‘Gau Ibounai Ita Abia Hegaegae Gaukara Ibounai Karaia Totona’
1 Hari Iehova ena taunimanima be lauma aniani namo herea idia abia. (Isa. 25:6) Sibona eda stadi bona ruma bese stadi amo bona kongregesen ena hebou idauidau ai, bona sekit bona distrik hebouheboudia ai, Baibel idia herevalaia gaudia momo herea idia noho bona ita moalelaidia. To unai lauma aniani iboudiai ita gaukaralaia namonamo, ‘gau ibounai ita abia hegaegae gaukara namodia ibounai do ita karaia totona,’ a?—2 Tim. 3:17, NW.
2 Lagani 1998 ena hua 6 idia ore vadaeni, to ena lauma aniani listana mani oi laloa! Pura ta ta kongregesen heboudia amo, ita be Keristani Greek Revarevadia ena buka 23 edia hereva badadia haida ita herevalaia, bona danu Diba bukana ena kahana ta ita riviulaia, bona idia abia hidi Gima Kohorona herevadia amo idia karaia hereva ita kamonai danu. Ma danu, Iseda Basileia Gaukara pepadia 12, nega momo idia lalonai ‘Buka Helaga Ena Hereva Ibounai be Dirava Ena Lauma amo Ia Vara Bona Taunimanima Ia Durudia’ udaia gaudia idia noho, Gima Kohorona ena stadi herevadia be 52, bona kongregesen momo lalonai, Baibel ena hereva idauidau amo idia karaia Pablik Tok 52 bamona ita kamonai. Sekit bona distrik hebouhebou edia program namodia do ita abia danu. Lauma gaudia namodia momo herea idia noho ita totona!
3 Iehova ese Ia Henia Gaudia Laloa Bada: Namo bada ita abia totona, namona be ita lalo-parara dahaka dainai Iehova ese ita dekenai lauma gaudia momo herea ia henia. Unai gau namodia amo sibona ita ubua karana ese iseda abidadama bona iseda turana karana ia ida ia hagoadaia. (1 Tim 4:6) To, lauma aniani ia henia ita ia hadibaia totona sibona lasi. Ita ia ha-uraia ma haida dekenai hereva momokani ita herevalaia bona ita ia durua sivarai namona ena hesiai taudia namodia ai ita lao totona.—2 Tim. 4:5.
4 Namo lasi lauma dalana ai sibona ita naria namonamo lasi, to namona be Iehova ena pata amo ia mai lauma aniani namona abia urana ita habadaia. (Mat. 5:3, NW; 1 Pet. 2:2) Unai gaudia edia namo ibounai ita abia totona, namona be nega do ita atoa hanaihanai sibona eda stadi bona ruma bese ena Baibel stadi bona hebou lao henia karana, mai anina bada gaudia unai, ita karaia totona. (Ef. 5:15, 16) Unai ita karaia neganai, ita do idia hamoalea hahenamo be Paulo ese Heberu 13:20, 21 ai abidadama Heberu Keristani taudia dekenai ia torea hagoadaia herevana hegeregerena.