Dina Ibounai Lalonai Iehova Gari Henia
1 “Lohiabada gari henia kara be aonega hamatamaia ena dala.” (Sal. 111:10) Ita ia hagoadaia kara namodia ita karaia bona ita ia durua kara dika amo ita siri totona. (Aon. 16:6) Unai gari karana be ita ia Havaraia Tauna matauraia bada karana, ita ia doria ia habadua karadia bona iena taravatu utua karadia do ita dadaraia. Unai kara ita goadalaia be namo bona dina ibounai lalonai ita hahedinaraia.—Aon. 8:13.
2 Dina iboudiai, Satani ena tanobada ia hahedinaraia laumana ese ita ia veria goadagoada, ena kara dikadia ita badinaia totona. (Ef. 6:11, 12) Iseda goevadae lasi tauanina be mai ena kara dika bona dika dekenai ita ia hakaua lao. (Gal. 5:17) Unai dainai, Iehova ena oda ita badinaia, ita moale, bona mauri do ita abia totona, dina ibounai lalonai ia do ita gari henia be gau badana.—Deut. 10:12, 13.
3 Heberu 10:24, 25, dekenai, ita idia hagoadaia do ita hebou hanaihanai, hari ita noho negadia lalonai hagoadaia heheni karana ita “habadaia” totona. Hebou mai henia hanaihanai karana be gau badana, dina gabedia amo do ita roho mauri totona. Dirava ita habadua karana ita gari henia ese ita do ia doria hebou ita lao bona hebou ena anina ita laloa bada totona. Dirava idia gari henia taudia dekenai Keristani heboudia lao henia karana be kara helagana ta.
4 Basileia ena sivarai namona harorolaia gaukarana ena hahegani badinaia karana be ma dala ta Dirava gari henia karana ita hahedinaraia totona. (Mat. 28:19, 20; Kara 10:42) Iseda tahua gauna badana haroro gaukara lalonai be ma haida ita durua, Iehova gari henia karana idia goadalaia bona iena ura idia badinaia totona. Do ita karaia diba bema lou henia ita karadia, ita hekwarahi Baibel stadi ita hamatamaia totona, bona ma haida dekenai Dirava ena taravatu ibounai ita hadibaia. Unai amo ita ese Iehova gari henia karana bona iseda dekena taudia lalokau henia karana do ita hahedinaraia.—Mat. 22:37-39.
5 Dirava idia gari henia lasi taudia be lauma gaudia laloa bada karana dekenai do idia kwalimu lasi, bona tanobada ena hodahoda, mase ia havaraia hodahodana, eiava lalohadaina, idia abia. (Ef. 2:2) Namona be iseda lalona ita hadaia momokani, “Dirava do ita tomadiho henia, mai hemataurai bona mai gari danu.” (Heb. 12:28) Unai dala amo ita be dina ibounai lalonai Dirava idia gari henia taudia edia hahenamo do ita abia.