Hari Lauma Gauna Namona ta ai Ita Dabu Lasi!
1 Kahirakahira taunimanima ibounai idia ura dina ta ai do idia gwau diba, “Hari gau namona ta dekenai ai dabu lasi!” Edia lalohadai be unai dina do ia ginidae kohu momo idia abia neganai, bena ‘do idia laga-ani, do idia aniani, do idia inuinu, bona do idia moale.’ (Luka 12:19) To ita be idau, badina be hari lauma dalanai ita gwau diba gau namona ta ai ita dabu lasi. (Sal. 34:10) Edena bamona do ia vara diba?
2 Aonega Herevadia 10:22 ia gwau, Iehova ena “hanamoa sibona ese, kohu momo oi dekenai ia henia noho.” Dirava ena hahenamo ita mamia taudia be mai momokani ida ita gwau diba, “Dirava ese ita hamoalea totona, gau momo ita dekenai ia henia davana lasi.” (1 Tim. 6:17) Unai dainai tanobada taudia ibounai amo ita be taga taudia momokani!
3 Iseda Hahenamo Ita Duahia: Ita momo be taga lasi taudia. To, iseda hahenamo ta be dina ta ta ai iseda mauri gaudia ita lalo-hekwarahilaia bada lasi. Iehova ia diba dahaka gaudia ita abia be namo bona ia gwauhamata unai gaudia do ia henia. (Mat. 6:31-33) Iena gwauhamata ese ita dekenai lalo-maino ia havaraia bona unai be gau namo hereana ta.
4 To iseda lauma hahenamo ese unai idia hereaia. Iehova amo ita abia lauma aniani ese iseda mauri ia naria. (Mat. 4:4) Tanobada amo lauma gaudia idia tahua taudia idia hitolo, to ita aniani bona inuinu ela bona ita bogakunu. (Isa. 65:13) ‘Kamonai hesiai tauna’ ese mauri hanaihanai dekenai ita ia hakaua lao dibana, ita abia loulou dalana idia kehoa ita dekenai.—Mat. 24:45; Ioa. 17:3.
5 Iseda tanobada hegegemadai tadikaka oreana ese tanobada ena kahana iboudiai lalonai mai lalokau tadikaka bona taihu hebamo karana namona ia havaraia. (Ioa. 13:35) Iseda kongregesen be maino gabuna, ia lalonai heduru bona goada ita davaria. Elda taudia ese ita idia naria, iseda hekwakwanai idauidau hanaia totona ita idia durua. (Heb. 13:17) Iseda tadikaka kahirakahira ita noho neganai, do ita hagoadaia heheni bona ita do ia durua ita haheauka noho totona.—Roma 1:11, 12.
6 Iseda gaukara danu be hahenamo ta. Moni gaukara momo be taunimanima ese idia hesikulaia bona idia moalelaia lasi. Sivarai namona harorolaia gaukarana ese kamonai taudia bona ita ia hamoalea. (Kara 20:35) Iseda hekwarahi dekena amo ita abia hahenamo do ita moalelaia.—Had. 2:24.
7 Gau badana ita be mai iseda helaro namona nega vairai totona. (Roma 12:12, NW) Ita ese tanobada goevana mai kara maoromaoro ida ita naria noho, unuseniai mai iseda moale bona maino danu iseda lalokau taudia ida do ita noho ela bona hanaihanai! Unai helaro ena namo ese tanobada ena dava bada kohu ibounai edia namo ia hanaia vaitani.—1 Tim. 6:19.
8 Edena Bamona Do Ita Hahedinaraia Diba Unai Ita Laloa Bada? Iehova ena kara namo ita dekenai ena davana ita karaia diba lasi. To unai gaudia ita laloa bada dainai, (1) dina ta ta iboudiai iena hebogahisi dainai ia do ita tanikiu henia (Ef. 5:20), (2) iseda lalokau do ita hahedinaraia iena taravatu badinaia karana amo (1 Ioa. 5:3), (3) iena ladana do ita hahelagaia sivarai namona harorolaia gaukarana amo (Sal. 83:18), bona (4) Keristani kongregesen ida do ita gaukara hebou mai iseda kudouna ibounai ida.—1 Tim. 3:15.
9 Ita be mai iseda badina momo dainai, taunimanima iboudiai amo, ita be moale bada taudia. (Sal. 144:15b) Namona be iseda lalohadai, kara, bona hesiai gaukara amo lauma paradaisona lalonai ita abia moale ita hahedinaraia. Hari gau namona ta ai ita dabu lasi!