“Iehova Ena Ruma Dekenai Ita Lao”

(Kahana 1)

¹ David be mai ena ura ibounai ida inai boiboi hereva ia kamonai henia: “Iehova ena ruma dekenai ita lao.” (Sal. 122:1) Dubu helaga ese Iehova ena “ruma” ia laulaulaia, Dirava momokanina idia ura tomadiho henia taudia edia hebou gabuna. Noho namo bona maino ena gabu. Hari, tanobada hegegemadai Keristen kongregesen ibounai be Dirava ena “ruma,” “hereva momokani ena du bona iena badina korikori.” (1 Tim. 3:15) Hahemauri ena dala ibounai be unai dala amo ia mai. Unai dainai, unuseniai “bese iboudiai ese do idia lao henia” bema idia ura Dirava ena Basileia siahu henunai ia gwauhamatalaia hahenamo idia moalelaia totona.​—Isa. 2:2.

² Unai “ruma” be tano 229 lalonai kongregesen 69,000 bona ma haida amo idia karaia. Tanobada hegegemadai, Kingdom Hall iboudiai edia iduara be idia kehoa, unuseniai gaukara goadagoada taudia 4 milion bona ma haida idia boiboi idia gwau: “Oi mai! . . . Ranu umui ura henia taudia, mauri ranuna do umui abia dae, ia be davana lasi.” (Apok. 22:17) Momo be unai hereva idia kamonai bona mai edia ura bada danu idia abia dae. Haida be unai hereva idia abia dae, to Iehova ena ruma dekenai idia do lao lasi, bona Keristen kongregesen lalonai idia do hebou lasi. Unai taudia be ‘lauma gaudia idia ura’ bona kongregesen lalonai sibona idia davaria diba. (Mat. 5:3) Ita be nega dikadia lalonai ita noho, bona nega dokona be kahirakahira do ia ginidae. Kamonai lasi karana bona ura lasi lalohadaina ita hahedinaraia neganai dika bada ita davaria diba. Hari be nega namona, taunimanima be ‘Dirava kahirakahira dekenai idia lao’ bona karaia dalana be ena orea kahirakahira dekenai idia lao. (Iak. 4:8) Edena bamona idia ita durudia?

³ Kamonai Matamata Taudia be Dirava Ena Orea Dekenai Ita Abia Lao: Kamonai taudia ita hereva henidia neganai, namona be ita hadibadia orea idia laloa bada totona. Ena be Baibel siridia haida bona ena hahediba hereva haida ita gwauraia hedinarai, to unai diba be ita dekena amo ia mai lasi. Ita dibaia gaudia ibounai be orea ena amo ia mai, hesiai tauna mai ena kamonai oreana ese ‘nega korikori ai aniani ita ia henia.’ (Mat. 24:​45-47) Kamonai matamaia negana amo unai taudia idia diba tomadiho goevadaena be ita eiava kongregesen sibona lasi, to tanobada hegegemadai ia gaukara namonamo tiokratik oreana be Iehova ena hakaua siahuna henunai ia heau namonamo.

⁴ Ita idia hakaua dalana be Iehova ena amo ia mai, ia gwauhamata iseda raka dalana do ia naria bona ita do ia hadibaia. (Sal. 32:8; Isa. 54:13) Unai hadibaia herevadia be iseda buka bona magasin idauidau amo idia halasia. Bema kamonai taudia ita durudia iseda buka bona magasin idauidau idia laloa bada totona, bona ita hahedinaraia idia be mauri ena dala idia hahedinaraia, do idia ura duahidia bona unai sivarai be edia mauri lalonai do idia badinaia, do idia negea kava lasi. Namona be unai buka bona magasin ita hariharilaia toho neganai ita gaukaralaidia namonamo, unai amo do idia matauraia diba. Unai ese kamonai matamata taudia ia hadibadia orea idia laloa bada bona ia henia heduru gaudia dekenai do idia tabekau totona.

