Memorial Negana—Gaukara Habadaia Negana
1 Idaunegai Israela taudia be lagani ta lalonai idia makaia negana ai “Iehova ena aria” idia moalelaia. (Lev. 23:2, Buka Helağa) Nega idia atoa Dirava ena namo idia laloa karana ese moale bada ia havaraia, bona edia lalona ia veria tomadiho goevana idia laloa bada totona.—2 Siv. 30:21–31:2.
2 Hari, Memorial negana ai ita moalelaia tiokratik gaukarana be lagani ta ta ai ia bada ia lao. Unai nega be Iehova ese ita dekenai ia henia dava bada gauna—ia sibona ia havaraia Natuna tamona unai—ita laloa dobu negana. (Ioa. 3:16; 1 Pet. 1:18, 19) Dirava bona ena Natuna ese idia hahedinaraia lalokauna ita laloa dobu neganai, unai ese ita ia hagoadaia Iehova ita hanamoa bona ena ura ita karaia goadagoada totona.—2 Kor. 5:14, 15.
3 Inai lagani ai, Lohiabada Ena Anibou be Thursday, March 24 ai, dina ia diho murinai do idia karaia. March, April bona May lalonai, edena dala ai iseda haroro gaukara ita habadaia diba?
4 Taunimanima Momo Hereva Henia: Haroro gaukara oi karaia neganai, dala oi tahua taunimanima momo oi hereva henia totona. Palani oi karaia taunimanima momo be ruma dekenai idia noho neganai, hegeregere adorahi ai, ruma-ta-ruma-ta gaukara oi karaia diba, a? Unai nega ai taunimanima be moni gaukara, maketi, eiava edia uma gabudia amo idia giroa lou vadaeni. Nega haida, buka stadi negana do lasi lalonai buka stadi naria tauna be haroro hebouna ta do ia hegaegaelaia, kahirakahira idia noho teritori dekenai idia haroro totona. Haroro heboudia ma haida umui karaia diba, emu gabu dekenai idia noho taudia edia noho dalana hegeregerena.
5 Taunimanima momo ita hereva henia dalana ma ta be taunimanima idia noho gabu dekenai ita lao. Japan ai, taihu ta ia ura heduru painia ia karaia, herevana ful-taim moni gaukara ia karaia. Elda ta ese ia hadibaia, dina ta ta ai gaukara dekenai ia do lao lasi neganai, trein steiseni dekenai magasin gaukara ia karaia diba. Gari mamina bona gaukara taudia haida ese idia kirikirilaia karana ia hanaia murinai, taunimanima 40 dekenai magasin rut ia karaia; idia haida be gaukara taudia, steiseni dekenai idia gaukara taudia, bona kahirakahira idia noho sitoa biagudia. Hua ta lalonai, magasin ena averes ibounai 235 ia hariharilaia. Dina ta ta ai Baibel ena hereva badadia be taunimanima ida nega sisina lalonai ia herevalaia dainai, ia ese Baibel stadi 6 ia hamatamaia.
6 Nega Namodia Haroro Totona: Lagani lalonai, idia do sikuli noho pablisa taudia be nega ta ta ai sikuli holide idia abia. Unai be nega namodia heduru painia karaia totona. Danu, Keristani matamata taudia be sikuli dekenai idia haroro amo edia gaukara idia habadaia diba. Emu klas turadia be oi abia dae gaudia idia ura dibaia neganai, reana do oi hoa bada. Namona be klasrum ai herevahereva negana eiava sivarai ta torea negana oi gaukaralaia, oi haroro totona, ani? Ma haida be iseda vidio idia gaukaralaia idia haroro totona. Haida be Baibel stadi idia hamatamaia vadaeni edia klas turadia ida bona idia durua edia mauri idia gwauhamatalaia bona bapatiso idia abia. Unai be dala namodia Iehova ‘ena ladana ita hanamoa bada’ totona.—Sal. 148:12, 13.
