Sivarai Namona Harorolaia—Buka Gunadia Amo
1 Dala ita abia hidi Dirava ita tomadiho henia totona be gau badana. Unai amo mauri do ita abia. Vadaeni, diba maorona ita abia bona mai aonega danu ita gaukaralaia dalana ita diba totona be tahua gaudia namodia.—Her. 23:23; Ioane 17:3.
2 Diba ita abia bona iseda aonega ia bada ia lao noho totona, Dirava ena Hereva ita stadilaia be gau badana. Unai dala amo iena hahegani, taravatu, heduru, bona sisiba herevadia do ita diba namonamo. Danu, namona be gunaguna Iehova ena kara iena taunimanima dekenai do ita laloa namonamo. Mai ena ura danu Iehova ese ia idia tahua taudia dekenai diba bona aonega ia henidia. Idia hanaia vadaeni laganidia lalodiai, iena orea dekena amo, ia ese buka bona magasin momo ia halasidia, bona idia lalodiai Baibel ena hereva idauidau momo idia noho. Iehova idia do diba lasi taudia dekenai, unai gaudia edia heduru be bada.
BUKA GUNADIA EDIA NAMO
3 January lalonai, Hereva Momokanina, Memero Kekeni, bona Maino bukadia do ita hariharilaidia, ta ena davana be 25 toea. Unai buka lalodiai sivarai idauidau momo idia noho. Lauma dalanai idia ese taunimanima idia durudia bada diba. (Mat. 5:14-16 itaia danu.) Unai dainai, hari hua lalonai, namona be ita goada karaia iseda kongregesen dekenai idia noho buka gunadia iboudiai do ita hariharilaidia totona.
4 Inai ekspiriens ese ia hahedinaraia taunimanima be unai buka idia abidia be mai anina bada. Witness hahine ta ese ena adavana dekenai harihari gauna buka gunana ta ia henia. Guna, unai tau be Baibel ena sivarai ia laloa bada lasi. Tau ese hanuaboi tamona lalonai unai buka ia duahia ore neganai, ena hahine ia hoa. Unai buka ena hereva ese ia durua bena ia abidadama Baibel be Dirava ena Hereva, bona murinai, kongregesen hebouna dekenai ia lao bona ia noinoi ta ese ia dekenai Baibel stadi ia karaia totona. Hua toi idia do ore lasi lalonai, haroro gaukara ia karaia bona hari ia bapatiso vadaeni.
LALOA GOADAGOADA ABIA
5 Dirava ena Hereva ena siahu oi laloa maragi lasi. Unai buka gunadia ese Baibel ena hereva idia hahedinaraia dainai, namona be mai goada danu oi hariharilaidia. To, namona be oi hariharilaia buka gunadia edia toana idia dika lasi. Bema buka haida idia dika sisina, namo lasi ruma ta ruma ta dekenai oi hariharilaidia, badina unai neganai reana ruma taudia ese sivarai namona do idia laloa bada lasi.
6 Namona be unai buka gunadia hariharilaidia karana amo Dirava ena Hereva ita harorolaia namonamo. Unai amo ita haroro henia taudia ese namo ela bona hanaihanai do idia davaria diba.
[Questions]
1. Dahaka dainai dala ita abia hidi Dirava ita tomadiho henia totona be gau badana?
2. Edena dala amo diba do ita abia bona iseda aonega ia bada ia lao noho diba?
3. January lalonai, namona be dahaka do ita karaia toho?
4. Dahaka ekspiriens ese ia hahedinaraia taunimanima dekenai buka gunadia ita hariharilaidia be gau badana?
5. (a) Buka gunadia ita hariharilaidia neganai, dahaka dainai mai goada danu ita henidia toho be namo? (b) Dahaka do ita karaia lasi be namo?