⁵ Kamonai matamata taudia ita hadibadia hebou gabuna ia noho hanaihanai diba idia abia totona. Kingdom Hall ena address bona hebou edia nega idia dekenai oi hadibaia. Iseda hebou ena idau bona reana guna idia lao henia tomadiho heboudia edia idau ita hahedinaraia. Taunimanima ibounai idia mai diba; moni gogoa bona moni noinoilaia karana ta be lasi. Ena be idia abia hidi dagi taudia ese program idia karaia, to taunimanima iboudiai be haere idia henia diba bona program ena kahana idauidau idia vareai diba. Ruma bese iboudiai idia mai diba; natudia danu be aiemai Baibel herevadia lalonai idia vareai danu. Aiemai orea lalonai dagi idia abia taudia be dabua idaudia idia karaia lasi. Kingdom Hall lalonai toana be namo herea, kandolo, kaivakuku eiava tomadiho laulaudia idia noho lasi. Hebou idia lao henia taudia be unai gabu kahirakahira dekenai idia noho taudia.

⁶ Kamonai Taudia Durudia Noho Baibel Stadi Idia Abia Totona: Baibel stadi karaia ena badina badana be Dirava ena hereva momokani hahedibalaia. Bona namona be oi stadi henia tauna ese Iehova ena orea ia laloa bada bona unai orea ai ia vareai ena badina badana ia diba be namo. Keristen ginigunadia edia nega ai, Iesu bona ena hahediba taudia ese gaukara namona idia karaia dainai, kudou maoro taudia idia veria lalo-tamona ai hakaua oreana henunai idia gaukara totona. Taunimanima momo idia kamonai gabudia ai, kongregesen idia haginidia diba bona hakaua herevadia idia hadibalaidia. Unuseniai idia hebou taudia be lauma dalanai idia hagoadadia, idia durudia hekwakwanai negadia ai idia haheauka. (Heb. 10:​24, 25; 1 Pet. 5:​8-10) Iseda nega lalonai, Iehova ena ura be “ia karaia gaudia ibounai, gubai bona tanobadai, be Keriso ese do ia biagua.” (Ef. 1:​9, 10) Unai dainai, tanobada hegegemadai ‘tadikaka ibounai oreana ia noho.’​—1 Pet. 2:17.

⁷ Pura ta ta iboudiai Baibel stadi oi karaia neganai, orea ena sivarai haida oi gwauraia hedinarai, unai amo oi stadi henia tauna ese Iehova ena orea do ia laloa bada bona ia gwauraia mauri dalana do idia laloa bada. Pura ta ta iboudiai, miniti haida lalonai, orea ena sivarai ta bona ena gaukara dalana oi gwauraia hedinarai. June 1 ena Gima Kohorona ai, heduru hereva haida do oi davaria. Jehovah’s Witnesses in the Twentieth Century bona Iehova ena Witness Taudia be Lalo-Tamona ai Dirava ena Ura Idia Karaia Tanobada Ibounai Dekenai buklet, ese orea ena heau dalana idia hahedinaraia bona ita do ia hanamoa dalana ia hahedinaraia danu. Jehovah’s Witnesses​—The Organization Behind the Name ena video be Baibel stadi taudia dekenai ita hahedinaraia, bona idia sibona do idia itaia dahaka gaukara ita hagugurua noho. Yearbook ai, tano haida dekenai iseda gaukara ita hagugurua edia sivarai haida bona ekspiriens haida oi abidia hidi bona idia dekenai oi hahedinaraia. Buka bona magasin haida ita gaukaralaidia diba. Pura haida eiava hua haida idia lao murinai, ruma ta ruma ta gaukara ita karaia ena badina oi gwauraia hedinarai, iseda hebou idauidau edia badina, iseda gaukara ia heau ena moni davaria dalana, bona tanobada hegegemadai iseda gaukara idauidau ita kikilaia.

