Ma Haida Oi Durua Mauri Dekenai Idia Ia Hakaua Lao Dibana Idia Abia
1 Aposetolo Paulo ese ia hahedinaraia ‘Dirava ia ura taunimanima ibounai ese hereva momokani do idia diba.’ (1 Tim. 2:4) Ma haida ese unai diba idia abia totona, edena bamona idia ita durua? Dala ta be Diba ese Mauri Dekenai Ita Ia Hakaua Lao bukana ese edia lalona ia veria taudia ita lou henia. Unai buka ese Baibel ena hereva momokani be anina hahedinaraia herevadia, idia auka lasi bona idia abia hidi namonamo herevadia, amo ia herevalaia. Stadilaia karana amo, taunimanima idauidau be mauri dekenai ia hakaudia lao diba. Dahaka ita gwau diba, idia ita hagoadaia unai buka ita danu idia stadilaia totona?
2 Bema guna guriguri umui kikilaia, reana inai hereva amo stadi oi hamatamaia toho:
◼ “Lau laloa Diba ese Mauri Dekenai Ita Ia Hakaua Lao bukana amo ita ese guriguri ita kikilaia vadaeni herevadia be oi moalelaia. Guna lau gwauhamata do lau giroa bona oi danu inai hereva do ita kikilaia: Dirava dekenai idia guriguri taudia be edena bamona ia idia kamonai henia. Mani rau 158 ena hereva ta oi itaia. [Paragraf 18 duahia.] Unai dainai, Baibel ita stadilaia neganai, ita dekenai ia gwauraia herevadia ita kamonai. Unai amo Dirava kahirakahira do ita lao bona dina ta ta edia hekwakwanai ita gurigurilaia neganai, ita do ia durua. Do lau moale bada herea bema oi ura lau danu Baibel ita stadilaia hebou.” Bema ia ura, Diba bukana ena karoa ginigunana umui hamatamaia.
3 Bema guna maoromaoro Baibel stadi hamatamaia dalana oi tohoa, oi giroa neganai reana oi gwau:
◼ “Hari adorahi lau hekwarahi oi lau itaia lou totona, badina lau ura aiemai davana lasi Baibel stadi program lau herevalaia lou. Inai buka, Diba ese Mauri Dekenai Ita Ia Hakaua Lao bukana, ta be vanegai oi dekenai lau rakatania, inai be stadi lalonai ai gaukaralaia heduru bukana. Dirava ena Hereva laloa karana ai mani ita ia hagoadaia dalana oi itaia. [Rau 22, paragraf 23 duahia.] Mani emu kara, bema emu buka oi abia, reana guna ita hadokoa gabuna amo do ita hamatamaia.” Bema emu vadivadi negana ginigunana ai stadi oi hamatamaia lasi, reana oi gwau: “Reana hari be nega namona Baibel stadilaia dalana lau hahedinaraia totona.” Paragraf haida umui karaia murinai, edena nega ai do oi giroa ena stadi karaia totona oi gwauraia hedinarai.
4 Diba bukana ita gaukaralaia namonamo neganai, unai ese ita do ia durua, diba maoromaoro ita halasia bena ma haida edia namo do ia havaraia totona. (Aon. 15:7) Unai diba ese kudou namo taudia do ia hamoalea, bona idia do ia hagoadaia Iehova ena kara maoromaoro do idia badinaia, bona gabeai mauri dekenai idia do ia hakaua lao.