Dala Harorona Karaia Namonamo
1. Edena dala ai Iesu ita tohotoho diba?
1 Iesu be haroro gaukara ia karaia neganai, dala ai bona ma gabu idauidau ai taunimanima ia hereva henidia. (Luka 9:57-61; Ioa. 4:7) Ia ura mai anina bada sivaraina be taunimanima momo dekenai ia herevalaia. Hari inai negai, dala harorona be dala namona ta taunimanima ita durua Dirava ena aonega idia abia totona. (Aon. 1:20) Bema ita laloa namonamo bona taunimanima ita hereva henia, eda gaukara ena anina namona do ita abia.
2. Dala harorona ai taunimanima be edena bamona ita kara henidia?
2 Kara Haida Ita Karaia: Namona be taunimanima dekenai ita lao bona ita hereva henidia, to namo lasi gabu tamona dekenai ita helai o ita gini bena raka hanaia taudia be ita dekenai do idia mai. Kiri toana ita hahedinaraia bona hemataurai dalanai ita hereva. Bema pablisa ma haida ida ita gaukara hebou, ita ta ta sibona ese taunimanima ita hereva henia be namo. Danu, namona be dala ita karaia kamonai taudia ita lou henia totona. Bema hegeregere, iseda herevahereva murinai, ita henanadai diba edena dala ai ia do ita hereva henia lou. Pablisa haida be gabu tamona dekenai dala harorona idia karaia loulou, unai amo guna idia davaria taudia idia hereva henia lou, edia ura habadaia totona.
3. Dala harorona ai edena dala ai aonega ita gaukaralaia be namo?
3 Laloa Namonamo: Namona be do ita gini gabuna bona do ita hereva henia tauna ita laloa namonamo guna. Idia raka hanaia taudia ibounai ita hereva henia toho lasi, to ita itaia namonamo. Hegeregere, bema ta ia raka haraga reana ia do ita hereva henia lasi be namo. Bisinesi gabuna ta vairanai ita haroro neganai, namona be ita aonega unai amo bisinesi biaguna do ia laloa momo lasi. Taunimanima be bisinesi gabudia amo idia raka-lasi neganai ita haroro henidia diba, to namo lasi idia vareai gwauraia neganai ita haroro henidia. Taunimanima be hahoaia o hagaria dalanai ita hereva henia be namo lasi. Danu, magasin o buka ita hariharilaia neganai, ita laloa namonamo be namo. Bema ta be ita herevalaia gauna ia laloa bada lasi, reana magasin do ita henia lasi, to pepapepa ita henia.
4. Dahaka dainai dala harorona be mai ena namo bona ita moalelaia diba?
4 Dala harorona ese ita ia durua, nega kwadogina lalonai hereva momokani ena uhe momo ita hadoa totona. (Had. 11:6) Ruma-ta-ruma-ta gaukara ai ita davaria lasi taudia haida be dala harorona ai ita davaria. Dala harorona totona palani ita karaia be namo, unai be haroro dala namona ta bona ia amo moale ita davaria diba.