‘Oiemu Ruma Bese Haginia Goada’
1 Ita diba momokani, tanobada hegegemadai bese idauidau ai, ruma bese maurina ia dika ia lao noho. Satani ena tanobada be koikoi karadia bona lebulebu karadia amo ia honu. (1 Ioa. 5:19) Unai dainai gau badana be ‘iseda ruma bese ita haginia goada’ bona ma haida ita durua unai do idia karaia totona.—Aon. 24:3, 27, NW.
2 Baibel Ena Hakaua Herevadia ese Ita Idia Naria: Ruma bese ena moale korikorina be Baibel ena hakaua herevadia badinaia karana amo ia vara. Unai hereva momokani mai edia siahu ese ruma bese taudia ta ta mauri dala idauidau dekenai idia durua. Unai hereva idia badinaia ruma bese be do idia moale bona Dirava amo ia mai mainona do idia moalelaia.—Isaia 32:17, 18 itaia.
3 Iseda ruma bese haginia goada totona ita idia durua hakaua herevadia be hereva kwadogidia ai buka ladana Emu Ruma Bese Hamoalea Dalana lalonai idia torea. Unai buka ena karoa ta ta ese hakaua herevadia idia hahedinaraia, bona ruma bese taudia be unai idia laloatao be namo. Idia ta ta ese Dirava ena lalohadai idia hahedinaraia, unai amo idia herevalaia gaudia dekenai iena lalohadai do ita lalo-pararalaia.—Isa. 48:17.
4 Ruma Bese bukana be lagani 1983 ai Hiri Motu gado dekenai idia halasia murinai, ita momo ese ita duahia bona ita stadilaia vadaeni. To hekwakwanai idia vara neganai, idia durua hakaua herevadia be ita davaria haraga diba, a? Buka ese inai gaudia ia herevalaia: ta ese dahaka ia laloa be namo headava ia lalohadailaia neganai (karoa 2), edena gaudia ese noho daudau headava moalena idia habadaia (karoa 3), headava lalonai lalokau ia tubu diba dalana (karoa 6), tama sina be lalokau dalanai natudia idia matahakani henia dalana (karoa 10), ta ia buruka ia lao lalonai mauri ia moalelaia diba dalana (karoa 13), bona ruma bese taudia ese mauri hanaihanai idia abia dalana (karoa 14).
5 Buka Oi Gaukaralaia Namonamo: Bema nega ta ruma bese ida Ruma Bese bukana umui do stadilaia hebou lasi, eiava guna umui karaia bona nega daudau ia hanaia vadaeni, reana hari umui karaia diba. Danu, emu ruma bese ese hekwarahi eiava hahetoho matamatadia ia davaria neganai, unai idia herevalaia karoadia do umui duahia, bona mai guriguri ida badinaia dalana umui tahua. Ma danu, March lalonai, nega bada be haroro gaukara dekenai do oi atoa, taunimanima momo dekenai Emu Ruma Bese Hamoalea Dalana bukana do oi hariharilaia totona.
6 Dirava idia badinaia ruma besedia be lauma dalanai do idia goada bona idia lalo-tamona bona idia hegaegae namonamo Satani ia havaraia hahetoho lalonai idia gini goada totona. (1 Tim. 4:7, 8; 1 Pet. 5:8, 9) Ita tanikiu bada badina ruma bese ia Havaraia Tauna ese ita ia hadibaia dainai!