Mai Eda Ura Bada ida Sivarai Namona Harorolaia
1 “Lau ura bada umui lau itaia gwauraia . . . Unai dainai lau ura umui Roma noho taudia dekenai danu Sivarai Namona do lau harorolaia.” Roma tadikaka dekenai ia torea revarevana ena matamana kahanai, aposetolo Paulo be sibona unai bamona ia gwauraia. Dahaka dainai Paulo ia ura idia ia vadivadi henia? Ia gwau: “Lau ura be umui emui huanai lalona giroa taudia matamata do lau davaria . . . Lau be Sivarai Namona dekenai lau hemarai lasi momokani. Badina be Sivarai Namona be Dirava ena siahu, abidadama taudia ia hamauria.”—Roma 1:11-16.
2 Paulo ese Efeso ena tatau badadia ia hereva henidia neganai, unai bamona ura bada ia hahedinaraia. Paulo ese ia hamaorodia: “Lau ginidae Asia dekenai ia mai bona hari . . . umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi umui dekenai. Iuda taudia bona Helene taudia danu dekenai lau sisiba henia goada.” (Kara 20:18-21) Iena teritori ibounai lalodiai, Paulo ena ura be hahemauri ena sivarai namona ia halasia noho bona Basileia ena huahua momo ia havaraia. Unai be haheitalai namona ita tohotohoa totona!
3 Ita sibona ita nanadaia diba: ‘Egu gabu dekenai sivarai namona lau halasia neganai, unai bamona ura bada lau hahedinaraia, a? Lau laloa haroro gaukara be gaukara ta sibona, eiava lau ura sivarai namona be taunimanima momo dekenai lau halasia? Lau ese sibona egu noho dalana lau gurigurilaia, a? Lau ese emai teritori ai lau haroro diba daladia ibounai lau tahua, hegeregere ruma ta ruma ta gaukara dekenai, dala dekenai, bisinesi gabudiai, telefon amo, bona nega bona gabu idauidau ai, eiava?’
4 April Lalonai mai Eda Ura Bada ida Gaukara: April ena hua be nega namona ita sibona eda haroro gaukara ita hanamoa totona. Heduru painia horana idia hamaragia dainai momo ese idia karaia diba. Reana April bona May lalodiai, heduru painia gaukara do oi karaia diba. Eiava regula painia do oi karaia diba, badina ena hora idia hamaragia dainai. Bema oi be kongregesen pablisa ta, oi ese inai hua bona vaira huana ai oiemu haroro gaukara oi habadaia diba, painia gaukara idia karaia diba taudia do oi durudia totona, a? Unai ese Iehova ena kudouna do ia hamoalea!
5 Paulo hegeregerena, Basileia ena pablisa taudia ese haroro gaukara lalonai unai ura bada hemamina idia hahedinaraia be namo. Hesiai gaukara lalonai ita karaia diba gaudia ibounai ita karaia neganai, moale korikorina ita abia. Paulo ese unai bamona moale ia abia ena hesiai gaukara helagana dekenai. Iena haheitalai namona ita tohotohoa be namo.—Roma 11:13; 1 Kor. 4:16.