Basileia Sivaraina Namba 36 ese Ia Havaraia Urana Habadaia
1 Emu Basileia Sivaraina Namba 36 oi hariharilaidia ore vadaeni, a? Henanadai namona ia henia, ibounai ese idia lalohadailaia totona: “Milenium Matamatana—Vaira Negana Ena Anina Oi Dekenai be Dahaka?” Lagani 2000 ia kahirakahira neganai, lalohadai idauidau idia vara milenium matamatana be dahaka do ia mailaia. Basileia Sivaraina Namba 36 be unai lalohadai haida ia herevalaia bona ita ia hadibaia tanobada dekenai idia vara gaudia dainai noho namo do ia vara lasi. Maino bona noho namo do ia mailaia milenium tamona be Keriso Ena Lagani 1000 Lohia Negana. Ita abia dae unai Basileia be gau korikorina dainai, unai ese ita ia doria Basileia Sivaraina Namba 36 be taunimanima ibounai dekenai ita hariharilaia totona.
2 Basileia Sivaraina Idia Abia Dae: Guna Basileia Sivaraina ita hariharilaia ese iseda gaukara ia hanamoa momokani. Basileia Sivaraina Namba 35 idia herevalaia neganai, Canada brens ia gwau: “Pablisa bona painia taudia ese unai pepapepa hariharilaia gaukara badana be mai edia ura bada ida idia durua, bona ekspiriens namodia momo idia moalelaia.” Ai diba Basileia Sivaraina Namba 36 hariharilaia gaukarana dekenai oi danu be unai bamona ura do oi hahedinaraia.
3 Hari do ita hariharilaia Basileia Sivaraina be November 17, 2000 ai do ia doko. Emui kongregesen ena teritori ibounai umui karaia haorea vadaeni, a? Bema lasi, elda taudia ese umui do idia noia unai gaukara do umui karaia ela bona November ena dokona.
4 Emu gabu dekenai Basileia Sivaraina Namba 36 umui hariharilaia dainai, taunimanima edia kara be edena bamona? Taunimanima haida ese edia ladana bona adres be murina rau dekenai do idia torea bona Dahaka Ita Karaia? buklet eiava Baibel stadi totona do idia noinoi. To, nega ginigunana ai milenium herevana dekenai edia ura idia hahedinaraia taudia momo be kara ta do idia karaia lasi ela bona Iehova ena Witnes tauna ta ia giroa. Edia ura idia hahedinaraia taudia ibounai ita vadivadi henia lou be namo. Edena nega be nega namona, unai ita karaia totona? Lou henia ita karaia haraga be namo.
5 Mani Basileia Sivaraina Namba 35 idia abia taudia idia lou henia dainai idia davaria ekspiriens namodia oi itaia. Ireland dekenai painia ta ese aniani rumana ta ena biaguna dekenai Basileia Sivaraina ia rakatania. Unai sivarai ese unai hahine ena lalona ia hamarerea bona taihu ia boiria lou. Dina rua murinai taihu ia giroa, bona Baibel stadi ia hamatamaia. Denmark dekenai, Basileia Sivaraina be taunimanima idia noho lasi rumana dekenai idia rakatania. Unai dina tamona ai, unai ruma dekenai ia noho hahinena ese brens opesi dekenai ena ladana bona adres ia siaia, bona brens ese iena gabu ai ia noho Kingdom Hall dekenai unai adres idia siaia. Wiki ia do ore lasi neganai, taihu rua idia vadivadi, stadi dalana idia hegaegaelaia, bona unai hahine ese Kingdom Hall dekenai ena hebou ginigunana ia lao henia!
6 Oi Giroa Neganai Oi Gwauraia Diba Herevana: Ita hariharilaia Basileia Sivaraina idia abia taudia lou henia be ia auka lasi bona ia be iseda haroro gaukara ita moalelaia ena kahana ta. Oi giroa lou neganai, namona be Basileia Sivaraina Namba 36 oi abia lao, badina ruma tauna ena kopi be reana ia noho lasi. Inai heduru herevadia oi tohoa diba.
7 Ruma tauna oi hadibaia oi be daika murinai, oi gwau diba:
◼ “Lau ese pepapepa ladana ‘Milenium Matamatana—Vaira Negana Ena Anina Oi Dekenai be Dahaka?’ lau rakatania. Kahirakahira Keriso Iesu ena Lagani 1000 Lohia Negana do ia matamaia, tanobada dekenai Paradaiso do ia havaraia, unai oi duahia be hagoadaia gauna, ani? [Basileia Sivaraina Namba 36 lalonai Paradaiso ena laulau oi hahedinaraia.] Murina rau dekenai, oi ai hadibaia Dirava Ia Ura Dahaka Ita Karaia? buklet ta oi noia diba.” Buklet oi hahedinaraia, kahana 5 oi kehoa, henanadai ginigunana bona paragraf 1 bona 2 oi duahia, bona ruma tauna oi noia ia haere totona. Siri ta eiava rua oi duahia bona herevalaia. Bema hegeregere, ma henanadai ta bona paragraf ta umui herevalaia, bena dala oi karaia oi giroa lou bona stadi umui karaia noho totona.
8 November ena henia gauna be “Dahaka Ita Karaia?” buklet eiava “Diba” bukana dainai, reana oi gwau diba:
◼ “Vanegai oi lau vadivadi henia neganai, ‘Milenium Matamatana—Vaira Negana Ena Anina Oi Dekenai be Dahaka?’ lau rakatania. Ia ese davana lasi Baibel stadi ia herevalaia. Oi dekenai lau giroa lou, ai gaukaralaia stadi bukana lau hahedinaraia totona. [Dahaka Ita Karaia? buklet oi hahedinaraia, bona murina rau dekenai oi kehoa lao; eiava Diba bukana oi hahedinaraia, bona rau 188-9 oi kehoa.] Baibel ese ia gwauraia Lagani 1,000 be inai laulau dekenai oi itaia bamona gabu namona do ia havaraia. Paradaiso dekenai ita noho totona, namona be Dirava dekenai diba maoromaoro ita abia. Mani nega sisina lalonai Baibel ai stadilaia dalana do lau hahedinaraia.”
9 Basileia Sivaraina Namba 36 hariharilaia gaukarana ese ita ia doria iseda haroro gaukara ita habadaia, bona taunimanima momo ita hereva henia diba. Reana unai ese teritori lalonai idia noho taudia momo edia ura do ia habadaia. Ita ibounai ita gaukara hebou inai ura habadaia totona bona Iehova ena heduru amo, mai moale ida mamoe bamona taudia momo do ita davaria.—Mat. 10:11; Kara 13:48, 49, 52.