Henanadai Mauana

◼ Nega daudau lalonai haroro gaukara ia karaia lasi tauna be edena bamona ita durua diba bena sivarai namona harorolaia tauna ai ia lao lou diba?

Ia haroro lasi tauna ese ia hahedinaraia mai ena kudouna ibounai ida ia ura Dirava ia hesiai henia neganai, unai be moale bada gauna. (Luka 15:​4-6) Toana be, ia ese dagedage eiava mauri ena hekwakwanai idauidau ia koua lasi dainai sibona ena stadi, hebou lao henia, bona haroro gaukara ia karaia lasi. Edena bamona heduru ita henia namonamo diba unai amo lauma dalanai do ia goada ia lao diba?

Namona be ita ibounai ita hekwarahi unai tauna dekenai iseda Keristani lalokau korikorina ita hahedinaraia totona. Elda taudia ese ena dabu gaudia lauma dalanai do idia tahua haraga. (Iam. 5:​14, 15) Bema nega sisina sibona lalonai ia haroro lasi, manada pablisa ta ese do ia durua haroro gaukara ia karaia lou totona. To, bema ia haroro lasi tauna be nega daudau lalonai kongregesen ia bamoa lasi, reana heduru ma haida do ia abia be namo. Ena abidadama bona laloa bada karana hagoadaia totona, buka eiava buklet maorona ta amo ia ida Baibel stadi idia karaia diba. Bema unai bamona ia vara, haroro naria tauna ese dala do ia karaia manada pablisa ta ese stadi do ia karaia. (Heb. 5:​12-​14; mani November 1998 Iseda Basileia Gaukara pepana ena Henanadai Mauana itaia.) Bema unai bamona heduru ia abia be namo tauna ta oi diba, emu kongregesen ena haroro naria tauna oi hadibaia.

Nega daudau lalonai ia haroro lasi tauna be haroro gaukara ia karaia lou totona oi do boiria lasi neganai, elda taudia rua ese ia idia itaia be namo bema ia hegeregere Basileia pablisa ai do ia lao totona. Idia ese sivarai namona harorolaia pablisa taudia ai idia ura lao taudia danu idia hebou neganai idia karaia dala hegeregerena do idia karaia. (May 1, 1989, Gima Kohorona, rau 18 itaia.) Namona be ia haroro lasi tauna ia ura bada ma haida dekenai sivarai namona ia harorolaia. Hesiai Gaukara buka ena rau 98-9 dekenai idia noho dala badadia ia badinaia danu be namo bona kongregesen hebou dekenai ia lao hanaihanai.

Lauma gaudia tahua karana ena sediual namona ia badinaia ese unai tauna do ia durua ena hetura karana namona Iehova ida ia hagoadaia bona ia dogoatao totona bona mauri hanaihanai ia lao henia dalana dekenai do ia raka noho totona. (Mat. 7:​14; Heb. 10:​23-​25) Ia hekwarahi bada bona do ia noho hanaihanai Keristani karadia ia habadaia amo, ia be Keristani tauna dainai do ia “noho kava lasi” eiava ena gaukara ese huahua do ia havaraia.​​—2 Pet. 1:​5-8.