Ruma Bese Taudia Idia Gaukara Hebou Dalana—Haroro Gaukara Lalonai
1 Tatau bona edia adavadia, tama sina bona edia natudia be Keristani hesiai gaukara lalonai idia gaukara hebou bona taunimanima vairanai Iehova ena ladana idia hanamoa neganai, iseda lalona idia moale, ani? (Sal. 148:12, 13) Namona be ruma bese iboudiai be mai edia sediual namona haroro gaukara idia karaia hanaihanai totona. Emu ruma bese ese pura ta ta dina ta idia atoa haroro gaukara idia karaia totona, a? Bema oibe, ruma bese taudia iboudiai idia hegaegae diba bona do idia gaukara goada diba.—Aon. 21:5a.
2 Ruma bese ena haroro dinana ia do ginidae lasi neganai, emu ruma bese ese do ia gaukaralaia herevadia umui hegaegaelaia hebou be namo, ani? Hegaegae hebou karana ese ruma bese do ia durua bada, bona ruma bese gaukara hebou karana ena mamina namona ia havaraia diba. Ruma bese ibounai ese haroro gaukara idia karaia hebou bona idia hegaegaelaia namonamo neganai, anina bada idia havaraia diba!
3 Sekit naria tauna ta be magasin gaukara lalonai ruma bese ta ia bamoa. Unai ruma bese kekenina ta ida ruma ta ruma ta gaukara ia karaia neganai, unai kekeni ia henanadai: “Lau ida do oi gaukara ela bona edena negai?” Bena ia gwau gabeai ia be iena tamana ida do ia gaukara. Toana be ia bona iena tamana idia ura dikadika haroro gaukara idia karaia hebou. Unai be ruma bese ena toana namona!
4 Reana ruma bese haida be lagani lalonai hua tamona ai heduru painia gaukara idia karaia hebou. Eiava ruma bese tauna ta be hanaihanai heduru painia gaukara ia karaia diba eiava regula painia gaukara ia hamatamaia diba. Bema ruma bese taudia idia hegaegae namonamo bona idia gaukara hebou, reana ruma bese taudia iboudiai be painia gaukara ia karaia tauna idia durua bona unai kara amo edia haroro gaukara idia habadaia diba. Edia gaukara idia habadaia dainai bona haroro gaukara lalonai sivarai namodia idia davaria dainai, ruma bese taudia be hahenamo do idia abia.—Mal. 3:10.
5 Ruma besedia be haroro gaukara idia karaia namonamo noho neganai, do idia noho namonamo, do idia gaukara goada, anina do idia havaraia, bona Iehova ena hesiai gaukara lalonai do idia moale!—Filipi 2:1, 2 itaia.