⁸ Kamonai matamata taudia be Witness taudia ma haida idia dibadia neganai, edia diba kongregesen dekenai do idia habadaia. Unai dainai, nega ta ta ai, pablisa haida oi boiria stadi lalonai idia vareai totona. Kongregesen lalonai tadikaka haida edia mauri dalana be ia hegeregere oiemu stadi tauna ena mauri dalana dekenai, eiava edia ura gaudia idia hegeregere neganai, reana unai tadikaka ese stadi tauna ia durua ena lalohadai ia haidaua totona. Reana elda tauna ese oi ia bamoa diba emu stadi tauna ia dibaia totona. Sekit naria tauna eiava ena adavana oi abia lao emu stadi dekenai, unai amo hahenamo bada do ia abia. Bema Witness taudia be oiemu Baibel stadi ena gabu kahirakahira dekenai idia noho, namona be dala oi hegaegaelaia oiemu Baibel stadi tauna idia hedavari bona idia hetura totona, bona unai amo goada ia abia kongregesen ena hebou ia lao totona.

“Iehova Ena Ruma Dekenai Ita Lao”

(Kahana 2)

¹ Kamonai Matamata Taudia Ita Durudia Hebou Dekenai Do Idia Mai Totona: Namona be hereva momokani ai idia vareai matamata taudia idia diba hebou lao henia karana be mai anina bada. Edia lalona oi veria toho. Gima Kohorona Stadi lalonai dahaka hereva do idia kikilaia oi hahedinaraia idia dekenai. Do idia karaia pablik tok edia hereva kwaradia oi gwauraia hedinarai. Haroro School ai bona Kongregesen Buka Stadi ai do idia stadilaia gaudia oi gwauraia hedinarai danu. Hebou dekenai oi dibadia gaudia ia hamaoroa, bona oi ura hebou oi lao henia ena badina momokani oi gwauraia. Bema mai emu dala, oi hamaoroa emu motuka dekenai do oi abia lao diba hebou dekenai. Hebou ia do hamatamaia lasi neganai, reana telefon amo ia oi rini henia oi hadibaia do oi abia lao hebou dekenai, unai ese ia do ia hagoadaia hebou dekenai do ia lao totona.

² Bema oi stadi henia tauna ta be hebou dekenai ia mai, namona be ia oi abia dae. Tadikaka haida bona elda taudia dekenai oi abia lao ia hedavari henidia totona. Bema ia be pablik tok hebouna dekenai ia lao, pablik tok ia henia tauna dekenai oi abia lao ia hedavari henia totona. Kingdom Hall ena gabu oi hahedinaraia ia dekenai. Buka bona magasin idia atoa gabuna, kontribusen mauadia, laiberi bona lagani ena hereva badana edia badina ia dekenai oi gwauraia hedinarai. Ia dekenai oi hahedinaraia, Kingdom Hall be tomadiho rumana sibona lasi, to unuseniai haroro gaukara idia hegaegaelaia danu.

³ Iseda hebou idia hakaua dalana oi gwauraia hedinarai. Ia dekenai ita gaukaralaidia buka bona magasin oi hahedinaraia. Ia dekenai oi hahedinaraia Baibel be ita gaukaralaia momo bukana. Oi hadibaia, hebou dekenai taunimanima ibounai, maragidia danu be haere bona gaukara haida idia karaia diba. Oi hadibaia, iseda miusik bona ane buka lalonai ia noho herevadia be Iehova ena Witness taudia ese idia torea iseda tomadiho lalonai ita gaukaralaidia totona. Oi hadibaia hebou taudia edia mauri dalana be idauidau. Hagoadaia herevadia amo tadikaka edia moale bona heabidae karadia oi hahedinaraia. Oi hahedinaraia unai Baibel stadi tauna ena namo oi tahua neganai, unai ese ia hamoalea bona do ia ura ia hebou lou.

⁴ Haida Idia Hebou Lasi Ena Badina: Nega haida, ena be oi hekwarahi gau ibounai idia dekenai oi hahedinaraia totona, to haida idia ura lasi orea kahirakahira dekenai idia lao. Oi hesiku haraga lasi. Oi be idia hekwarahilaia gaudia oi laloa namonamo. Ema bona hari, reana idia laloa dina badadia sibona idia hebou be namo. Reana edia ruma bese taudia eiava edia turadia ese idia koudia toho. Reana edia dekena taudia idia kirikirilaidia. Bona reana, idia tahua moale karadia ese idia veria momo. Reana idia laloa unai hekwakwanai idia hahanaia diba lasi; namona be oi durudia unai kara idia laloa maoromaoro totona bona “anina bada gau namodia” idia tahua totona.​—Fil. 1:10.

