Haroro Sikuli Lalonai Oi Vareai
1 Iehova ena Witness taudia milioni momo be sivarai namona harorolaia taudia ai idia lao lalonai, Haroro Sikuli ena anina be bada. Ita momo ita laloatao unai sikuli dekenai ita vareai neganai, ita gari bona iseda mamina be ita hegeregere lasi, bona hari mai moale ida ita abia dae ia dainai lauma dalanai ita tubu lalonai Dirava ena Hereva herevalaia bona hadibaia taudia ai ita lao. (Kara 4:13 itaia.) Unai sikuli namona lalonai oi vareai vadaeni, a?
2 Daika ia vareai diba? Hesiai Gaukara Karaia Totona Ita Hegaegae bukana ena rau 73 ese haere ia henia: “Kongregesen danu idia gaukara hebou matamata taudia be unai school lalonai idia vareai diba. Hebou dekenai idia mai taudia danu be school dekenai idia vareai diba, to gau tamona, idia vareai lasi ela bona Keristen ena dala maorona ai idia raka.” Unai dala maorona be rau 98-9 ai idia hedinarai. Idia hegeregere taudia ibounai—tatau, hahine, bona natudia—ai boiria sikuli naria tauna dekenai idia lao bona sikuli lalonai do idia vareai.
3 Lagani 1997 Sikuli Ena Sediual: Lagani 1997 ena haroro sikuli ena sediual ese Baibel ena hahediba herevadia, Baibel ese ia gwauraia taudia momo, bona orea ena sivarai ia herevalaia. Iseda hereva bona hadibaia daladia ia hanamoa sibona lasi, to pura ta ta ibounai kahana iboudiai lalonai idia noho lauma gaudia namodia amo diba ita abia. (Aon. 9:9) Bema sikuli totona ita hegaegae, hegeregere pura ta ta ena Baibel duahiduahi ita karaia, bona pura ta ta ai hebou dekenai ita lao, ita ese unai program amo lauma hahenamo bada do ita abia.
4 Lagani 1997 lalonai, Hereva Namba 2 ena Baibel duahiduahi be sisina kwadogi, lagani gunadia bamona lasi. Stiuden be unai hereva totona ia hegaegae neganai, namona be ena duahiduahi ena lata ia tohoa namonamo bena ia itaia ena miniti ima amo miniti hida be hamatamaia herevadia bona koua herevadia totona ia atoa diba. Unai amo stiuden ese ena nega ia gaukaralaia namonamo bona ena duahiduahi bona nout haida amo ia hereva dalana ia hanamoa diba.—1 Tim. 4:13.
5 Hereva Namba 3 be Diba bukana amo idia karaia neganai, nega bona gabu idauidau haroro dalana idia tohoa diba. Unai hegeregerena, taihu ta ese unai hereva ia henia neganai lou henia, Baibel stadi, eiava nega bona gabu idauidau haroro gaukara bamona ia karaia diba. To momokani, karaia dalana be gau badana lasi, to hadibaia dalana be gau badana.
6 Herevana oi ese hereva namba 1, Baibel ena hereva badadia, eiava stiuden edia hereva ta do oi henia, oi hahedinaraia diba Hesiai Sikuli oi laloa bada, bema oiemu hereva oi hegaegaelaia bona tohoa namonamo, mai momokani bona mai goada ida do oi henia, emu nega oi hanaia lasi, sikuli naria tauna ena sisiba oi kamonai bona oi badinaia, bona bema nega ibounai oi dekenai idia henia herevana do oi karaia. Unai amo sikuli dekenai oi vareai be hahenamo oi dekenai bona emu hereva idia kamonai taudia dekenai.