Kahana 8—Baibel Stadi Namodia Karaia
Stiuden Taudia Hakaua Mai Orea Dekenai
1 Baibel stadi ita karadia ena badina be, hahediba herevadia ita hadibaia sibona lasi, to danu, stiuden taudia ita durua Keristani kongrigeisen lalonai idia vareai totona. (Sek. 8:23) Iehova Ena Witnes Taudia—Idia be Daidia? Dahaka Idia Abia Dae? buklet ese ita ia durua diba, unai bamona ita karaia totona. Baibel stiuden matamatadia dekenai unai buklet ta ita rakatania, bona idia ita hagoadaia idia duahia totona. Danu, wiki ta ta ena stadi ai, miniti haida lalonai Iehova ena orea ia herevalaia point ta oi hadibaia.
2 Kongrigeisen Heboudia: Baibel stiuden ese Iehova ena orea ia laloa bada dalana badana be: Kongrigeisen heboudia dekenai ita idia bamoa karana amo. (1 Kor. 14:24, 25) Unai dainai, reana idia dekenai wiki ena hebou faiv, nega ta ta ai hebou ta ta oi hadibaia matamaia. Pablik tok gabena ena sinado oi gwauraia. Gima Kohorona stadi bona Kongrigeisen Buka Stadi dekenai do ita stadilaia kahadia oi hahedinaraia. Tiokratik Haroro Sikuli bona Hesiai Hebou oi herevalaia. Sikuli ai oi be mai emu kahana neganai, reana ia ida oi hegaegaelaia hebou diba. Hebou ai idia gwauraia point namodia umui herevalaia hebou. Iseda buka lalodiai idia noho laulau amo idia oi durua, eda hebou gabunai idia karaia gaudia idia itaia totona. Nega ginigunana stadi umui hamatamaia neganai, idia umui boiria hebou dekenai idia mai totona.
3 Memorial, hebouhebou maragidia bona badadia, bona sekit naria tauna ena vadivadi negana ia kahirakahira neganai, namona be nega sisina lalonai stiuden dekenai unai hebou ta ta oi herevalaia bona unai idia lalodia bada. Inai bamona henanadai haerelaia namonamo: Dahaka dainai ita idia gwauraia Iehova ena Witnes taudia? Dahaka dainai iseda hebou gabudia idia gwauraia Kingdom Hall? Elda bona hesiai taudia edia maduna be dahaka? Haroro gaukara bona teritori be edena bamona idia hegaegaelaia eiava haria? Iseda buka be edena dala ai idia karaia? Orea ena moni be edena bamona idia abia? Brens opesi bona Hakaua Oreana ena maduna be dahaka?
4 Vidio Namodia: Dala ma ta be, Baibel stiuden taudia ese eda vidio amo Iehova ena orea hereadaena idia itaia diba. To the Ends of the Earth vidio ese eda tanobada hegegemadai haroro gaukarana ia hahedinaraia; Our Whole Association of Brothers vidio ese eda tanobada ibounai tadikaka oreana ia hahedinaraia; United by Divine Teaching vidio ese ia hahedinaraia Iehova ena Witnes taudia be idia lalotamona. Lagani faiv lalonai iseda magasin bona buka ma haida ia abia hahine ta be Jehovah’s Witnesses—The Organization Behind the Name vidio ia itaia neganai ia tai. Ia ese ia idia vadivadi henia Witnes taudia ia abidadama henia, to vidio ia itaia murinai, ia laloa unai Witnes taudia edia orea ia abidadama henia danu be namo. Unai hahine ida stadi idia hamatamaia, bona wiki gabena ai, ia be Kingdom Hall heboudia dekenai ia lao.
5 Wiki ta ta ai, miniti haida lalonai, iseda Baibel stiuden ida ita herevahereva bona idia halasia tulu idauidau ita gaukaralaia neganai, Baibel stiuden taudia be Iehova ese hari ia gaukaralaia orea tamona lalonai ita hakaudia vareai diba.
[Study Questions]
1. Dahaka dainai wiki ta ta ena Baibel stadi lalonai Iehova ena orea ia herevalaia point ta oi hadibaia be namo?
2. Edena dala ai Baibel stiuden oi hagoadadia diba kongrigeisen heboudia dekenai idia mai totona?
3. Ita herevalaia diba orea haheaua daladia haida be dahaka?
4, 5. Edena bamona iseda vidio ese orea laloa bada karana ia havaraia diba?