Dirava Momokani Dibaia ese Mauri Dekenai Ita Ia Hakaua Lao
1 Iesu be ena Tamana ia guriguri henia, ia gwau: “Mauri hanaihanai be inai: Idia ese oi Dirava momokani tamona do idia diba.” (Ioa. 17:3) Unai be ahuna namona! Diba ese Mauri Dekenai Ita Ia Hakaua Lao bukana amo ma haida ita durua diba mauri hanaihanai abia dalana do idia dibaia totona. Dahaka ita gwau diba, edia ura ita habadaia bena Diba bukana do idia abia dae bona do idia duahia?
2 Taunimanima momo idia ura guriguri idia kikilaia, reana inai henanadai amo unai oi kikilaia matamaia:
◼ “Hari iseda nega lalonai ita idia tohoa gaudia be momo, oi laloa guriguri ese ita ia durua diba, a? [Haere naria.] Taunimanima momo idia laloa Dirava dekenai idia guriguri neganai, ia kahirakahira idia lao bona goada idia abia, unai be Baibel ese gwauhamatalaia hegeregerena. [Diba bukana oi kehoa lao rau 156 ai, bona Filipi 4:6, 7 duahia.] To, reana nega haida ta ia laloa Dirava ese ena guriguri ia haerelaia lasi. Inai karoa ese ‘Dirava Kahirakahira Oi Lao Diba Dalana’ ia herevalaia. [Buka oi henia toho, davana be K1.50.] Danu, unai karoa ese ia hahedinaraia namona be Dirava ita kamonai henia, badina Dirava ese ita ia hereva henia danu. Ma nega ta unai do ita kikilaia.”
3 Oi ura maoromaoro stadi hamatamaia dalana oi kikilaia, a? Inai hamatamaia herevana oi tohoa:
◼ “Ai be davana lasi Baibel stadilaia kosina ta ai karaia noho. Guna unai bamona Baibel stadi kosi ta oi karaia, a? [Haere naria.] Lau ura aiemai stadi durua gauna lau hahedinaraia oi dekenai.” Diba bukana oi hahedinaraia, bena oi kehoa rau 3 dekenai, ruma tauna ese buka ena anina ia itaia totona, bena oi nanadaia: “Nega haida oi ese Baibel ena hereva unai gaudia dekenai oi ura oi tahua, a?” Ia ura kikilaia karoana dekenai oi kehoa, bena karoa ena kwara maragidia oi duahia. Oi hahedinaraia edena dala ai unai buka umui stadilaia diba. Stadi umui hamatamaia eiava lasi, to, buka oi hariharilaia, ena davana be K1.50 bona do oi lou henia negana umui abia hidi.
4 Hari iseda nega ai, taunimanima momo herea be Dirava momokanina ena hereva idia ura dibaia. (Isa. 2:2-4) Iseda maduna be ita durua diba taudia ibounai ita durudia Iehova do idia diba totona, bena unai diba ese mauri dekenai do ia hakaudia lao.—1 Tim. 2:4.