7 Dina ta ta ai, dala oi tahua iseda Dirava namona bona ena gwauhamata namodia be taunimanima dekenai oi herevalaia totona. Dina ta ta ai trein dekenai ia lao ia mai tadikaka ta be nega namodia ai trein ai idia guia gaukara taudia ia haroro henia. Hegeregere, dina ta ta ai trein steiseni dekenai trein ia naria noho lalonai, miniti faiv bamona ia gaukaralaia tau matamata ta ia haroro henia totona. Unai dainai, unai tau matamata bona ena turadia haida be Baibel stadi idia abia dae. Baibel stadi be trein lalonai idia karaia. Nega sisina murinai, edia hereva ia kamonai noho hahine buruka ta be tadikaka dekenai ia lao bona Baibel stadi totona ia noinoi. Ia danu be trein dekenai ia guia negadia ai ena stadi ia moalelaia noho. Unai amo, unai tadikaka be trein lalonai taunimanima idauidau 10 ia stadi henia vadaeni.
8 Bema oi buruka eiava gorere dainai, haroro gaukara oi karaia diba lasi be edena bamona? Dala idauidau ai Iehova hanamoa gaukarana oi habadaia diba. Reana telefon eiava revareva amo ma haida oi haroro henia diba. Danu, varavara bona ma haida be emu ruma dekenai idia mai neganai, idia oi haroro henia.
9 Kamonai matamata taudia be Memorial idia lao henia neganai, unai ese idia ia hagoadaia diba Iehova hanamoa karana idia habadaia totona. Bema haroro ena ekspiriens namodia oi kikilaia bona Baibel ena hahediba herevadia idia gwauraia hedinarai bona hereva momokani idia hamomokania daladia oi hadibaia neganai, unai ese idia ia durua diba mai gari lasi ida idia haroro totona. (1 Pet. 3:15) Bema Baibel stiuden ta ia ura sivarai namona ia harorolaia matamaia, hakaua naria tauna umui hereva henia be namo. Ia ese dala do ia karaia unai stiuden ida idia hebou totona, unai amo do idia itaia bema ia hegeregere vadaeni kongrigeisen ida ia haroro totona. Hepapahuahu Badana lalonai kamonai matamata taudia be Iehova ena kahanai idia gini karana ese Iehova ia hamoalea bada!—Aon. 27:11.
10 Heduru Painia Oi Karaia Diba, A? Heduru painia taudia ese idia abia hora 50 idia laloa bada be gau badana. (Mat. 5:37) Unai ena anina be dala oi karaia emu haroro gaukara lalonai hora 12 be wiki ta ta lalonai oi abia totona. Rau 5 ai idia noho heduru painia sediual ena haheitalai be emu noho dalana ida ia hegeregere, a? Bema lasi, sediual ta oi karaia diba, unai dala amo March, April, eiava May ai heduru painia oi karaia diba, a? Iehova oi noia emu hekwarahi do ia hanamoa, emu hesiai gaukara oi habadaia totona.—Aon. 16:3.
11 Elda bona hesiai taudia be oi do idia durua bada, inai Memorial negana be Iehova hanamoa negana namona ta ai oi halaoa totona. Reana idia momo be heduru painia do idia karaia. Bema namo, elda taudia be haroro heboudia ma haida idia hegaegaelaia diba, hegeregere adorahi ai, bona Saturday bona Sunday ai haroro totona. Elda taudia be haroro hebou gabudia, negadia, bona daika ese do ia naria idia diba totona, namona be heduru painia idia palanilaia bona do idia karaia taudia ida idia kiki. Elda taudia idia hekwarahi dala idia karaia totona, unai amo pablisa ma haida be umui abia hidi dina bona nega idauidau ai haroro gaukara do idia karaia. Unai dala amo, palani ita karaia diba bona namo bada ita havaraia diba.—Aon. 20:18.
