‘Harihari Gaudia Do Oi Henia mai Moale Danu’
1 Lagani handred momo gunanai, aposetolo Paulo ese Timoteo ia hadibaia abidadama tamona taudia ia hagoadaia “kara namodia do idia karaia, edia kohu do idia haria karaia, haida durua totona, bona harihari gaudia do idia henia, mai moale danu.” (1 Tim. 6:18) Paulo ese Heberu Keristani taudia ia hadibaia danu ‘kara namodia do idia laloaboio lasi, bona kohu lasi taudia danu edia kohu do idia abia hebou.’ (Heb. 13:16) Dahaka dainai unai hakaua herevadia ia torea? Badina be ia diba “Dirava ese iena hairai, iena hanamoa, bona iena maino do ia henia kara namo taudia ibounai dekenai.”—Roma 2:10.
2 Iehova Dirava be gau ibounai ia Havaraia Tauna dainai, gau ibounai be ia ena. (Apok. 4:11) Iehova be ita dainai iena gaudia ia gaukaralaia karana ita laloa bada. Ena be taunimanima momo be tanikiu karana idia hahedinaraia lasi, to Atai Herea Diravana be mai ena hariharibada ida mauri durua gaudia be iboudiai dekenai ia do henia noho. (Mat. 5:45) Ia lalokau henia bada Natuna be boubou gauna bamona ia henia danu, unai kara amo mauri hanaihanai ita abia diba. Ita dainai ia hahedinaraia lalokauna ese ita ia doria be namo, iseda dekena taudia dekenai hariharibada karana ita hahedinaraia totona, ani?—2 Kor. 5:14, 15.
3 Dahaka Ita Henia Diba? Ia maoro ita dekenai idia noho kohu be Dirava ese ia moalelaia dalana dekenai ita gaukaralaia. Ita ura tauanina bona lauma dalanai tanobada ibounai Basileia gaukarana ita durua. Momokani, sivarai namona be ta ese ia abia diba davana bada kohu badana, badina ia be “Dirava ena siahu, abidadama taudia ia hamauria” totona. (Roma 1:16) Hua iboudiai mai eda moale ida iseda nega bona kohu be haroro bona hadibaia gaukarana dekenai ita gaukaralaia neganai, unai lauma kohuna be ma haida dekenai ita haria diba, unai amo mauri hanaihanai do idia abia diba.
4 Tauanina dalanai edia kohu be bada lasi taudia ita durua neganai, Iehova ia moale bada. Ia gwauhamata hahenamo do ia henia, bona ita ia hadibaia: “Dirava ena Kota bada dinana dekenai, oiemu kohu bada ese gau namona ta, oi dekenai do idia henia lasi, to kara maoromaoro ese, mase dekena amo oi ia hamauria diba.” (Aon. 11:4; 19:17) Iseda kohu amo Basileia ena gaukara ita durua bona sivarai namona ita harorolaia badabada be dala hereadaena, ia amo ita hahedinaraia harihari gaudia ita henia mai moale ida.