Baibel Idia Stadilaia Taudia Oi Hakaua Mai Dirava Ena Orea Dekenai
1 Hari lagani 100 mai kahana lalodiai, Iehova ena Witness taudia idia hegaegae vadaeni, hesiai gaukara badana tanobada hegegemadai idia karaia totona. Ia be hadibaia herevana ta idia gwauraia gado 200 mai kahana dekenai tano 210 ma haida lalonai, bona tanobada ibounai taunimanima milioni momo ia hatamonaia noho.
2 Papua New Guinea lalonai, vidio kaset Jehovah’s Witnesses—The Organization Behind the Name ese stiuden taudia, English gado idia diba sisina sibona taudia danu, ia durudia Iehova ena Witness taudia ese hari idia karaia tanobada ibounai ena hadibaia gaukarana ena bada idia lalo-pararalaia totona. Ia ese inai henanadai ia haerelaidia: Iehova ena Witness taudia be daidia? Edena bamona edia gaukara idia naria? Edena bamona idia hakaua? Edia gaukara durua monina be edeseniai idia abia? Ia ese itaia taudia ia durua idia lalo-parara “tanobada hegegemadai Iehova ena Witness taudia be edia orea lalonai idia hadibaia namonamo, edia dekena taudia edia abidadama Baibel dekenai idia habadaia totona,” bona idia ia hagoadaia idia sibona ese unai orea idia itaia totona. Inai vidio ia itaia murinai, Baibel stadi hahinena ta ese ia moalelaia bona ia laloa bada dainai mai matana ranu ida ia gwau: “Edena bamona tau ta ia itaia diba lasi inai orea be Dirava momokanina, Iehova, ena orea?”—1 Korinto 14:24, 25 itaia.
3 Ma hahine ta, Baibel ia stadilaia sisina bena ia rakatania bena ia stadi lou hahinena, be unai bamona ia karaia sisina daudau, to ia abia dae diba lasi Toi Tamona herevana be hahediba koikoina. Bena ia bona ena tau dekenai iseda vidio idia hahedinaraia. Idia itaia gaudia dainai idia hoa bada herea bona unai hanuaboi tamona lalonai nega rua unai vidio idia itaia. Gabeai edia stadi lalonai, unai hahine be ia hahedinaraia ia ura Witness ta ai do ia lao. Ia gwau ia be ena abidadama Toi Tamona hahediba herevana dekenai sibona ia laloa, to iseda orea bona orea lalonai idia noho taudia ia laloa lasi. Vidio amo ia diba momokani ia ese Dirava ena orea momokanina ia davaria. Ia ura unai nega ai ruma-ta-ruma-ta gaukarana do ia karaia matamaia. Ia idia hadibaia dahaka ia karaia guna bena bapatiso lasi pablisa ai do ia lao neganai, ia gwau: “Do lau karaia.” Ena dubu gunana ia rakatania, haroro gaukara ia hamatamaia, bona Toi Tamona hahediba hakoikoia hahinena namona ai ia lao.
4 Ita itaia namonamo Baibel stiuden taudia be lauma dalanai do idia tubu bona goada idia lao haraga bema Iehova ena orea idia diba namonamo bona idia bamoa neganai. Taunimanima 3,000 be Pentekoste ai bapatiso idia abia murinai, “Nega ibounai idia haboua noho, aposetolo edia hadibaia herevadia idia kamonai totona, bona turana idia karaia.” (Kara 2:42) Namona be Baibel stiuden taudia be hari ita durua unai bamona do idia karaia totona. Edena bamona ita karaia diba?
5 Maduna Ita Huaia: Namona be hadibaia taudia idia diba edia maduna be Baibel stiuden tauna be Dirava ena orea dekenai do idia hakaua lao. (1 Tim. 4:16) Namona be ita laloa stadi ta ta ese kamonai matamata tauna idia durua ena mauri be Iehova dekenai ia gwauhamatalaia totona bena dina mai moalena ai bapatiso amo unai do ia hamomokania. Bapatiso do ia abia dinana dekenai, inai henanadai do idia henia: “Emu gwauhamata bona bapatiso ese idia hahedinaraia oi be Iehova ena Witness tauna ta, Dirava ese ena lauma amo ia hakaua oreana lalonai—unai oi lalo-pararalaia, a?” Unai dainai, gau badana be ia diba Dirava ia hesiai henia diba lasi, bema Keristani kongregesen ida ia hebamo lasi neganai.—Mat. 24:45-47; Ioa. 6:68; 2 Kor. 5:20.
