Ita ese Iehova Bona Iesu Ita Matauraia be Namo
April 8 ai Memorial Dekenai Idia Mai Taudia Ibounai ese Namo Idia Davaria Diba Dalana
1 Hari inai negai daidia idia matauraia bada? Tanobada taudia ese haida idia karaia gaudia idia laloa bada neganai, unai taudia idia matauraia. To, nega momo unai karadia idia laloaboio haraga. To taunimanima iboudiai dekenai namo idia havaraia karadia be edena bamona? April 8, 2001 ai, dina ia diho murinai, Lohiabada ena Anibou ita karaia neganai unai karadia amo kara badana do ita laloa namonamo.
2 Daika ia hegeregere ita matauraia bada totona? Baibel ia haere: “Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia.” (Apok. 4:11) Iehova be Havaraia Tauna dainai, ia be guba bona tanobada edia Siahu Ibounai Lohiana. Hanaihanai do ia hegeregere ita matauraia totona!—1 Tim. 1:17.
3 Iesu Keriso ia karaia kara namodia dainai taunimanima ese do idia doko lasi hahenamodia idia davaria diba. Iena Tamana ia tohotohoa goevagoeva. (Ioa. 5:19) Iena Tamana ia kamonai henia goevagoeva bona ia hesiai henia mai abidadama ida dainai, ia be “hegeregere momokani siahu bona kohu momo do ia abia. Ia be hegeregere momokani aonega bada, bona goada bada, mataurai, hairai bona hanamoa bada do ia abia!” (Apok. 5:12) Iena Tamana ese ia matauraia dainai, King ai ia halaoa. (Sal. 2:6-8) April 8, 2001 ai, Lohiabada ena Anibou ita karaia neganai, dala ia kehoa Tamana bona Natuna ita matauraia totona.
4 Madi, taunimanima edia histori lalonai haida sibona ese dala maorona ai Iehova bona ena Natuna idia matauraia. Nega haida, Dirava ena idaunegai besena, Israela taudia, danu ese Iehova hesiai henia karana ena toana sibona idia hahedinaraia. Unai be hemataurai lasi karana dikana. (Mal. 1:6) Hemataurai karana maorona ita hahedinaraia, bema Iehova bona ena Natuna ese ita totona idia karaia karadia ita laloa bada bona idia ita lalokau henia dainai mai abidadama ida idia ita kamonai henia. Unai bamona hemataurai ita hahedinaraia ena anina be Dirava ita gari henia bona ita abia isi, bona iseda kara ibounai lalonai Iehova bona Iesu ita laloa bada. Keristani kongregesen ena tahua gauna be ma haida ese unai do idia karaia totona taunimanima idia hadibaia bona idia durua.
5 Hebou Badana ai Hemataurai Ita Hahedinaraia Diba: Memorial be lagani ta ta ai Iehova ena taunimanima ese idia karaia hebou badana. Idia ura Iehova idia hesiai henia bona idia matauraia taudia ibounai be do idia mai be namo. (Luka 22:19) Ai laloa idia gaukara goada Witnes taudia milioni 6 sibona lasi, to kamonai taudia momo do idia mai dainai, idia mai taudia ibounai be milioni 14 do idia hanaia. Unai be iseda guba Tamana matauraia dalana namona! Ena be unai hebou ese Iesu ena kara ia hahedinaraia bada, to ia karaia karadia dekenai ita hahedinaraia hemataurai ese Tamana, Iesu ia siaia Diravana, ia abia isi.—Ioa. 5:23.
6 Unai hebou badana durua totona dahaka ita karaia diba? Kamonai matamata taudia ita durua diba ia amo namo bada idia abia totona. Idia oi hagoadaia do idia mai totona, bona bema idia mai totona heduru idia abia be namo, idia oi durua. Hereva ena anina oi gwauraia hedinarai. Idia oi hakaua ma haida idia hedavari henia totona. Idia itaia bona kamonai gaudia ese edia lalona idia veria diba, ita ida Iehova do idia matauraia totona.
7 Namona be oi lalo-parara unai program ena siahu be bada. Iunivesiti stiuden ta ia gwau: “Nega momo egu dubu dekenai Communion lau abia, to inai be idau momokani. Lau itaia inai be Baibel ese ia gwauraia hegeregerena, bona lau laloa umui be hereva momokani umui abia.” Hanaihanai hebou dekenai ia lao matamaia bona daudau lasi murinai bapatiso ia abia.
8 Kamonai Matamata Taudia Oi Durua Idia Goada Idia Lao Totona: Memorial dekenai idia mai kamonai matamata taudia oi itaia bena nega daudau lasi murinai idia oi vadivadi henia, idia dibaia bona itaia hagoadaia gaudia umui herevalaia lou totona. Oi hahedinaraia hebou ma haida umui karaia danu, bona unai hebou lalodiai edia diba Baibel dekenai do idia habadaia. Diba buka ena karoa 17, “Dirava Ena Orea Lalonai Do Oi Noho Namonamo,” umui herevalaia karana amo do idia itaia kongregesen ese lauma dalanai ia henia heduru gaudia be momo, bona unai heduru do idia abia diba. Dala oi karaia, Our Whole Association of Brothers vidio idia itaia totona, bena sibona edia matana amo Iehova ena taunimanima edia lalo-tamona, moale, bona goada idia itaia diba!
9 Gau badana be kamonai taudia ese Iehova idia matauraia dalana idia diba. Namona be oi hahedinaraia Iehova ese mai eda kudouna ibounai ida ita henia guriguridia ia moalelaia bona idia amo lauma dalanai goada ita abia loulou. (1 Ioa. 5:14) Dahaka Ita Karaia? buklet ena kahana 8 ia lao 12 amo, Iehova matauraia karadia oi hahedinaraia. Dirava Ena Ura Idia Karaia buklet ena rau 16-17 dekenai ia noho hereva umui herevalaia, bona kamonai matamata taudia oi hagoadaia, haroro gaukara amo Iehova matauraia dalana idia laloa totona.
10 Iesu ena boubou gauna bona iena hahediba taudia edia gaukara ita karaia diba ena hahenamo ita laloa bada karana ese Tamana ia matauraia bona ma haida dekenai namo ia havaraia. Iesu be ia gwauhamata, ia gwau: “Bema tau ta ese lauegu hesiai gaukara do ia karaia, egu Tamana ese do ia hanamoa.”—Ioa. 12:26.