Ma Haida Oi Durua Hebou Dekenai Idia Mai Totona
1 “Kahirakahira idia noho turadia ibounai . . . hebou dekenai idia ura mai taudia be mai moale ida ai boiria.” November 1880 ai, Zion’s Watch Tower dekenai unai hereva ia hedinarai negana amo, Iehova ena Witnes taudia ese mai edia ura ida Baibel hadibaia heboudia dekenai taunimanima idia boiria. (Apok. 22:17) Unai be tomadiho momokanina ena kahana badana.
2 Hebou Dekenai Ita Mai be mai Anina Bada: Kongregesen ita bamoa neganai hahenamo ita abia. Iseda Dirava hereadaena, Iehova, do ita diba namonamo. Kongregesen lalonai ita hebou, Iehova ese ita ia “hadibaia” totona. (Isa. 54:13) Iehova ena orea ese Baibel hadibaia program ia hegaegaelaia noho, “Dirava ena ura ibounai” ita badinaia bona ia kahirakahira ita lao totona. (Kara 20:27; Luka 12:42) Hebou ese ita dekenai Dirava ena Hereva hadibaia gaukarana idia hahedinaraia. Baibel amo idia henia herevadia ese ita idia durua taunimanima ma haida bona Iehova ida hetura karana namona ita moalelaia totona. Dirava idia lalokau henia taudia ita bamoa karana ese iseda abidadama ia hagoadaia.—Roma 1:11, 12.
3 Idia Oi Boiria: Stadi negana ginigunana amo, Baibel stiuden tauna be hebou dekenai oi boiria. Ia dekenai boiboi pepana oi henia. Iena ura oi habadaia totona hebou gunana dekenai oi ia hagoadaia gauna ta bona hebou gabena dekenai do idia herevalaia gauna ta oi gwauraia. Kingdom Hall be ia dekenai oi herevalaia, bona oi hamomokania davaria dalana ia diba.
4 Bema stiuden tauna be maoromaoro ia mai lasi, oi boiria loulou. Pura ta ta iboudiai miniti haida lalonai iseda orea ia heau dalana oi hahedinaraia. Dirava Ena Ura Idia Karaia buklet bona bema oi dekenai ia noho Jehovah’s Witnesses—The Organization Behind the Name vidio oi gaukaralaia, ita bona iseda hebou ia diba totona. Pablisa ma haida be stadi dekenai oi abia lao, stiuden tauna ese idia ia diba totona. Guriguri lalonai, Iehova ese orea ia haginia dainai oi tanikiu henia bona stiuden tauna be orea lalonai ia vareai ena anina bada oi gwauraia.
5 Oi naria lasi, to maoromaoro kamonai matamata taudia oi durua ita ida do idia hebou. Iehova idia laloa bada matamaia neganai, idia dibaia gaudia do idia badinaia matamaia bona Dirava ena lalo-tamona oreana lalonai do idia vareai.—1 Kor. 14:25.