6 Emu kongregesen bona Iehova ena Witness taudia idia noho tanobada hegegemadai oreana be Baibel stiuden tauna dekenai oi hadibaia loulou. Unai oi karaia Baibel stadi ta ta ai, stadi ginigunana ai oi hamatamaia. Stadi ginigunana ai, Baibel stiuden tauna oi boiria mai hebouhebou dekenai, bona do oi boiria noho.—Apok. 22:17.
7 Idia Noho Tulu Oi Gaukaralaidia: Baibel stadi ita karaia totona ita gaukaralaia buka namodia be Dirava Ia Ura Dahaka Ita Karaia? buklet bona Diba ese Mauri Dekenai Ita Ia Hakaua Lao bukana. Ruaosi ese kongregesen ida ita hebou karana idia herevalaia bada. Dahaka Ita Karaia? buklet ena kahana 5 ena dokona dekenai ia gwau: “Namona be Iehova oi dibaia noho bona ena taravatu oi badinaia noho. Unai bamona oi karaia totona, Iehova ena Witness taudia edia Kingdom Hall dekenai hebouhebou lao henia karana ese oi do ia durua.” Diba bukana ese stiuden tauna ia hagoadaia loulou hebou dekenai ia lao totona. Karoa 5, paragraf 22, dekenai inai boiboi ia noho: “Iehova ena Witness taudia be . . . oi idia noia, oi be idia ida ‘lauma bona momokani dekena amo’ Dirava do umui tomadiho henia hebou. (Ioane 4:24)” Karoa 12, paragraf 16, ia gwau: “Stadi do oi karaia noho bona Iehova ena Witness taudia edia hebou lao henidia karana do oi manadalaia lalonai, unai ese emu abidadama be ma do ia hagoadaia lou.” Karoa 16, paragraf 20, ia gwau: “Iehova ena Witness taudia edia hebou do oi lao henidia loulou be namo.” Ma ia gwau: “Unai amo Dirava do oi dibaia goevagoeva, bena emu diba hegeregerena do oi kara lalonai, moale do oi davaria. Keristani taudia edia orea, tanobada hegegemadai oreana, lalonai bema oi noho, Iehova kahirakahira do oi noho diba.” Karoa 17 ese Dirava ena orea lalonai noho namonamo dalana ia herevalaia. Ma haida ita stadi henia neganai, iseda maduna be unai hereva ita hahedinaraia goevagoeva.
8 Iehova ena Witness Taudia be Lalo-Tamona ai Dirava Ena Ura Idia Karaia Tanobada Ibounai Dekenai buklet be idia halasia tulu namona, taunimanima be Iehova ese ena ura hagugurua totona hari ia gaukaralaia orea tamona idia diba totona. Inai buklet be iseda haroro gaukara, hebouhebou, bona orea ia herevalaia, bona unai hereva ese duahia tauna do ia hagoadaia ita ida Dirava do ia tomadiho henia totona. Baibel stadi ita hamatamaia neganai, ita idia hagoadaia unai buklet ta be stiuden tauna dekenai do ita rakatania, sibona do ia duahia totona. Ia ida unai buklet do ita stadilaia lasi, guna ita karaia bamona.
