Namona be Oiemu Mauri Dalana be Iehova Ena Hesiai Gaukara Latanai Oi Haginia
1 Iesu ese iena hereva idia kamonai taudia be ruma idia haginia taudia rua ida ia hahegeregerea. Idia ta ese nadi latanai ena mauri dalana ia haginia, ena anina be Keriso ia kamonai henia hanaihanai, bena dagedage bona hisihisi bada ia davaria neganai, ia haheaukalaia diba. Ma ta be miri latanai ia haginia. Ena anina be mai kamonai lasi ida sibona ena ura ia tahua bena hahetoho lalonai ia moru. (Mat. 7:24-27) Inai nega ena oromana ena dokona lalonai, medu bada bamona hekwakwanai momo ita davaria. Ita vairanai, hisihisi badana be ori badadia idia haboua haraga bamona ia mai noho. Mai abidadama ida do ita haheauka ela bona dokona, a? (Mat. 24:3, 13, 21) Ita kwalimu totona, hari inai negai iseda mauri dalana ita haginia namonamo be gau badana. Unai dainai, sibona ita nanadaia be gau badana, ‘Mai kamonai ida Dirava hesiai henia gaukarana latanai egu Keristani mauri dalana lau haginia auka, a?’
2 Iseda mauri dalana be Iehova ena hesiai gaukara latanai ita haginia ena anina be dahaka? Ena anina be ita hahedinaraia Iehova be iseda mauri ena badina. Basileia ita tahua guna. Dina ta ta iseda kara iboudiai lalonai Dirava ita kamonai henia. Sibona eda stadi, ruma bese stadi, bona kongregesen lalonai ita karaia Baibel stadi, bona haroro gaukara danu, be mai eda kudouna ibounai ida ita atoa guna. (Had. 12:13; Mat. 6:33) Unai kara be mai eda kamonai ida ita karaia dainai, iseda abidadama be nadi bamona do ia goada, bona hekwakwanai badadia haida idia vara neganai, do ia moru lasi.
3 Ita moale badina taunimanima milioni momo ese Dirava hesiai henia karana latanai edia mauri dalana idia haginia bona edia helaro idia atoa, Iesu ia karaia bamona. (Ioa. 4:34) Tiokratik karadia ena sediual idia badinaia namonamo dainai, hahenamo momo idia abia. Sinana ta ese ia herevalaia edena bamona ena adavana ida edia natudia memero rua idia durua Iehova idia hesiai henia totona, ia gwau: “Ai ese hereva momokani amo emai mauri ai hahonua—hebouhebou iboudiai dekenai ai lao, hebou ai hegaegaelaia bona idia dekenai ai lao, bona ai haroro hanaihanai.” Ena tau ia hereva danu, ia gwau: “Hereva momokani be emai mauri ena kahana ta lasi, ia be emai mauri. Ia be gau oredia ibounai edia bogaraginai.” Unai hegeregerena, emui ruma bese lalonai Iehova hesiai henia karana umui atoa guna, a?
4 Pura ta ta Umui Badinaia Diba Sediual Umui Karaia: Iehova ena orea ese ita ia durua lauma dalana ai sediual namona ita badinaia totona, badina pura ta ta iboudiai hebou ima ia hegaegaelaia. Iehova tomadiho henia karana latanai edia mauri dalana idia haginia Keristani taudia ese edia moni gaukara bona ruma bese maurina idia hegaegaelaia namonamo anina bada hebou iboudiai dekenai idia lao totona. Anina maragi gaudia ese edia hebou karana idia hadikaia lasi.—Fil. 1:10; Heb. 10:25.
5 Lo Keristani taudia idia diba, dina ta ta lalonai nega korikori ai aniani ita ania be namo hegeregerena, gau badana be sediual ita karaia, sibona eda stadi, ruma bese stadi, bona hebou ita hegaegaelaia totona. (Mat. 4:4) Dina ta ta lalonai miniti 15 eiava 20 oi atoa diba, sibona emu stadi totona, a? Gau badana be ma gau haida ese emu stadi negana idia hadikaia lasi. Ia be oi karaia hanaihanai karana ai ia lao be namo. Unai oi karaia totona reana daba ai do oi toreisi haraga. Tanobada ibounai lalonai Betele taudia 17,000 be daba ai idia toreisi haraga dina siri idia herevalaia hebou totona. To, oi toreisi haraga totona, hora namona ai oi mahuta be namo danu, oi laga-ani namonamo bona goada oi abia totona.
