Taunimanima Idia Noho Gabudia Dekenai Haroro
1 Aposetolo Paulo be Dirava ena lauma ese ena hesiai gaukara ia durua dalana ia laloa dainai ia gwau: “Dirava ese unai hadoa gauna ia hatubua.” Danu ia gwau: “Ai ruaosi be Dirava ena gaukara ai karaia hebou.” (1 Kor. 3:5-9) Unai be hahenamo namona ta. Edena bamona ita be taunimanima edia vairanai ita hahedinaraia Dirava ida ita gaukara ita laloa bada? Ruma ta ruma ta dekenai bona gabu idauidau dekenai ita davaria taudia ibounai dekenai sivarai namona ita harorolaia karana amo.
2 Ita ia hagania ‘bese ibounai be diba tahua taudia ai do ita halaoa.’ (Mat. 28:19) Bema hesiai gaukara ita karaia neganai taunimanima momo ita davaria lasi, ita hesiku haraga diba bona do ita laloa iseda hesiai gaukara ita hagugurua momokani lasi. To taunimanima momo ita davaria bona idia ida ita kiki neganai, iseda hesiai gaukara ita moalelaia. Unai be auka sisina, badina ita kwalimu totona namona be dala ita tahua taunimanima idia noho gabudia dekenai ita lao, bona idia ida ita kiki.
3 Ita Idia Durua Diba Haheitalai: Maketi, loaloa uma gabudia, bona PMV gabudia dekenai taunimanima ita haroro henidia diba. Basi oi guia neganai, oi hegaegae idia noho taudia dekenai oi haroro totona, a? Witness taudia rua be haroro hebou totona taunimanima amo ia honu basi ta dekenai idia lao lalonai, Diba bukana dekenai ia noho Paradaiso laulauna bona Dirava ena gwauhamatadia dina vairai totona idia kikilaia hebou. Idia ura gauna be ia vara, idia badinai ia gini tauna ese edia hereva ia kamonai bona ia ura henia bada. Basi ia do rakatania lasi neganai, Diba bukana ia abia dae bona ia hamaorodia ia ura ta ese do ia vadivadi henia.
4 Papua New Guinea lalonai, pablisa bona painia momo ese moale idia davaria dala dekenai magasin gaukara idia karaia neganai. Taihu ta ese unai gaukara ia karaia namo herea, taunimanima ibounai dekenai ia raka lao magasin hahedinaraia totona, gabu tamona sibona dekenai ia gini lasi. Magasin ia hariharilaia motuka lalonai idia helai taudia dekenai, dala ai idia raka taudia, bona sitoa ai idia noho taudia dekenai danu. Unai bamona gari lasi magasin gaukara ia karaia dainai, daba ta lalonai, hora rua lalonai ia gaukara murinai, unai taihu ese magasin 100 bona ma haida ia hariharilaia! Papua New Guinea lalonai, pablisa bona painia taudia ma haida be motuka, basi, bona taraka murinai idia helai taudia dekenai magasin hariharilaia gaukarana idia moalelaia danu.
5 Iehova ena ladana ita abia isi be hahenamo ta. Bema mai iseda ura ida haroro gaukara ita karaia, ita hahedinaraia Dirava ena lalokau karana ena anina ita dekenai ita reaia lasi. Taunimanima durua “nega namona be hari” dainai, namona be taunimanima idia noho gabudia dekenai ita lao bona idia dekenai Iehova ena ‘hamauria dinana’ ita gwauraia hedinarai.—2 Kor. 6:1, 2.