haroro gaukara lalonai? Unai dala haida amo, mai eda ura ida gaukara ita karaia diba iseda tadikaka bona taihu ita durua totona.—Gal. 6:10.
3 Iehova ena orea lalonai gaukara idia ura idia karaia tadikakadia ese unai ura idia hahedinaraia diba bema idia hekwarahi elda bona hesiai taudia edia taravatu badinaia totona. (1 Tim. 3:2-10, 12, 13; Tito 1:5-9) Idia hegeregere vadaeni tadikaka be momo lasi dainai, mai edia ura ida haroro gaukara bona hadibaia gaukara bona kongregesen naria gaukara idia gunalaia tadikaka ita abia be namo.—1 Tim. 3:1.
4 Reana ita haida be Iehova ena hesiai gaukara ita karaia kahana ita habadaia diba bema nega ta ta heduru painia ita karaia. Bona sedira iseda sediual ita haria namonamo neganai, reana heduru painia gaukara do ita karaia noho eiava regula painia ita hamatamaia diba. Iseda mauri dalana ia hegeregere dainai, ita lao diba heduru idia ura gabuna ta dekenai, a? Bema oi hegeregere, namona be sekit naria tauna danu oi kiki. Sibona ita henia diba Betele dekenai ita gaukara eiava Kingdom Hall konstraksen gaukara ita durua totona, a? Unai gaukara namodia idia karaia totona, sibodia idia henia taudia ai laloa bada, bona hahenamo momo idia abia vadaeni!—Luka 6:38.
5 Iehova be iena lauma helaga amo bona iena hesiai gaukara idia ura karaia taudia ida gaukara namo hereana ia hagugurua noho tanobada dekenai! Iehova be iena orea amo Basileia gaukara habadaia totona ita ia boiria neganai, namona be sibona ita henanadai, ‘Lau be sibona lau henia noho, mai egu ura bada ida?’ Iseda Dirava badinaia karana ese ita do ia doria iseda kudouna bona mauri dalana ita tahua namonamo bona gurigurilaia totona, bena hesiai gaukara helagana do ita karaia badabada bona Iehova ena kudouna do ita hamoalea bada!—Sep. 3:17.