Dahaka ese Ita Ia Durua Diba Abidadama Dekenai Ita Gini Goada Totona?
1 Iehova ena orea ita bamoa matamaia negana amo ema bona hari, lauma dalanai ita goada ita lao karana be iseda moale ena badina! To, ‘Keriso lalonai eda ramuna ita hadihoa, sibona ita haginia noho, bona abidadama dekenai ita marere lasi’ totona lauma dalanai ita tubu noho be gau badana. (Kol. 2:6, 7, NW) Ena be lauma dalanai momo idia goada idia lao, to haida idia hure oho vadaeni, badina ‘abidadama dekenai idia gini goada’ lasi. (1 Kor. 16:13) Unai be ita dekenai ia vara lasi totona gau ta ita karaia diba. Dahaka ita karaia?
2 Hanaihanai Lauma Gaukarana Karaia: Iehova ena orea lalonai lauma gaudia tahua hanaihanai karana oi goadalaia. Unuseniai, lauma dalanai ita dabu gaudia idia henia badabada. Kongregesen ena hebou idauidau, sekit hebouhebou, bona distrik hebouhebou ese lauma dalanai iseda tubu bona gini goada karana idia hagoadaia, unai namo ita abia totona hanaihanai unai hebou idauidau dekenai ita noho be namo. (Heb. 10:24, 25) Hanaihanai Baibel, Gima Kohorona, bona Awake! magasin, bona Dirava ena Hereva amo aniani korikori idia herevalaia bukadia ita duahia karana ese iseda lauma ramuna ena tubu dalana do ia hanamoa bona hagoadaia. (Heb. 5:14) Lauma dalanai tahua gaudia ita atoa bona ita hagugurua totona ita gaukara goadagoada karana ese namo bada do ia havaraia danu.—Fil. 3:16.
3 Heduru Lo Taudia Amo: Namona be kongregesen lalonai lauma dalanai idia lo vadaeni taudia ida iseda hebamo karana ita habadaia. Elda taudia oi dibaia be namo, badina idia ese ita idia hagoadaia bada diba. (1 Tes. 2:11, 12) Namona be idia henia sisiba eiava heduru herevadia be mai eda moale ida ita abia dae. (Ef. 4:11-16) Hesiai taudia danu idia ura ma haida idia durua abidadama dekenai idia goada totona, unai dainai unai tadikaka amo goada ita tahua be namo.
4 Oi ura haroro gaukara lalonai heduru oi abia, a? Elda taudia oi hereva henia, bona heduru oi noia. Reana oi danu be Painia Taudia ese Ma Haida Idia Durua gaukarana lalonai heduru oi abia diba. Oi be bapatiso matamata tauna, a? Hesiai Gaukara bukana oi stadilaia bona ia lalonai idia noho herevadia oi badinaia karana ese lauma dalanai emu tubu dalana do ia haharagaia diba. Oi be tama eiava sina ta, a? Namona be hanaihanai emu natudia ese lauma gaudia idia laloa bada karana oi hagoadaia.—Ef. 6:4.
5 Abidadama dekenai iseda ramuna ita hadihoa bona ita marere lasi neganai, Iehova ida hetura karana namona bona iseda tadikaka edia lalokau hebamo do ita moalelaia. Unai ese ita ia durua Satani ena hahetoho idauidau ita dadaraia totona, bona mauri hanaihanai ena helaro ia hagoadaia.—1 Pet. 5:9, 10.