Namona be Oi Lou Henia!

¹ “Ai herevahereva namo herea! Namona be lau laloatao unuseniai lou henia do lau karaia.” Nega haida unai hereva oi gwauraia bona gabeai oi laloaboio unai tauna be edeseniai ia noho, a? Bema emu haere be oibe, oi diba do oi lou henia dalana tamona sibona be, pepa dekenai oi torea.

² Gau Ibounai Oi Torea: Kamonai tauna ida oi herevalaia gauna be emu lalona dekenai ia do noho neganai, namona be unai lou henia do oi karaia totona mai anina bada gaudia ibounai oi torea. Unai tauna ena ladana bona edena bamona ena toana do oi diba oi torea. Ena adres oi torea, to namo lasi oi torea kava​​—namona be oi sekea lou bema oi torea gauna be ia maoro. Oi herevalaia gauna, oi duahia sirina, bona oi henia buka eiava magasin oi torea.

³ Bema henanadai ta be unai tauna dekenai oi henia, oi giroa neganai oi haerelaia totona, namona be unai oi torea. Unai tauna, ena ruma bese, eiava ena tomadiho dekenai gau ta oi dibaia, a? Bema oibe, namona be oi torea. Bena, gabeai oi giroa neganai, unai gaudia oi herevalaia, unai ese ia hahedinaraia unai tauna oi laloa bada. Danu, emu vadivadi ginigunana oi karaia ena dina bona hora bona oi gwau do oi giroa lou ena nega danu oi torea. Oi karaia rekodi maorodia ese oi do idia hadibaia lou bona emu gwauhamata do oi laloaboio lasi.​​—1 Tim. 1:​12.

⁴ Emu rekodi oi karaia haorea murinai, emu haroro gaudia ma haida​​—emu buka baege, Baibel, Herevalaia bukana, bona buka bona magasin​​—ida oi atoa, unai dala amo do oi gaukaralaia diba. Namona be emu lou henia edia nouti be emu haroro gaukara totona oi torea gaudia ma haida, hegeregere ta oi davaria lasi ruma edia nouti, ida gabu tamona dekenai oi atoa lasi. Momokani, ena be lou henia karaia totona rekodi maorona oi karaia, to gau badana be do oi lou henia!

⁵ Unai Tauna Oi Laloa: Haroro gaukara totona oi hegaegae neganai, emu lou henia edia nouti oi riviulaia. Taunimanima ta ta oi laloa bona gabeai lou henia oi karaia neganai edena dala oi gaukaralaia diba oi laloa be namo. Unai tauna ena ura be edena bamona oi habadaia diba bena Baibel stadi do ia ura henia oi lalohadailaia. Unai bamona palani karana amo sivarai namona harorolaia tauna hegeregerena anina namona oi havaraia bona moale do oi davaria.​​—Aon. 21:5.

⁶ Unai dainai, gabeai kamonai tauna ta oi davaria neganai, namo lasi oi laloa unai tauna do oi laloatao haraga diba. To, namona be oi torea, oi torea gaudia oi riviulaia, unai tauna oi laloa noho, bona namona be do oi lou henia!