Kara Namo Bona Kohu Hariharilaia
1 Doreka “be kara namona bona bogahisihisi kara dekenai ia goada.” (Kara 9:36, 39) Doreka ena kara dainai, ia idia dibaia taudia bona Iehova Dirava ese ia idia lalokau henia bada. Heberu 13:16 (Buka Helağa) ia gwau: “Kara namo bona kohu hariharilaia karana umui laloaboio lasi, badina be Dirava ese unai bamona kara helagadia ia moalelaia.” Hari, edena bamona ma haida dekenai kara namo bona kohu hariharilaia karana ita hahedinaraia diba?
2 Dala ta be, iseda “kohu” amo ma haida ita durua diba. (Aon. 3:9, Buka Helağa) Iseda kontribusen amo tanobada ibounai gaukarana ita durua dainai, tanobada hegegemadai Kingdom Hall, Assembly Hall, bona brens rumadia ma haida idia haginia diba. Eda hariharibada karana dainai, taunimanima milioni momo be tiokratik hadibaia herevadia bona lauma dalanai hebamo namona idia moalelaia diba.
3 Hagoadaia Heheni: Dika badadia idia vara neganai, Iehova ena taunimanima be idia hegaegae edia tadikaka bona Witnes lasi taudia dekenai “kara namodia” idia karaia totona. (Gal. 6:10) France dekenai, kemikol faktori ta lalonai gau haida idia pou murinai, faktori badinai idia noho headava tau bona hahine idia gwau, “Emai Keristani tadikaka be karaharaga idia mai idia heduru totona, emai daiutu bona ma haida edia daiutu idia hagoevaia. Emai dekena taudia idia hoa badina taunimanima momo herea idia mai idia heduru totona.” Taihu ma ta ia gwau: “Elda taudia idia mai. Ai idia hagoadaia. Momokani, unai be durua gauna korikorina, bona kohu ia hereaia momokani.”
4 Ena be dala idauidau ai iseda dekena taudia ita kara namo henia diba, to gau badana be idia dekenai hereva momokani, Iehova ia gwauhamatalaia “mauri hanaihanai” ena helaro unai, ita harorolaia danu be namo. (Tito 1:1, 2) Baibel ena hereva ese tanobada ai idia vara gaudia bona kara dika dainai idia lalohisihisi taudia ia hagoadaia momokani. (Mat. 5:4) Gau ta be ita ia koua lasi neganai, ma haida ita kara namo henia bona eda kohu ita hariharilaia be namo.—Aon. 3:27.