Manoka Taudia Oi Durua Do Idia Goada Lou Totona
1 Aposetolo Paulo ia itaia ena Keristani bamodia ese lauma dalanai dika idia davaria diba dainai, inai hereva ia torea: “Mahuta dekena amo do ita toreisi negana be ia ginidae vadaeni. Badina be Lohiabada ena mai dinana be kahirakahira. Badina be ita abidadama henia hamatamaia nega dekenai iseda hamauria be do daudau, to harihari iseda hamauria be ia kahirakahira vadaeni.” (Roma 13:11) Paulo ese lauma dalanai idia mahuta tadikaka ia lalodia bada; ia ura idia ia hagoadaia edia gaukara do idia hamatamaia lou totona.
2 Momokani ita gwau diba inai tanobada gunana ena hanuaboi ia ore gwauraia bona tanobada matamatana ena dabarere ia kahirakahira vadaeni. (Roma 13:12) Badina namona dainai hari ita ida sivarai namona idia harorolaia lasi tadikaka ita lalodia bada be namo. Manoka taudia be Iehova do idia hesiai henia lou totona, edena bamona ita durudia diba?
3 Elda Taudia Idia Karaia Diba Gaudia: Manoka taudia momo be hereva momokani idia rakatania lasi; to lalo-manoka, hekwakwanai, kohu ura henia bada karana, eiava mauri ena laloa metau gaudia ma haida dainai, haroro gaukara idia hadokoa. (Luka 21:34-36) Bema mai dalana, idia do manoka lasi neganai heduru ita henia. Namona be kongregesen seketere ese Kongregesen Buka Stadi naria tauna ia hamaoroa, pablisa ta ese hua ta ta ai haroro ia ripotilaia lasi neganai. Dala idia karaia idia hagoadaia totona. Idia ese unai hekwakwanai ena badina bona edena dala ai heduru idia henia idia tahua be namo.—September 15, 1993, Gima Kohorona, rau 20-3 itaia.
4 Haida ese Idia Durua Diba Daladia: Ita momo be manoka tauna ta ita diba. Reana guna ia be iseda turana momokanina ta. Edena dala amo do ita durua diba? Reana ita vadivadi henia be namo. Oi hamaoroa iena hebamo oi laloa bada. Namona be oi moale bona gau namodia oi herevalaia. Oi hahedinaraia ia oi laloa momo to lauma dalanai ia gorere lalohadaina oi hahedinaraia lasi. Kongregesen lalonai idia vara ekspiriens namodia eiava umui karaia gau namodia ma haida oi herevalaia. Mai moale ida Distrik Hebouhebou oi herevalaia, bona oi hagoadaia do ia mai totona. Reana kongregesen taudia ia bamoa lou karana ese do ia durua bada. Oi hamaoroa ia ida hebou dekenai oi lao diba. Iena lalohadai be elda taudia do oi hadibaia.
5 Manoka tauna be hebou dekenai ia mai lou neganai, reana ia hemarai sisina guna ia diba taudia ia davaria neganai. Oi nanadaia lasi: “Nega daudau oi be edeseni oi noho?” To idau, namona be mamina ia abia oi moale ia mai dainai. Ia danu oi herevahereva. Ia diba lasi taudia be ia dekenai oi hadibaia. Hebou neganai ia ida oi helai, namona be oi itaia ia be mai ena ane buka bona ma stadi buka danu. Oi hagoadaia do ia giroa mai lou, bona bema ia ura heduru neganai, oi durua.
6 Iehova bona Iesu ese manoka taudia idia laloa bada, bona idia moale bada lauma dalanai idia goada lou neganai. (Mal. 3:7; Mat. 18:12-14) Ita be unai moale ita mamia diba bema haida ita durua Iehova idia hesiai henia lou totona.