Buka Gunadia Gaukaralaia Namonamo
1 Taunimanima ese buka gunadia milioni momo be tanobada ena laiberi idauidau lalodiai idia atoa. To, idia amo taunimanima ibounai be namo hanaihanai idia abia, a? (Had. 12:12) Dirava ena Basileia bona dahaka do ia karaia taunimanima totona idia herevalaia bukadia edia namo ese unai buka edia namo idia hereaia. Reana kongregesen haida be mai edia buka gunadia, edia davana idia hamaragia gaudia, bona Hiri Motu gado gaudia sisina momo idia noho. New Guinea Pidgin buka momo idia haorea vadaeni bona do ita oda lou diba lasi. To Australia dekenai, Hiri Motu gado buka momo idia do noho bona idia ita oda diba. Hiri Motu kongregesen momo dekenai unai buka idia do noho. Unai dainai January lalonai, do ita hekwarahi edia davana be 25 toea bona 50 toea Hiri Motu buka gunadia do ita hariharilaia. Baibel stiuden taudia, lou henia taudia, bona kamonai taudia ma haida dekenai ita hariharilaia diba. Danu, January lalonai, Mauri Hanaihanai bukana do ita hariharilaia diba Hiri Motu, New Guinea Pidgin, eiava English gado dekenai, ena davana be K2.00.
2 Mai Edia Namo Korikorina: Reana ita haida ita laloa unai buka be hari idia vara gaudia idia kikilaia lasi, idia be iseda buka matamatadia hegeregerena lasi. To namona be ita laloatao, idia be Baibel ena hereva momokanina idia herevalaia. Idia gwauraia hedinarai Basileia sivaraina ena anina ia do bada hari bona bema ta ese ia kamonai henia, ia do ia hamauria diba. (Ioa. 17:3) Unai dainai, namona be ita hekwarahi bada unai buka gunadia ita gaukaralaia namonamo totona.
3 Inai sivarai ese edia namo ia hamomokania. Hahine ta ena tubuna hahine ia mase neganai, iena Watch Tower bukadia gunadia ia abia. Witness hahine ta ese ia nanadaia bema unai buka edia namo korikorina ia diba. Unai hahine ia gwau: “Edia namo lau diba lasi, to edena dala ai do lau diba?” Unai hahine ese Baibel stadi ia abia dae, hereva momokani lalonai ia vareai, bona unai murinai ena tubuna hahine ena laiberi ia laloa bada momokani. Unai buka gunadia be dava bada gaudia ia dekenai!
4 Oi Hariharilaidia: Ruma ta ruma ta dekenai unai buka gunadia oi hariharilaia sibona lasi, to namona be iseda buka idia ura idia duahia taudia oi lou henia neganai idia dekenai oi hariharilaia danu. Gima Kohorona bona Awake! sabskripsen idia abia taudia bona hanaihanai magasin idia abia dae taudia dekenai oi hariharilaia danu. Emu Baibel stadi taudia totona, edia diba hereva momokani dekenai do idia habadaia bukadia gunadia oi abia hidi. Oiemu laiberi dekenai idia do noho lasi bukadia oi abia be namo. Unai dala amo, tiokratik laiberi namona do oi karaia, bona sibona emu stadi karana do ia hanamoa.
5 Buka gunadia ita haboua bona rakatania be namo lasi. Namona be idia ita gaukaralaia namonamo, ita davaria taudia ita hagoadaia ‘Dirava do idia gari henia, bona iena oda do idia badinaia’ totona.—Had. 12:13.