Iehova Ena Hanamoa Dainai Ita be Kohu Momo Taudia
1 Tau ta ese pura rua iboudiai pei bada ia abia dainai, momo idia gwau ia kwalimu. Unai dainai momo idia gwau taunimanima ibounai huanai moni bada taudia be moale bada bona mamina namo taudia. To, idia laloa moni dainai do moale bada taudia idia kerere momokani. (Had. 5:12) Tauanina dalanai “kohu momo idia ura henia taudia” ese ia noho daudau moalena idia abia diba lasi. (1 Tim. 6:9) To, Iehova ena hesiai taudia idia moale momokani bona tanobada taudia ibounai huanai idia be kohu momo taudia. (Aon. 10:22; Apok. 2:9) Edena dala ai?
2 Iseda Kohu Ia Hedinarai Daladia: Lauma dalanai diba bada ita abia bona Dirava ena Hereva, Baibel, ita lalo-pararalaia. Iehova ese ena tanobada oreana amo, iseda diba ia bona iena Natuna dekenai ia habadaia hanaihanai, bona unai amo ia noho daudau namo ita abia. Diba maoromaoro ita abia dainai, Iehova kahirakahira ita lao diba bona ia ida hetura karana namona ita moalelaia diba. (Iam. 4:8) Namo bona dika edia idau ita diba bona Dirava ena taravatu ita badinaia karadia ese gorere bona dika haida amo ita idia gimaia. Ita diba momokani Iehova ese ita do ia naria, bona unai dainai ia amo ia mai moale bona lalo-maino ita abia.—Mat. 6:33.
3 Lauma dalanai, tadikaka oreana lalonai ita noho hebou taudia ida maino bona lalo-tamona ita moalelaia, badina Dirava ena lauma ena huahua ita havaraia. Lalokau goadana ese iseda lalo-tamona ia havaraia dainai, ita diba momokani bema dika ta do ita davaria, Dirava bona iseda tadikaka ese ita do idia rakatania lasi.—Gal. 6:10.
4 Iseda mauri be mai anina bona mai ena badina korikorina. Ita laloa tanobada ibounai sivarai namona harorolaia gaukarana ita karaia diba be hahenamo badana ta. Hetura karana namona Dirava ida idia abia totona bona tomadiho goevana lalonai mai lalo-tamona ida hesiai gaukara ita danu idia karaia totona taunimanima ita durua neganai, ia noho daudau moalena do ita davaria. Iseda dava bada gauna, iseda hesiai gaukara unai, ese Iehova ia hanamoa bona ita moale badina unai gaukara amo Iehova ena ladana hahelagaia karana ita durua. Lalohadai namona ita dogoatao, badina ita diba iseda helaro vaira negana totona be nega daudau lasi lalonai do ia guguru.
5 Iseda Laloa Bada Karana Hahedinaraia: Namona be hanaihanai Iehova ena hanamoa ita laloa bada, badina ia dainai tanobada taudia ibounai huanai ita be kohu momo taudia. (Aon. 22:4) Ita abia gaudia be dina ta ta iboudiai ita lalohadailaia karana ese ita do ia veria Iehova ese mai hariharibada ida ia henia gaudia dainai ia do ita tanikiu henia bona ia sibona do ita badinaia.