9 Society ese ia halasia vidio kaset haida be tulu namodia stiuden taudia do idia hakaudia iseda orea lalonai. Ena be inai vidio be Pidgin eiava Hiri Motu gado dekenai lasi, to English gado idia diba sisina eiava idia diba lasi stiuden taudia danu be do idia itaia gaudia amo namo do idia davaria. Gabu momo dekenai Baibel stiuden taudia be televisen bona VCR idia gaukaralaia diba. Unai dainai, bema mai dalana, iseda vidio iboudiai idia itaia be namo. Vidio kaset haida be: (1) United by Divine Teaching, unai ese Eastern Europe, South America, Africa, bona Asia dekenai intenesenel hebouheboudia ai ia hedinarai maino bona lalo-tamona ia hahedinaraia bona herevalaia; (2) To the Ends of the Earth, unai be Watchtower Bible School of Gilead ena lagani 50 makaia totona idia karaia bona misinari taudia edia gaukara ena anina tanobada hegegemadai haroro gaukarana lalonai ia hahedinaraia; bona (3) Jehovah’s Witnesses—The Organization Behind the Name.
10 Hebou Totona Tahua Gaudia Haida Atoa: Stiuden tauna dekenai oi hahedinaraia ruma ai Baibel stadi lalonai ita hadibaia bona hebouhebou dekenai kongregesen ida diba ia abia hebou be namo, unai dala ruaosi be mai anina. (Ioa. 6:45) Namona be kamonai matamata tauna ese ena diba Baibel bona orea dekenai ia habadaia. Unai totona, hebouhebou ia reaia lasi be namo. (Heb. 10:23-25) Stadi tauna be maoromaoro hebouhebou dekenai oi boiria mai. Kamonai matamata taudia haida be Baibel stadi idia do hamatamaia lasi neganai hebouhebou dekenai idia mai. Momokani, ita ura ita sibona ese haheitalai namona ita hahedinaraia bona hebouhebou ita lao henia hanaihanai.—Luka 6:40; Fil. 3:17.
11 Hebouhebou ai ita karaia gaudia bona hebou idia naria dalana be stiuden tauna ida do oi kikilaia bena ena hebouhebou ginigunana do ia moalelaia. Haida edia hemami be namo lasi gabu idauna dekenai nega ginigunana idia lao neganai, unai dainai ia namo bema oi ese stiuden tauna do oi bamoa Kingdom Hall dekenai nega ginigunana ia lao neganai. Ena mamina do ia namo bema kongregesen tadikaka haida ida ia hedavari. Gau badana be, kara namona do oi karaia emu vadivadi tauna dekenai, unai amo ia itaia taunimanima ese ia idia abia dae bona hemami namona do ia abia danu.—Mat. 7:12; Fil. 2:1-4.
12 Stiuden tauna oi hagoadaia dina tamona hebouhebou, sekit hebouhebou, eiava distrik hebouhebou dekenai do ia mai. Sedira hebouhebou dekenai do oi lao motuka dekenai ena ladana danu oi henia diba.
13 Kudouna amo Orea Laloa Bada Karana: Hesiai Gaukara Karaia Totona Ita Hegaegae bukana, rau 92 dekenai ia gwau: “Bema kamonai taudia oi hereva henidia neganai oi sibomu emu ura bada Iehova ena orea dekenai idia itaia neganai, edia abidadama do ia tubu haraga, bona do idia gaukara goada Iehova idia diba namonamo totona.” Emu kongregesen oi herevalaia neganai, gau namodia sibona oi gwauraia, hagoadaia lasi herevadia oi gwauraia lasi. (Sal. 84:10; 133:1, 3b) Stadi dekenai emu guriguri oi karaia neganai, kongregesen bona stiuden tauna be kongregesen ida ia hebamo be namo oi gwauraia danu.—Ef. 1:15-17.
14 Ita ura bada kamonai matamata taudia ese Dirava ena taunimanima edia huanai ita davaria turana karana namona bona lauma dalanai noho namona idia laloa bada. (1 Tim. 3:15; 1 Pet. 2:17; 5:9) Ita be Iehova ena Witness taudia dainai, gau ibounai ita karaia Dirava ena Hereva idia stadilaia taudia ita hakaua mai iena orea dekenai.
[Blurb on page 3]
Stiuden taudia be lauma dalanai idia goada haraga bema idia sibona ese orea idia itaia neganai
[Blurb on page 4]
Naria lasi, stiuden taudia be hebou dekenai oi boiria