Tama Sina e—Emui Natudia Dekenai Kara Namodia Umui Hadibaia
1 Kara namodia be ita vara negana amo ita abia lasi bona gabeai ita abia kava lasi. Danu, natudia dekenai kara namodia hadibaia karana be ia vara haraga lasi. “Hadibaia” ena anina be “henia metairametaira” eiava “hadibaia loulou.” Umui tama sina ese emui natudia be “Iehova ena matahakani bona lalona biagua karana ai do umui naridia” totona, dala tamona do umui badinaia loulou be namo.—Ef. 6:4, NW.
2 Beibi Negana amo Matamaia: Natudia maragidia ese diba idia abia bona gau matamatadia idia karaia diba dalana be ia idau momokani. Ena be taunimanima badadia be nega momo idia davaria gado matamata idia dibaia be ia auka, to idia do sikuli lasi maragidia be nega tamona ai gado rua eiava toi idia dibaia diba. Oi laloa lasi oiemu natuna be ia maragi dainai kara namodia do ia dibaia diba lasi. Bema natuna be ia do maragi momokani neganai Baibel ena hereva momokani be idia hadibaia matamaia bona idia hadibaia noho, natuna ena mauri laganidia be do bada lasi neganai, iena lalona be aonega bona ‘mauri’ ia henia dibana amo ia honu vadaeni.—2 Tim. 3:15.
3 Haroro Hanaihanai: Dirava ena Basileia sivaraina namona harorolaia hanaihanai karana be natudia idia maragi neganai idia dekenai umui hadibaia kara namona ta. Tama sina momo be natudia idia do beibi neganai, idia abia lao ruma-ta-ruma-ta gaukarana dekenai. Tama sina ese haroro gaukara karaia hanaihanai karana amo natudia idia durua hesiai gaukara idia laloa bada bona idia ura henia bada totona. Tama sina ese haroro gaukara karaia daladia idauidau be natudia dekenai idia hahedinaraia diba.
4 Tiokratik Haroro Sikuli lalonai idia vareai karana ese natudia ia durua. Stadi dalana namona bona mai lalo-parara ida duahiduahi karana idia dibaia. Baibel herevalaia, lou henia karaia, bona Baibel stadi idia karaia daladia idia dibaia. Unai bamona hadibaia karana ese reana idia do ia veria do idia painia totona bona hesiai gaukara ena hahenamo idaudia idia tahua totona. Betele taudia bona misinari taudia momo be haroro sikuli lalonai idia vareai neganai idia laloa lou mai moale ida bona idia abia dae ia ese idia ia durua kara namodia idia dibaia totona.
5 Ita ibounai be Raro Gaukaralaia Tauna Badana, Iehova, ena imana dekenai ia noho raro bamona. (Isa. 64:8) Raro ia manoka neganai, gaukaralaia dalana be do ia haraga. Nega daudau ia kaukau lalonai, ia auka ia lao. Taunimanima danu be unai bamona. Idia maragi neganai, idia be manoka—bona natudia matamatadia umui hadibaia haraga diba. Idia maragi laganidia lalonai gau idauidau idia dibaia haraga, namo eiava dika. Oi be lalokau tama o sina dainai, Keristani hesiai gaukara lalonai emu natudia dekenai kara namodia do oi hadibaia matamaia haraga.