6 Bema oi be ruma bese ena kwarana, oi sibona ese dala oi tahua oiemu ruma bese ena tiokratik sediual oi hegaegaelaia totona. Ruma bese haida ese Baibel, Yearbook, eiava ma buka ta be adorahi ai, aniani murinai idia laga-ani neganai, idia duahia hebou. Edia natudia be lo Keristani taudia ai idia lao tama sina momo idia gwau idia ia durua gauna badana be pura ta ta iboudiai, hanuaboi ta ai, lauma gaudia idia tahua hebou mai moale ida. Unai bamona tamana ta ia gwau: “Lau laloa, lauma dalana ai egu natudia ia durua gauna badana be lagani 30 gunanai ai hamatamaia gauna, Wednesday hanuaboi ai, aiemai ruma bese stadi ai karaia hanaihanai.” Ena natudia toi be idia matamata neganai, bapatiso idia abia, bona gabeai idia toiosi be ful-taim hesiai gaukara idia karaia. Ruma bese stadi umui karaia bona haroro herevadia gwauraia daladia eiava hebou ena kahana umui hegaegaelaia diba, bona hagoadaia karadia ma haida umui karaia hebou diba danu.
7 Oiemu pura ta ta ena sediual dekenai, nega oi atoa Basileia haroro gaukara totona, a? (Kol. 4:5) Ita momo ese ruma bese maduna bona kongregesen maduna ita huaia dainai, ita bisi bada herea. Bema pura ta ta iboudiai nega ita abia hidi lasi haroro bona hadibaia gaukarana totona, ma kara haida ese unai anina bada gaukarana do idia hadikaia diba. Boromakau momo herea ia naria tauna ta ia gwau: “Lagani 1944 bamona ai, lau itaia lau haroro totona dina ta lau atoa be namo. Ema bona hari, pura ta ta lalonai dina ta lau gaukara lasi to lau haroro.” Keristani elda tauna ta be hua ta ta ia haroro hora edia averes be hora 15 bamona, badina ia be nega ia atoa ia haroro totona. Bema Saturday dabai gaukara ma haida ia karaia be namo, haroro gaukara murinai ia karaia. Oi bona oiemu ruma bese ese dina tamona eiava ma haida umui atoa diba haroro gaukara totona, bona unai be lauma dalana ai emui mauri ena kahana badana ai umui halaoa, a?—Fil. 3:16.
8 Emu Mauri Dalana Oi Tahua Namonamo: Ena be eda mauri dalana be Iehova ena hesiai gaukara latanai ita haginia, gau haida ese iseda hekwarahi idia hadikaia diba. Nega haida gau ta do ia vara kava bona iseda stadi, hebou, eiava haroro gaukara totona ita hegaegaelaia sediual namona do ia hadikaia. Bona eda Inai Tauna, Satani, be ia hekwarahi bada ‘iseda dala ia koua’ totona bona ita hegaegaelaia gaudia ia hadikaia totona. (1 Tes. 2:18; Ef. 6:12, 13) Namo lasi unai koua gaudia ese oiemu lalo-goada idia haorea, bena kara namodia oi hadokoa. Bema oiemu tiokratik sediual oi badinaia totona, gau haida oi haidaua be namo, oi haidaua sibona. Ita lalo-goada bona ita haheauka noho be gau badana, anina namona ita havaraia totona.
9 Namo lasi tanobada ena ura bona iseda goevadae lasi tauanina ena ura ese ita idia veria tauanina karadia ita tahua totona, bena iseda nega bona goada idia haorea. Sibona eda kara ita tahua be namo, bona sibona ita nanadaia: ‘Egu mauri dalana dekenai lau laloa maoromaoro lasi eiava lau laloa kerere matamaia, a? Egu mauri dalana be inai tanobada dekenai idia ore gwauraia gaudia latanai lau haginia matamaia, a? (1 Ioa. 2:15-17) Lau sibona egu ura, spot gadara, eiava ma moale karadia haida dekenai—hegeregere televisen bona vidio raraia totona, snuka gadaralaia eiava ma gadara ta karaia totona—lau haorea nega ena bada bona lauma gaudia tahua totona lau gaukaralaia nega ena bada be edena bamona?’