12 Oi Gaukara Goada: Bema oi hegeregere lasi heduru painia oi karaia totona, laloaboio lasi, Iehova be iseda hekwarahi bona eda goada “hegeregerena” ita henia boubou gaudia ia abia dae. (2 Kor. 8:12) Gau momo idia noho Iehova ita tanikiu henia totona. Davida be mai badina namona ida ia gwau: “Nega ibounai Lohiabada do lau hanamoa. Ia do lau tanikiu henia ela bona hanaihanai.” (Sal. 34:1) Inai Memorial negana ai, namona be iseda lalona ita hadaia unai bamona ita karaia totona.
[Study Questions]
1. Lagani ta lalonai idia karaia “aria” ese dahaka namo ia havaraia Israela taudia dekenai?
2, 3. Dahaka dainai Memorial negana ai lauma dalanai ita karaia gaukarana ita habadaia be namo, bona Memorial be edena nega ai do ita karaia?
4, 5. (a) Dahaka ese haida ia durua taunimanima momo dekenai sivarai namona idia herevalaia totona? (b) Emu gabu dekenai edena haroro daladia ese anina namona ia havaraia?
6. Edena dala ai matamata taudia be lauma dalanai edia gaukara idia habadaia diba?
7. (a) Edena dala ai tadikaka ta ese nega namodia ia gaukaralaia ma haida ia haroro henia totona? (b) Unai bamona ekspiriens ta oi davaria vadaeni, a?
8. Edena dala ai buruka eiava gorere taudia ese edia haroro gaukara idia habadaia diba?
9. Edena dala ai Baibel stiuden taudia ita durua diba kongrigeisen ida haroro gaukara idia karaia totona?
10. (a) Edena dala ai sediual namona ese ita ia durua diba heduru painia ita karaia totona? (b) Vanegai lagani ena Memorial negana ai, heduru painia oi karaia diba, a? Edena dala ai oi karaia?
11. Edena dala ai elda bona hesiai taudia ese heduru painia do idia karaia taudia idia durua diba?
12. Dahaka ese iseda lalona ia veria nega ibounai Iehova ita hanamoa totona?
[Box on page 3]
Edena Dala ai Emu Haroro Gaukara Do Oi Habadaia?
◼ Taunimanima be ruma dekenai idia noho neganai haroro
◼ Taunimanima idia noho gabu dekenai haroro
◼ Gaukara eiava sikuli gabudia dekenai haroro
◼ Heduru painia karaia
[Chart on page 5]
Heduru Painia Sediual Ena Haheitalai—Pura Ta Ta ai Haroro Gaukara Ena Hora 12 Abia Daladia
Monday Ia Lao Saturday
Sunday be dina ta ida oi haidaua diba.
Dina Nega Hora
Monday Daba 2
Tuesday Daba 2
Wednesday Daba 2
Thursday Daba 2
Friday Daba 2
Saturday Daba 2
Hora Ibounai: 12
Dina Rua Ibounai
Pura ena dina rua oi abia hidi diba. (Inai sediual ai ita abia hidi dinadia hegeregerena, hua ta lalonai hora ibounai be 48.)
Dina Nega Hora
Wednesday Dina Ibounai 6
Saturday Dina Ibounai 6
Hora Ibounai: 12
Hanuaboi Rua Bona Saturday Bona Sunday
Hanuaboi rua oi abia hidi diba.
Dina Nega Hora
Monday Adorahi 1 1⁄2
Wednesday Adorahi 1 1⁄2
Saturday Dina Ibounai 6
Sunday Dina Kahana Ta 3
Hora Ibounai: 12
Adorahi Toi Bona Saturday
Sunday be dina ta ida oi haidaua diba.
Dina Nega Hora
Monday Adorahi 2
Wednesday Adorahi 2
Friday Adorahi 2
Saturday Dina Ibounai 6
Hora Ibounai: 12
Lauegu Haroro Sediual
Nega ibounai edia hora oi abia hidi.
Dina Nega Hora
Monday
Tuesday
Wednesday
Thursday
Friday
Saturday
Sunday
Hora Ibounai: 12