Edia Mauri Do Idia Haboioa Diba!
1 Baibel ese ia hahedinaraia goevagoeva Iehova ia ura “taunimanima ibounai ese mauri do idia davaria.” To, inai danu be momokani, tanobada ena taunimanima bilioni momo ese Iehova Dirava bona Iesu Keriso amo ia haginia Basileiana dekenai lalohadai maorona idia abia neganai sibona, mauri do idia davaria. Bona “hereva momokani do idia diba” negana sibona ai, lalohadai maorona do idia abia diba. (1 Tim. 2:3, 4) Taunimanima ita hadibaia, nega daudau lasi murinai Dirava ese tanobada amo kara dika ibounai do ia kokia, iena kara maoromaoro tanobada matamatana dekenai dala ia kehoa totona, to mai anina bada hamauria gaukarana ita karaia totona hahegani ita abia danu.—Mat. 24:14; 28:19, 20; Roma 10:13-15.
2 Dahaka Dainai Ita Karaharaga be Namo? Iesu ia gwau ‘hisihisi bada herea ta do ia vara, Dirava ese tanobada ia karaia negana amo hisihisi unai bamona ia vara lasi ia mai bona harihari.’ (Mat. 24:21) Unai hisihisi be do ia bada ia lao ela bona Aramagedono do ia vara. (Apok. 16:16) Taunimanima hutuma bada ese mase do idia davaria, bema sivarai namona idia abia dae lasi, bona idia huanai be iseda abidadama lasi varavara, dekena taudia, gaukara turadia, sikuli turadia, bona ita diba taudia ma haida. To iseda ura bada be ita hekwarahi “taunimanima ibounai” ita davaria totona, unai amo Dirava ena kara ita tohotohoa, ia ese tanobada taudia ia lalokau henia karana hahedinaraia totona ena Natuna, Iesu Keriso, be iboudiai edia mauri davalaia boubouna bamona ia henia. (Ioa. 3:16) Namona be mai eda goada ibounai ida taunimanima ibounai ita boiria, Dirava ena hahemauri gabuna dekenai idia heau mauri totona. Haroro gaukara ita karaia goadagoada neganai, taunimanima edia rara be iseda latanai lasi.—Esek. 33:1-7; 1 Kor. 9:16.
3 Ita Haroro Ena Badina be Dahaka? Dirava ena Hereva ibounai ese haroro gaukara ena anina bada ia hahedinaraia. Aposetolo Paulo ia gwau bamona, ‘Keriso ena lalokau ese ita ia biagua noho,’ Dirava ena dala hegeregerena ita noho totona. (2 Kor. 5:14) Danu, Gima Kohorona ese nega momo iseda maduna haroro gaukara dekenai ia hahedinaraia. Iseda Basileia Gaukara pepana ese haroro gaukara ita karaia diba daladia ia hahedinaraia hanaihanai. Elda taudia ese unai gaukara idia hegaegaelaia bona ita idia hagoadaia ita haroro totona. Pablisa taudia ma haida ese ita idia boiria idia ida do ita haroro hebou. Nega momo ita kamonai ita idia hagoadaia iseda kiki herevadia do ita hegaegaelaia, magasin bona buka ma haida do ita hariharilaia toho, lou henia do ita karaia, Baibel stadi do ita karaia, bona dala ia kehoa neganai do ita haroro. Unai ibounai ese ita ia durua ita haroro ena badina, ita ura taunimanima ita hamauria, ita hagugurua totona!—1 Kor. 9:22, 23; Ef. 1:13.