Oi be mai Emu Magasin Oda, A?
1 Nega ta oi be haroro gaukara hebouna dekenai oi lao bona oi davaria emu haroro baege lalonai magasin ta ia noho lasi, a? Vadaeni, unai hekwakwanai oi hanaia dalana be magasin oda oi abia. Namona be pablisa ta ta ibounai be magasin ia naria tadikaka dekenai oda namona idia henia idia gaukaralaia diba hegeregerena. Magasin kopi ta ta ibounai be hida idia ura idia abia be idia gwauraia hedinarai. Unai dala amo, oi bona emu ruma bese ese magasin do umui abia hanaihanai bona edia namba do ia hegeregere. Unai oi karaia vadaeni, a?
2 Namona be magasin oi abia totona oda oi karaia, ani? Unai oi karaia neganai mamina do oi abia pura ta ta ibounai magasin hariharilaia ena maduna ia bada, bona oi hariharilaia neganai do oi moale bada. Bema magasin oda oi abia vadaeni, namona be oi itaia bema oi abia noho magasin edia namba ia hegeregere hua ta lalonai oi gaukaralaia totona. Momokani, ita ura iseda oda ia ginidae neganai hanaihanai ita abia—bona edia davana ita henia—bona namona be mamina ita abia unai be iseda maduna. Reana namona be sibona eda kara ita biagua, moni ita atoa siri bona iseda magasin oda ia ginidae neganai ita hoia totona. Bema magasin idia heniatorehai bona edia davana idia abia lasi, kongregesen ena magasin akaun do ia dika. Reana unai dainai kongregesen ena magasin oda do idia hamaragia momokani—o do idia koua—ela bona unai abitorehai idia henia. Momokani ita ura lasi unai do ia vara. Bema oi be nega sisina daudau lalonai gabu ta dekenai do oi noho, oiemu maduna be magasin naria tauna oi hadibaia oi ura dahaka do idia karaia oiemu magasin oda dekenai. Reana oi ura emu oda do ia koua, ia dogoatao ela bona oi giroa mai, o oi noho lasi neganai ta dekenai ia henia.
3 Kongregesen ena Magasin Dinana oi durua diba, a? 1999 Calendar of Jehovah’s Witnesses dekenai ia hedinarai bamona, lagani ena Saturday iboudiai be Magasin Dinana! Gima Kohorona bona Awake! hariharilaia gaukarana be mai anina bada bona oi laloa maragi lasi be namo. Bema ita hekwarahi magasin gaukarana ita karaia goadagoada totona, ita be ‘sivarai namona ita mailaia noho’ iseda dekena taudia dekenai.—Isa. 52:7.