Oiemu Magasin Hariharilaia Herevana Oi Hegaegaelaia
1 Ita ese Gima Kohorona bona Awake! magasin ita laloa bada, edia hereva namodia dainai. Idia ese gau momo idia herevalaia, tanobada ena henanadai badadia amo ela bona “Dirava ena laloa dobu gaudia” dekenai. (1 Kor. 2:10) Ita ibounai ese unai magasin amo ita duahia matamata gaudia bona lalona hagoadaia gaudia ita laloatao diba; Iehova ese ia gaukaralaidia hereva momokani ia hahedinaraia totona. (Aon. 4:18) Ita ura mai goada ida gabu ibounai dekenai do ita hariharilaia.
2 Oiemu Teritori Oi Lalohadailaia: Edena bamona taudia idia noho oiemu teritori dekenai? Bema idia bisi bada, reana hereva kwadogina ta bona hanamoa herevana oi hegaegaelaia. Bema oiemu teritori dekenai idia bisi bada lasi, reana oiemu hereva oi habadaia diba. Bema ruma taudia momo be dina ai idia gaukara, reana anina do ia vara bema adorahi kahanai edia ruma oi vadivadi henia. Haida oi davaria diba dala dekenai eiava sitoa ta sitoa ta dekenai oi haroro neganai. Pablisa haida be anina namona idia abia nega idaudia ai motuka atoa gabudia bona taoni edia loaloa uma gabudia dekenai taunimanima idia hereva henia dainai.
3 Magasin Oi Dibaia Namonamo: Magasin oi abia murinai maoromaoro do oi duahia be namo. Oiemu teritori dekenai idia noho taudia idia ura herevana oi abia hidi. Edena gaudia idia laloa bada? Oi gaukaralaia herevana ena kahana ta oi abia hidi do oi gwauraia totona. Edia lalona veria totona do oi gwauraia henanadai ta oi laloa. Baibel siri namona ta oi abia hidi ruma tauna dekenai do oi duahia totona, bema oi itaia ia hegeregere. Sabskripsen oi hariharilaia. Gabeai oi lou henia totona dahaka do oi gwauraia oi laloa.
4 Oiemu Hamatamaia Herevadia Hegaegaelaia: Oi idia diba totona bona herevahereva oi hamatamaia totona do oi gaukaralaia herevadia oi abia hidi namonamo. Haida be anina idia abia inai hamatamaia herevana idia gaukaralaia dainai: “Inai magasin lalonai ia noho hereva namona lau duahia, bona lau ura ma haida dekenai lau hahedinaraia.” Momo be idia hegaegaelaia herevana ia hahedinaraia henanadaina ta amo idia hamatamaia. Haheitalai be inai:
5 Bema dagedage bada herevana do oi hahedinaraia, reana inai bamona oi nanadaia:
◼ “Edena dala amo hanuaboi dekenai ita mahuta namonamo bona ta ese eda kohu ia henaoa eiava ita ia hadikaia garina ita gari lasi?” Oi hadibaia unai hekwakwanai do ia hanamoa gauna oi diba. Daudau lasi murinai unai hanamoa gauna ese taunimanima edia hekwakwanai iboudiai do ia kokia danu. Magasin lalonai unai helaro ia hahedinaraia gauna ta oi gwauraia. Oi lou henia neganai, ruma tauna ena lalona oi veria Diba bukana ena karoa 1 dekenai.
6 Ruma bese maurina ia gwauraia herevana oi hariharilaia neganai, reana inai bamona oi gwau:
◼ “Tama sina momo idia davaria hari inai negai ruma bese idia naria be auka. Buka momo be unai gauna idia herevalaia, to diba momo taudia danu be idia lalo-tamona lasi. Tau ta ese heduru namona ia henia diba, a?” Magasin ena hereva ta, Baibel amo ita abia sisiba namona ia hahedinaraia herevana, oi gwauraia. Oi lou henia neganai, Diba bukana ena rau 145-8 dekenai Baibel ena lalohadai natudia naria karana dekenai oi herevalaia.
7 Mauri ena hekwakwanai herevana ta oi herevalaia neganai, reana inai bamona oi gwau:
◼ “Taunimanima momo idia lalo-hekwarahi badina ita noho negana be mai ena metau gaudia momo. Oi laloa Dirava ia ura iseda mauri be inai bamona, a?” Hari nega ena hekwakwanai haheaukalaia dalana ia gwauraia herevana ta eiava vaira ai lalo-hekwarahi lasi negana ia laloa diba ena badina ia gwauraia herevana ta oi hahedinaraia. Gabeai oi vadivadi neganai, Diba bukana ena rau 4-5 dekenai ia noho laulau bona hereva oi gwauraia, bona maoromaoro Baibel stadi oi hamatamaia.
8 Ruma Tauna Ena Toana Hegeregerena Oiemu Hereva Oi Haidaua: Do oi davaria taudia edia ura gaudia bona edia mauri dalana be idauidau. Haroro herevana oi hegaegaelaia gabeai ruma taudia edia toana hegeregerena oi haidaua diba dalanai. Oi laloa guna edena dala ai oiemu hereva do oi haidaua tau, hahine, buruka tauna, eiava matamata tauna oi hereva henia neganai. Taravatu aukadia idia noho lasi dahaka do oi gwauraia diba idia koua totona. Oi gwauraia be auka lasi bona anina ia havaraia herevana oi gaukaralaia. To, namona be mai emu goada ida oi gwauraia, emu kudouna amo oi hereva, bona oi kamonai namonamo. ‘Kamonai taudia’ ese oiemu lalo-momokani idia itaia bona do idia abia dae.—Kara 13:48.
9 Durua Heheni: Ta ta dekenai lalohadai ita gwauraia karana amo lalohadai herevalaia daladia matamatadia ita diba. Ma haida ida iseda haroro herevadia ita karaia loulou karana amo ita manada bona gari lasi mamina ita abia. (Aon. 27:17) Bema do oi gwauraia herevana oi gwauraia loulou, iduara dekenai do oi gari lasi. Gau badana be tama sina ese nega idia atoa edia natudia idia hegaegae neganai idia durua totona, edia hereva idia tohoa neganai idia kamonai bona hanamoa daladia haida idia gwauraia. Pablisa matamata be namo do idia davaria bema lo pablisa ida idia gaukara hebou.
10 Oiemu magasin hariharilaia herevana oi hegaegaelaia be auka lasi. Ena anina be do oi gwauraia gauna oi laloa guna bena taunimanima idia ura kamonaia dalana ai do oi gwauraia. Lalo-goada bona laloa namonamo karana amo taunimanima ese do idia abia dae haroro hereva namona do oi karaia diba.
11 Magasin hariharilaia gaukarana be Basileia sivarai harorolaia dalana badana ta. Bema Gima Kohorona bona Awake! be kudou maoro taudia dekenai oi henia, idia sibona ese magasin edia namo do idia duahia. Nega ibounai edia namo oi laloatao bona edia hereva ese haida ia hamauria diba oi laloaboio lasi. Unai bamona ‘kara namodia’ be Iehova ese ia moalelaia bada herea.—Heb. 13:16.