Henanadai Mauana

◼ Kongregesen Hesiai Komiti tauna ta ena hereva dainai, ia haroro lasi tadikaka o taihu ta dekenai Baibel stadi do ita karaia diba, a?

Elda taudia edia maduna be kongregesen taudia idia naria, bona idia haroro lasi taudia idia naria danu. Idia ese unai taudia idia vadivadi henia bona do idia itaia edena heduru idia abia be namo. Nega haida, reana heduru henia dalana be Baibel stadi. Hesiai Gaukara Karaia Totona Ita Hegaegae bukana, rau 103, ia hahedinaraia Kongregesen Hesiai Komiti ese do idia laloa daika be stadi amo heduru do ia abia.

Haroro naria tauna ese do ia laloa daika ese heduru namona ia henia diba, dahaka gaudia idia stadilaia be namo, bona edena buka ese ia durua bada. Reana guna stadi ia henia tauna, eiava manoka tauna ia diba bona ia ese ia matauraia tadikaka o taihu ta ese ia durua be namo. Reana lo taihu namona ta idia noia, ia haroro lasi taihuna do ia durua totona. Ma pablisa ta ese stadi hakaua pablisa do ia bamoa be anina lasi. Idia abia hidi pablisa ese stadi negana, lou henia, bona stadi ia ripotilaia diba.​—December 1987 Iseda Basileia Gaukara pepana, rau 4-5 itaia.

Stadi ia abia tauna be bapatiso tauna dainai, do idia stadi daudau lasi. Ita ura ia haroro lasi tadikaka o taihu be kongregesen hebou iboudiai do ia lao henia bona sivarai namona do ia harorolaia hanaihanai. Haroro naria tauna ese unai stadi edia heau dalana ia naria. Namona be unai lalokau heduruna dainai, unai tadikaka bona taihu ese Iehova vairanai sibona edia maduna idia huaia diba bona hereva momokani lalonai do idia “gini goada, ramu ese au badana ia dogoatao, ia gini goada bamona.”​—Ef. 3:​17; Gal. 6:5.