10 Bema oi itaia oiemu mauri be anina lasi gaudia amo ia honu, dahaka oi karaia be namo? Paulo ia guriguri ena tadikaka be ‘do idia namo momokani’ idia lao totona. Unai hegeregerena, namona be Iehova oi guriguri henia oi ia durua oiemu mauri dalana be iena hesiai gaukara latanai oi haginia lou totona. (2 Kor. 13:9, 11) Bena oiemu lalona oi hadaia oi gwauraia gauna do oi karaia bona oiemu kara oi hanamoa. (1 Kor. 9:26, 27) Mai kamonai ida Iehova ena hesiai gaukara oi karaia neganai, ia ese oi do ia durua ena dala amo idiba kahanai eiava lauri kahanai oi raka siri lasi totona.—Isaia 30:20, 21 itaia.
11 Dirava Ena Hesiai Gaukara mai Moalena Lalonai Oi Gaukara Goadagoada Noho: Taunimanima milioni momo ese moale idia tahua goadagoada, to edia mauri ena dokona be ia kahirakahira neganai, idia itaia, idia tahua goadagoada kohudia ese moale korikorina idia havaraia lasi. Ia be ‘lai idia lulua kava hegeregerena.’ (Had. 2:11) To, Iehova be iseda mauri ena badina neganai, nega ibounai ia ita laloa noho neganai, moale korikori do ita davaria. (Sal. 16:8, 11) Unai be momokani badina Iehova dainai ita noho. (Apok. 4:11) Bema ia, Palani Karaia Diravana Badana, be lasi, mauri be anina lasi. Iehova ita hesiai henia neganai, iseda mauri be ita bona ma haida idia durua hanaihanai karadia, mai anina bada karadia, amo idia honu.
12 Gau badana be ita laloa lasi ita hegeregere vadaeni, bona iseda karaharaga lalohadaina, Satani ena tanobada be kahirakahira momokani do ia ore lalohadaina, ia boio. Iseda lalohadai vaira negana dekenai ese dina ta ta eda mauri ia biagua. Noa ena nega ai idia noho taudia, tanobada ibounai lalonai abata badana do ia vara herevana idia abia dae lasi taudia unai, “idia laloa lasi dahaka do ia vara,” dina ta ta ai sibona edia ura—aniani, inuinu, bona headava—idia tahua guna, ela bona abata ese “ibounai ia abia lao.” (Mat. 24:37-39) Hari inai negai, edia mauri dalana be inai tanobada latanai idia haginia taudia edia helaro be taunimanima ese guna idia itaia lasi hadikaia karana badana, “Lohiabada ena dina,” dekenai do idia ore vaitani.—2 Pet. 3:10-12.
13 Emu mauri dalana be mauri Diravana, Iehova, bona ena ura karaia karana latanai oi haginia noho. Bema unai kara oi karaia, Heduru Tauna, Iehova, dekenai oi tabekau diba. Inai mauri lalonai ma heduru tauna ta be ia bamona lasi. Ia koikoi diba lasi—ena gwauhamata do ia hagugurua. (Tito 1:2) Ia mase diba lasi—bema kohu be Iehova dekenai ita haboua do ia boio lasi. (Hab. 1:12; 2 Tim. 1:12, NW) Hari inai negai kamonai bona abidadama maurina ita haginia karana be hamatamaia kahana sibona, badina unai mauri lalonai mai eda moale ida iseda moale Diravana ena hesiai gaukara do ita karaia diba ela bona hanaihanai!—1 Tim. 1:11, NW; 6:19.
[Caption on page 3]
“Hereva momokani be emai mauri ena kahana ta lasi, ia be emai mauri. Ia be gau oredia ibounai edia bogaraginai.”