Kongregesen Idia Hakaua Taudia—Kongregesen Gunalaia Tauna
1 Kongregesen hakaua gaukarana be mai anina bada maduna ta. (Kara 20:28; 1 Tim. 3:1) Inai be hereva ginigunana, gabeai hereva ma haida do ai halasia, bona unai hereva ese Keristani elda taudia edia gaukara idauidau do idia hahedinaraia, unai amo ita totona idia karaia mai anina bada gaukara do ita lalodia bada.
2 Society ese kongregesen gunalaia tauna ia abia hidi bona unai gaukara do ia karaia noho. Kongregesen gunalaia tauna be gaukara idauidau ia gunalaia, unai ese elda taudia ia durua edia gaukara idia karaia namonamo totona. (Hesiai Gaukara bukana, rau 42) Edena bamona unai ia karaia?
3 Kongregesen gunalaia tauna ese kongregesen ena revareva ia abia bena seketere dekenai ia henia haraga ma haida idia duahia totona. Elda taudia edia hebou ia hegaegaelaia neganai, kongregesen gunalaia tauna be elda taudia edia lalohadai ia tahua dahaka dahaka idia herevalaia be namo ia diba totona bena lista ia karaia. Danu, elda taudia edia hebou dekenai ia be seamani. Abia hidi idauidau idia karaia neganai, ia itaia bema unai gaukara idia karaia namonamo. Hesiai Hebou bona pablik tok ena sediual hegaegaelaia dalana ia naria. Kongregesen dekenai idia henia hadibaia herevadia ibounai dekenai gwaumaoro ia henia, gwaumaoro ia henia kongregesen ena heau davana ibounai idia henia totona, bona hua toi toi ibounai edia dokonai kongregesen ena akaun idia sekea bona hamomokania gaukarana ia itaia.
4 Kongregesen gunalaia tauna be seamani dainai ia ese Kongregesen Hesiai Komiti ena gaukara ia naria bona gunalaia. Baibel stadilaia tauna ta ia ura bapatiso lasi pablisa ta ai ia lao, eiava bapatiso lasi pablisa ta ia ura bapatiso ia abia neganai, kongregesen gunalaia tauna ese dala ia karaia elda taudia be unai tauna ida idia hebou totona. Kongregesen gunalaia tauna be sekit naria tauna ena vadivadi hegaegaelaia gaukarana ia gunalaia, unai amo kongregesen ese unai pura idauna ena gaukara amo namo bada do ia abia.
5 Kongregesen gunalaia tauna ena gaukara be idauidau bona momo. Mai manau bona “mai goada danu” iena gaukara ia karaia noho lalonai, namona be ita ibounai be elda taudia ida ita gaukara hebou. (Roma 12:8) Bema ita idia hakaua taudia ita “kamonai henia” bona “edia hereva ita badinaia,” edia gaukara idia karaia diba mai edia moale bada ida.—Heb. 13:17.