Basileia Sivaraina Pepana Idia Ura Henia Taudia Lou Henia
1 Idia lao wiki haida lalonai, ita ese hahenamo ta ita moalelaia, Basileia Sivaraina pepana Namba 35, ladana “Taunimanima Ibounai be Do Idia Lalokau Heheni, A?” ita hariharilaia. Gabu iboudiai pablisa taudia idia hekwarahi kara namo taudia dekenai unai Basileia Sivaraina pepana idia henia. (Mat. 10:11) Ena be unai pepa hariharilaia gaukarana be Sunday, November 16 ai, do ia doko, to bema umui do karaia lasi teritori idia noho, reana elda taudia ese umui do idia noia unai Basileia Sivaraina pepana Namba 35 hariharilaia gaukarana umui karaia noho, ela bona kongregesen dekenai idia noho pepadia idia ore.
2 Basileia Sivaraina pepana ese taunimanima momo edia lalona ia hamarerea. Idia itaia taunimanima momo edia lalokau karana idia haboioa vadaeni, unai dainai nega vairai dahaka do ia vara idia daradaralaia. (2 Tim. 3:3) Ita ura idia kamonai taudia ita lou henia.
3 Basileia Sivaraina Pepana ese Anina Ia Havaraia: Lagani 1995 ena Basileia Sivaraina pepana hariharilaia gaukarana lalonai, pepa ta ia abia hahinena ta be Kingdom Hall dekenai idia karaia hebou ta dekenai ia lao badina ia ura Iehova ena Witness taudia edia hahediba herevadia ma haida do ia dibaia. Unai hebou dekenai Baibel stadi ia abia dae haraga bona unai murinai hebou ta ia reaia lasi. Daudau lasi murinai, ia ese ena dubu gunana dekenai revareva ia torea, ia ura iena ladana be unai dubu ena lista amo idia kokia!
4 Hari, taunimanima handred momo iseda teritori dekenai ese Basileia Sivaraina pepana Namba 35 dekenai ia noho sivaraina idia duahia vadaeni. To dahaka idia karaia? Ena be idia duahia gauna idia ura henia, to kara ta do idia karaia lasi ela bona Iehova ena Witness tauna ta ese ia lou henidia. Palani oi karaia do oi lou henidia totona, a? Namona be iseda lalokau iseda dekena taudia dekena ese ita ia ha-uraia unai ita karaia totona. Namona be Basileia Sivaraina pepana idia ura henia taudia iboudiai ita vadivadi henia lou.
5 Dahaka Do Oi Gwau Oi Giroa Lou Neganai? Reana Basileia Sivaraina pepana ena hereva be nega korikori ai idia halasia oi herevalaia sisina, bena edia lalona veria henanadai ta oi henia. Ruma tauna ese ena lalohadai ia gwauraia neganai, oi kamonai namonamo, unai amo do oi diba dahaka ia laloa. Bena Basileia Sivaraina pepana dekenai ia herevalaia Dahaka Ita Karaia? buklet amo hereva namona ta oi hahedinaraia. Bema ia kamonai namonamo, maoromaoro Baibel stadi oi hamatamaia toho.
6 “Basileia Sivaraina” pepana Namba 35 idia ura henia taudia oi lou henia neganai, reana inai kiki herevadia oi gaukaralaia diba:
◼ “Reana vanegai lau henia pepana oi laloatao. Ena hereva ese hari inai negai taunimanima ia hapararaia noho gauna—ma haida lalokau henia lasi karana—ia gwauraia.” Basileia Sivaraina pepana ena rau 2 dekenai, hereva kwarana “Dekena Tauna Lalokau Henia Karana Ia Keru” henunai ia noho herevana oi hahedinaraia. Bena oi nanadaia, “Oi laloa Dirava ena ura be taunimanima be inai bamona idia noho, a?” Haere naria. Dahaka Ita Karaia? buklet ena kahana 5 dekenai oi kehoa, bona Baibel stadi oi hamatamaia toho. Buklet oi hahedinaraia, ena davana be 40 toea.
◼ “Guna, ita hedavari neganai, lau ese pepa ta lau rakatania, ena ladana be ‘Taunimanima Ibounai be Do Idia Lalokau Heheni, A?’ Oi laloa unai bamona tanobada ia vara diba, a?” Haere naria. Dahaka Ita Karaia? buklet ena kahana 6 dekenai oi kehoa, bona paragraf 6 oi duahia. Bena Dirava ena gwauhamata Mika 4:3, 4 dekenai oi duahia. Buklet oi hariharilaia, ena davana be 40 toea, bona davana lasi Baibel stadi oi gwauraia hedinarai danu.
◼ “Vanegai, oi lau vadivadi neganai, lau ese pepa ta ladana ‘Taunimanima Ibounai be Do Idia Lalokau Heheni, A?’ lau rakatania. Ia ese davana lasi Baibel stadi ia herevalaia. Lau giroa mai oi dekenai ai gaukaralaia stadi durua gauna lau hahedinaraia totona. [Diba bukana hahedinaraia.] Inai buka ia hahedinaraia goevagoeva edena negai taunimanima ibounai do idia lalokau heheni momokani, bona reana oi daradaralaia henanadai ma haida edia haere ia henia danu: Dahaka dainai ita buruka ita lao bona ita mase? Dahaka dainai Dirava ese hisihisi ia koua lasi? Dahaka ia vara iseda lalokau mase taudia dekenai?” Bena oi nanadaia, “Ia namo bema stadi karaia dalana lau hahedinaraia oi dekenai?” Bema ruma tauna ia ura lasi, oi nanadaia bema ia ura buka ena kopi ta ia abia, sibona ia duahia totona, ena davana be K1.50 sibona. Dala oi karaia ia oi lou henia totona.
7 Bema teritori ibounai lalonai Basileia Sivaraina pepana Namba 35 umui hariharilaia vadaeni, hua ena orena negana ai Diba bukana umui hariharilaia diba. Inai buka hariharilaia namonamo daladia be Iseda Basileia Gaukara ena March, June, bona November 1996; bona June 1997 pepadia edia murina kahana dekenai oi davaria diba.
8 Namona be inai Basileia Sivaraina pepana hariharilaia gaukarana badana ese ita ibounai ia hagoadaia iseda haroro gaukara ita habadaia totona. Ita diba Iehova ena heduru dainai inai gaukara badana amo anina bada herea do ia vara, bona taunimanima ita durua do idia itaia Dirava ena ura be taunimanima ibounai do idia lalokau heheni. Basileia Sivaraina pepana idia ura henia taudia ita lou henia neganai, Iehova ese iseda hekwarahi bada do ia hanamoa.