Oi Abidadama Henia Herevadia amo Oi Sibona “Oi Ubua Noho”
1 Namona be ita hekwarahi iseda mauri lalonai Dirava ita badinaia totona. (1 Tim. 4:7-10) Bema iseda goada amo unai ita karaia toho, gabeai ita be do ita manoka eiava moru haraga. (Isa. 40:29-31) Iehova amo goada ita abia diba dalana ta be inai: Ita abidadama henia herevadia amo ita sibona ita “ubua noho” be namo.—1 Tim. 4:6.
2 Lauma Aniani Namona: Iehova ese Baibel bona “hesiai tauna mai ena kamonai, bona mai ena kara maoromaoro” oreana amo lauma aniani namona ia henia. (Mat. 24:45) Unai gaudia ita gaukaralaia badina ita ura namo ita abia, a? Dina ta ta ai Baibel ita duahia, a? Stadi bona laloa dobu totona nega ita atoa, a? (Sal. 1:2, 3) Lauma aniani namona ese ita ia hagoadaia, bona ita ia gimaia Satani ena tanobada ese ita ia hamanokaia lasi totona. (1 Ioa. 5:19) Bema iseda lalona be gau namodia amo ita hahonua bona unai gaudia be iseda mauri lalonai ita badinaia, Iehova be ita danu do ia noho.—Fili. 4:8, 9.
3 Danu, Iehova be kongrigeisen heboudia amo ita ia hagoadaia. (Heb. 10:24, 25) Unai bamona heboudia amo ita abia hadibaia herevadia bona hebamo namodia ese ita ia hagoadaia, hahetoho negadia lalonai ita gini goada totona. (1 Pet. 5:9, 10) Keristani kekeni ta ia gwau: “Dina tamona lalonai sikuli ai lau noho neganai, egu goada ia ore. To Keristani heboudia be tano gagaena ai ia noho ranu gabuna bamona, badina unuseniai goada matamata lau abia, sikuli dinana ma ta ai do idia vara hekwakwanai lau hanaia totona.” Bema ita hekwarahi hebou dekenai ita lao, namo bada do ita abia!
4 Hereva Momokani Harorolaia: Iesu dekenai, ma haida haroro henia karana be aniani bamona. Unai amo goada ia abia. (Ioa. 4:32-34) Unai hegeregerena, ma haida dekenai Dirava ena hoa karadia ita herevalaidia neganai, ita mamia ita be goada ita abia. Danu, haroro gaukara dekenai ita bisi neganai, ita be mai iseda kudouna bona lalona ibounai ida Basileia bona kahirakahira do idia mai hahenamo idauidau ita laloa bada. Unai amo goada matamata ita abia.—Mat. 11:28-30.
5 Hari Iehova ese ena taunimanima ia henia lauma aniani namona amo sibona ita ubua bona namo ita abia be hahenamo badana! Namona be mai eda moale ida ita gaukara goada Iehova ita hanamoa noho totona.—Isa. 65:13, 14.