Hereva Momokani Umui Gwauraia Noho
1 Aposetolo taudia idia gwau: “Ai itaia bona ai kamonai gaudia ai hunia diba lasi, aiemai uduna ai koua diba lasi.” (Kara 4:20) Hari ita danu be hereva momokani ita gwauraia noho be gau badana. Ena be Gima Kohorona bona Noga! ita hariharilaia gaukarana amo kamonai taudia ita davaria, to hereva momokani be idia ura taudia dekenai ita hadibaia totona, gau badana be ita lou henidia.
2 Bema April-June ena spesel “Noga!” ena sinado be “Tuari be Lasi Vaitani Negana” oi hariharilaia vadaeni, Baibel stadi dalana oi hahedinaraia totona, inai bamona oi nanadaia diba:
◼ “Vanegai, ita ese tanobada edia tuari bona tomadiho oreadia edia kara unai tuari durua totona ita herevalaia. Oi itaia vadaeni, unai bamona gaudia ese idia hamomokania Baibel ia gwauraia dina gabedia ai ita noho, a? [Diba bukana hahedinaraia. Karoa 11 ena paragraf ginigunana duahia, bona rau 102 ena maua herevalaia.] Inai buka ese unai hereva bona hereva ma haida 18, anina ena lista ai idia torea herevadia, ia hadibaia. [Rau 3 hahedinaraia.] Bema ia hegeregere, lau ura lau hahedinaraia inai buka ese edena bamona oi ia durua diba bena mai anina bada Baibel herevadia do oi lalo-pararalaia.” Bema ia namo, oi hamaoroa K1.50 amo kopi ta ia abia diba bena rau 6 dekena amo stadi oi hamatamaia.
3 “Tanobada Ena Tomadiho Do Ia Doko Ena Badina” oi herevalaia taudia dekenai, oi lou henia neganai reana inai bamona do oi gwau:
◼ “Unai hereva oi duahia murinai, reana oi laloa bada gauna be tomadiho iboudiai be dala tamona ai ita lalohadailaia diba lasi. Tomadiho momokanina bona tomadiho koikoina ruaosi idia noho. Unai dainai inai henanadai ia vara, Daidia edia tomadiho be Dirava ese ia abia dae? Iesu ese haere ia henia, bona inai buka ese ia hahedinaraia.” Diba bukana ena karoa 5 dekenai oi kehoa, paragraf 4, bona Ioane 4:23, 24 danu, oi duahia. Bena oi nanadaia, “Oi be davana lasi Baibel stadi oi ura abia, a?” Bema ia ura bona buka be K1.50 amo ia abia, karoa 1 oi kehoa bona stadi oi hamatamaia.
4 Lou henia neganai, maoromaoro stadi karana oi hahedinaraia diba bema oi gwau:
◼ “Baibel ena hereva be gabu iboudiai dekenai idia noho taudia dekenai ai hadibaia totona, emai magasin rua be tanobada hegegemadai ai hariharilaia. Bema taunimanima be idia duahia gaudia idia ura henia neganai, davana lasi Baibel stadi ai karaia. [Gima Kohorona ena dokona rau dekenai ia noho “Oi Ura Ta Ia Vadivadi Oi Dekenai?” mauana oi herevalaia.] Diba ese Mauri Dekenai Ita Ia Hakaua Lao bukana ai gaukaralaia, heduru totona. Oiemu kopi be K1.50 amo oi abia diba. Mani nega sisina lalonai stadi be edena bamona ai karaia lau hahedinaraia.”
5 Bema hereva momokani ita gwauraia noho, haida do idia kamonai bona hereva momokani do idia abia dae.—Mar. 4:20.