⁵ Baibel ena siridia amo oi haheauka ena badina oi hahedinaraia. Oi hahedinaraia goevagoeva ita ibounai be hagoadaia hereva bona lauma dalanai heduru ita abia ita hebamo heheni neganai. (Roma 1:​11, 12) Iesu ese ia hahedinaraia ruma bese taudia ese ita idia dagedage henia neganai, unai ese iseda hebou karana ia koua ena badina namona lasi. Paulo ese ita ia hagoadaia, ia gwau namo lasi ita hemarai taunimanima vairanai ita hahedinaraia ita be Iesu ena hahediba taudia. (2 Tim. 1:8, 12-14) Baibel ena taravatu badinaia karana idia laloa bada neganai lauma dalanai do idia tubu.

⁶ Iduara be Idia Kehoa: Iehova ena tomadiho momokani rumana be ruma ibounai ataiai. Tanobada hegegemadai, tano 229 lalonai taunimanima idia boiria: “Umui mai, Iehova ena ororo dekenai do ita daekau, . . . bona ia ese ena kara ita do ia hadibalaia, bona ita be ena dala ai do ita raka.” (Isa. 2:3) Kamonai matamata taudia ese unai boiboi idia kamonai bona idia badinaia neganai, do idia mauri diba. Ita hadibadia Iehova ena orea idia laloa bada totona neganai, unai be dala namona ta idia ita durudia totona.

[Questions for Part 1]

1. (a) David ena nega lalonai, Iehova ena ruma be dahaka, bona dahaka dainai ia ura lao unuseniai? (b) Hari, Iehova ena ruma be dahaka? Dahaka dainai unuseniai ita lao be gau badana?

2. (a) Iehova ena ruma be dahaka? (b) Dahaka dainai taunimanima be Iehova ena ruma kahirakahira dekenai idia lao be gau badana?

3. (a) Kamonai matamata taudia ita hereva henidia hamatamaia negana amo, dahaka dainai ita hadibadia orea idia laloa bada totona? (b) Daidia be tomadiho goevadaena lalonai idia noho?

4. Edena bamona kamonai matamata taudia ita hadibadia orea idia laloa bada bona ia henia heduru gaudia dekenai do idia tabekau?

5. Iehova ena Witness taudia edia hebou edia idau bona tomadiho haida edia hebou edia idau be dahaka?

6. (a) Iehova ena ura iseda negai be dahaka? (b) Iehova ese ia haboudia “gaudia ibounai” edia anina be dahaka?

7. Baibel stadi ia hakaua tauna be pura ta ta iboudiai, dahaka ia karaia diba, stadi tauna ese Iehova ena ruma ia laloa bada totona?

8. Dahaka gaudia haida ma oi karaia diba matamata taudia oi durudia Iehova ena orea idia laloa bada totona?

[Questions for Part 2]

1. Kamonai matamata taudia be edena bamona ita durudia hebou dekenai do idia lao totona?

2. (a) Kingdom Hall ai kamonai matamata taudia idia lao neganai, dahaka ita karaia diba heabidae mamina idia abia totona? (b) Kingdom Hall lalonai dahaka gaudia haida be kamonai matamata taudia dekenai ita gwauraia hedinarai diba?

3. (a) Hebou dekenai Baibel ita stadilaia daladia be edena bamona kamonai matamata taudia dekenai ita gwauraia hedinarai? (b) Dahaka danu ita gwauraia hedinarai diba idia dekenai?

4. Dahaka dainai kamonai matamata taudia be idia hebou lasi?

5. Iseda Baibel stadi taudia bona matamata taudia ma haida dekenai dahaka Baibel taravatudia ita hadibadia be namo?